(ភ្នំពេញ)៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នារសៀលថ្ងៃទី២៣ ខែឧសភា ឆ្នាំ២០២៦ បានសម្ដែងនូវការសោកស្ដាយ និងផ្ញើសាររំលែកទុក្ខដល់គ្រួសារសព និងជនរងគ្រោះដែលរងរបួសធ្ងន់ស្រាល ក្នុងគ្រោះថ្នាក់ចរាចរណ៍នៅខេត្តកំពង់ឆ្នាំង និងខេត្តស្វាយរៀង។

នាព្រឹកថ្ងៃនេះ មានករណីគ្រោះថ្នាក់ចរាចរណ៍ដ៏រន្ធត់នៅខេត្តកំពង់ឆ្នាំង និងស្វាយរៀង បានបណ្ដាលឱ្យកម្មករ កម្មការនីជាច្រើននាក់បានស្លាប់ និងរងរបួសធ្ងន់ស្រាល។

ក្រោយឃើញហេតុការណ៍ដ៏រន្ធត់នេះ លោកជំទាវបណ្ឌិត បានបង្ហោះសារនៅលើគណនីហ្វេកប៊ុកផ្លូវការដូច្នេះថា៖ «នាងខ្ញុំសូមចូលរួមសម្តែងនូវសេចក្តីសោកស្តាយយ៉ាងជ្រាលជ្រៅ និង ការរំលែកទុក្ខដ៏ក្រៀមក្រំជាទីបំផុត ជូនចំពោះក្រុមគ្រួសារនៃជនរងគ្រោះ ទាំងអស់ដែលបានរងរបួស និងរងគ្រោះថ្នាក់ក្នុងហេតុការណ៍ដ៏អកុសលនេះ។ សូមបួងសួងឱ្យអ្នកដែលរងរបួសទាំងអស់បានជាសះស្បើយក្នុងពេលឆាប់ៗ និង សូមឱ្យវិញ្ញាណក្ខន្ធអ្នកដែលបានបាត់បង់ជីវិតបានទៅកាន់សុគតិភព»។

យោងតាមរបាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា គិតត្រឹមម៉ោង១២ថ្ងៃត្រង់ ថ្ងៃទី១២ ខែឧសភា ឆ្នាំ២០២៦នេះ គ្រោះថ្នាក់ចរាចរណ៍នៅខេត្តកំពង់ឆ្នាំង បានបណ្តាលឱ្យមានជនរងគ្រោះ ចំនួន៥៣នាក់ (ស្រី ៥០នាក់) ក្នុងនោះ ស្លាប់ចំនួន ៩នាក់ (ស្រី ៨នាក់) របួសធ្ងន់ចំនួន ៩នាក់ (ស្រី ៨នាក់) និងរបួសស្រាលចំនួន ៣៥នាក់ (ស្រី ៣៤នាក់) ខណៈដែលគ្រោះថ្នាក់នៅក្រុងស្វាយរៀង ខេត្តស្វាយរៀងបានបណ្តាលឱ្យមានជនរងគ្រោះចំនួន ៤០នាក់ (ស្រី ២៤នាក់) ក្នុងនោះស្លាប់ចំនួន ៥នាក់ (ស្រី ២នាក់) របួសធ្ងន់ចំនួន ៦នាក់ (ស្រី ៤នាក់) និងរបួសស្រាលចំនួន ២៩នាក់ (ស្រី ១៨នាក់)៕