(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ នៅរសៀលថ្ងៃទី២២ ខែឧសភា ឆ្នាំ២០២៦ បានដឹកនាំកិច្ចប្រជុំពង្រឹងការងារគណៈវិជ្ជាជីវៈសុខាភិបាលទាំង៤ នៅក្នុងខេត្តព្រះវិហារ ដើម្បីជំរុញគុណភាព និងប្រសិទ្ធភាព នៃការបម្រើសេវាសុខភាពជូនប្រជាពលរដ្ឋ។

កិច្ចប្រជុំនេះ មានការចូលរួមពីថ្នាក់ដឹកនាំ និងតំណាងក្រុមប្រឹក្សាគណៈវិជ្ជាជីវៈសុខាភិបាល រួមមាន៖ លោកវេជ្ជបណ្ឌិត ស៊ុម ស៊ីញ អនុប្រធានមន្ទីរសុខាភិបាល និងទទួលបន្ទុកសម្របសម្រួលការងាររបស់ក្រុមប្រឹក្សា គណៈវិជ្ជាជីវៈសុខាភិបាល, លោកវេជ្ជបណ្ឌិត ជូ ប៉ូនីណា ប្រធានមន្ទីរពេទ្យបង្អែក ១៦ មករា និងជាប្រធានក្រុមប្រឹក្សាគណៈគ្រូពេទ្យខេត្ត, លោកឱសថការី តាំង ប៉ារី ប្រធានក្រុមប្រឹក្សាគណៈឱសថការីខេត្ត, លោក សូ ឡាំង ប្រធានក្រុមប្រឹក្សាគណៈគិលានុបដ្ឋាកខេត្ត, លោកស្រី ឆ្មប ហិរិញ្ញឹក តំណាងលោកស្រីឆ្មប ឆន សម្ផស្ស ប្រធានក្រុមប្រឹក្សាគណៈឆ្មបខេត្ត។

កិច្ចប្រជុំនាឱកាសនោះ លោកវេជ្ជបណ្ឌិត គួង ឡូ បានថ្លែងណែនាំក្រុមប្រឹក្សាគណៈវិជ្ជាជីវៈសុខាភិបាលទាំង៤ ឱ្យខិតខំចូលរួមពង្រឹងគុណភាពនៃការផ្តល់សេវាសុខភាព ជូនប្រជាពលរដ្ឋទាំងក្នុងមូលដ្ឋានសុខាភិបាលសាធារណៈ និងសេវាសុខាភិបាលឯកជន ដោយផ្តោតសំខាន់លើការងារមួយចំនួន រួមមាន៖

*ពង្រឹង និងជំរុញការចេញអាជ្ញាបណ្ណវិជ្ជាជីវៈជូនសមាជិកគណៈវិជ្ជាជីវៈនីមួយៗ ទាំងអ្នកប្រកបវិជ្ជាជីវៈក្នុងវិស័យសាធារណៈ និងឯកជន ដើម្បីធានាឱ្យមានការអនុវត្តវិជ្ជាជីវៈត្រឹមត្រូវតាមច្បាប់ និងបទដ្ឋានបច្ចេកទេស។

*ពង្រឹងក្រមសីលធម៌វិជ្ជាជីវៈដល់សមាជិកទាំងក្នុងវិស័យរដ្ឋ និងឯកជន តាមរយៈការបណ្តុះបណ្តាល និងផ្សព្វផ្សាយអំពីក្រមសីលធម៌វិជ្ជាជីវៈ ដើម្បីលើកកម្ពស់ទំនួលខុសត្រូវ និងសេចក្តីថ្លៃថ្នូរនៃវិជ្ជាជីវៈសុខាភិបាល។

*ពង្រឹងសមត្ថភាពសមាជិក ទាំងផ្នែកជំនាញបច្ចេកទេស និងសមត្ថភាពឌីជីថល ដើម្បីឆ្លើយតបនឹងការវិវត្តន៍នៃវិស័យសុខាភិបាល និងបច្ចេកវិទ្យាទំនើប។

*បង្កើនកិច្ចសហការជាមួយក្រុមការងារសេវាឯកជនរបស់មន្ទីរសុខាភិបាល ក្នុងការចុះត្រួតពិនិត្យ និងតាមដានការផ្តល់សេវាសុខាភិបាលឯកជន ឱ្យអនុវត្តបានត្រឹមត្រូវតាមបទដ្ឋានវិជ្ជាជីវៈ និងច្បាប់ជាធរមាន។

លោកវេជ្ជបណ្ឌិត គួង ឡូ បានថ្លែងបញ្ជាក់ទៀតថា៖ការពង្រឹងការងារគណៈវិជ្ជាជីវៈសុខាភិបាល គឺជាកត្តាសំខាន់ក្នុងការលើកកម្ពស់គុណភាពសេវាសុខាភិបាល ប្រកបដោយប្រសិទ្ធភាព សុវត្ថិភាព និងភាពជឿជាក់ សម្រាប់ប្រជាពលរដ្ឋនៅទូទាំងខេត្តព្រះវិហារ៕