(ភ្នំពេញ)៖ សាលាអន្តរជាតិ ស៊ី អាយ អេ ហ្វឺសត៍ បាននិងកំពុងរៀបចំសន្និសីទគំរូតាមបែបអង្គការសហប្រជាជាតិ Harvard World MUN ដែលជាព្រឹត្តិការណ៍លើកទី១ក្នុងប្រទេសកម្ពុជា រយៈពេល ៣ថ្ងៃ ចាប់ពីថ្ងៃទី២២ រហូតដល់ថ្ងៃទី២៤ ខែឧសភា ឆ្នាំ២០២៦ ដើម្បីផ្ដល់ឱកាសឱ្យប្អូនៗសិស្សានុសិស្ស ទទួលបានបទពិសោធ ជាក់ស្ដែងក្នុងវេទិកាពិភាក្សា តស៊ូមតិ និងស្វែងរកដំណោះស្រាយសម្រាប់បញ្ហាដ៏ស្មុគស្មាញក្នុងពិភពលោក។

លោក Vladimir Sousek នាយករងសាលាអន្តរជាតិ ស៊ី អាយ អេ ហ្វឺសត៍ សាខាសែនសុខ បាន បង្ហាញក្ដីរំភើបរីករាយចំពោះការប្រារព្ធសន្និសីទជាលើកដំបូងនៅប្រទេសកម្ពុជានេះ។ លោកបានមានប្រសាសន៍ថា សិស្សានុសិស្សរបស់យើងនឹងត្រូវពិភាក្សាគ្នាលើប្រធានបទសំខាន់ៗជាច្រើនដូចជា ទិសដៅអភិវឌ្ឍប្រកបដោយចីរភាពរបស់អង្គការសហប្រជាជាតិ - the United Nation Sustainable Development Goals ព្រមទាំងវិបត្តិ និងជម្លោះនានាដែលកំពុងតែកើតឡើងជុំវិញពិភពលោក។

លោកបានបន្ថែមថា ការចូលរួមក្នុងសន្និសីទកម្រិតអន្តរជាតិនេះ នឹងជួយសិស្សានុសិស្សក្នុងការអភិវឌ្ឍបំណិនជាច្រើន តួយ៉ាងបំណិននិយាយជាសាធារណៈ ការកសាងទំនុកចិត្តលើខ្លួនឯង និងឱកាសក្នុង ការបង្កើតមិត្តភាពក្នុងចំណោមសិស្សានុសិស្សជាច្រើន មកពីសាលាអន្តរជាតិដទៃទៀត និងមកពីប្រទេសនានា ក្នុងតំបន់។

យុវតី គ្រី វណ្ណនិសា ជាសិស្សសាលាអន្តរជាតិ ស៊ី អាយ អេ ហ្វឺសត៍ ម្នាក់ដែលបានចូលរួមក្នុងសន្និសីទគំរូតាមបែបអង្គការសហប្រជាជាតិនេះ បានបង្ហាញពីក្ដីសង្ឃឹមយ៉ាងមុតមាំថា ការចូលរួមនេះនឹងផ្ដល់អត្ថប្រយោជន៍ទាំងផ្នែកសិក្សា និងការកសាងបំណិននានាសម្រាប់រូបគេ ដូចជាការនិយាយជាសាធារណៈ ភាពជាអ្នកដឹកនាំ និងការសហការជាមួយអ្នកដទៃ ព្រោះប្អូនស្រីមានបំណងចង់ក្លាយជាអ្នកនយោបាយ ឬអ្នកការទូតដ៏ប៉ិនប្រសពប់ម្នាក់នាថ្ងៃអនាគត។

ជាមួយគ្នានេះ លោក John Grainger នាយកសាលា Next Generation Schools ដែលមានសាលាជាសមាជិកចំនួន ៣៥ទីតាំងសិក្សា ក្នុងតំបន់អាស៊ីអាគ្នេយ៍ បានបង្ហាញក្ដីរីករាយជាពន់ពេក ដែលសាលាអន្តរជាតិ ស៊ី អាយ អេ ហ្វឺសត៍ ត្រូវបានជ្រើសរើសជាទីតាំងប្រារព្ធសន្និសីទដ៏មានសារៈសំខាន់នេះ។ លោក បានបញ្ជាក់ថា សិស្សានុសិស្សក្នុងពេលបច្ចុប្បន្ន ត្រូវតែមានការយល់ដឹងអំពីកិច្ចការការទូត និងបញ្ហានានា ដែលជាបញ្ហាប្រឈមនៅក្នុងពិភពលោក។

តាមរយៈបទពិសោធរបស់លោក, សិស្សានុសិស្សដែលមានចំណេះដឹង និងបទពិសោធន៍ក្នុងសន្និសីទគំរូរបស់អង្គការសហប្រជាជាតិ នឹងទទួលអត្ថប្រយោជន៍ក្នុងការដាក់ពាក្យចូលរៀននៅមហាវិទ្យាល័យ ហើយក្នុងន័យនេះ សិស្សានុសិស្សទាំងអស់បានទទួលឱ្យ ចូលរៀនជាបន្តបន្ទាប់ក្នុងសាកលវិទ្យាល័យល្បីៗជាច្រើនក្នុងពិភពលោក៕