(កណ្តាល)៖ ព្រះឃោសធម្មបណ្ឌិត លន់ សុគន្ធា ព្រះវិន័យធរគណខេត្តកណ្ដាល បាននិមន្តតំណាងដ៏ខ្ពង់ខ្ពស់ សម្តេចព្រះឧត្តមមុនី ជា សំអាង ព្រះវិមលវេទី មេគណខេត្តកណ្តាល និមន្តជាព្រះអធិបតីដ៏ខ្ពង់ខ្ពស់ក្នុងពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣៣ និងបើកបវេសនកាលពុទ្ធិក​សិក្សាឆ្នាំ២០២៦-២០២៧ សម្រាប់ស្រុកកោះធំ។

ពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣៣ នេះបានធ្វើឡើងនាថ្ងៃទី១៩ ខែឧសភា ឆ្នាំ២០២៦ ដោយមានការ និមន្ត អញ្ជើញចូលរួមពីព្រះអនុគណស្រុកកោះធំ តំណាងមន្ទីរធម្មការនិងសាសនាខេត្តកណ្ដាល លោកអភិបាលរង តំណាងអភិបាលស្រុកកោះធំ សហការីព្រះអនុគណ ព្រះចៅអធិការ ព្រះគ្រូសូត្រស្តាំ ឆ្វេង សមណសិស្ស ទូទាំងស្រុកកោះធំ ប្រធានការិយាល័យសង្គមកិច្ច លោកមេឃុំ នាយប៉ុស្តិ៍នគរបាលឃុំ អាចារ្យ គណៈកម្មការ គ្រប់វត្តក្នុងស្រុកកោះធំ សរុបចំនួន ៣០០ អង្គ/នាក់ ពិធីនេះប្រព្រឹត្តទៅនៅវត្តពិសីឧត្តម ស្រុកកោះធំ ខេត្តកណ្តាល។

នាឱកាសនិមន្តពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣៣នេះ ព្រះឃោសធម្មបណ្ឌិត លន់ សុគន្ធា ក៏បាន នាំយកថវិការបស់សម្ដេចព្រះមេគណខេត្តកណ្ដាល ឧបត្ថម្ភក្នុងមហាសន្និបាតមន្ត្រីសង្ឃទូទាំងប្រទេសលើកទី៣៣ និងបើកបវេសនកាលពុទ្ធិកសិក្សាឆ្នាំ២០២៦-២០២៧ នេះផងដែរ៕