(ភ្នំពេញ)៖ នារសៀលថ្ងៃទី២៣ ខែឧសភា ឆ្នាំ២០២៦ នៅបញ្ជាការដ្ឋានកងរាជអាវុធហត្ថរាជធានីភ្នំពេញ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានអញ្ជើញជាអធិបតីក្នុងពិធីបើកវគ្គហ្វឹកហាត់សម្រកទម្ងន់ និងសម្រកក្បាលពោះ ប្រចាំឆ្នាំ២០២៦។ វគ្គហ្វឹកហាត់នេះមានការចូលរួមពីនាយទាហាន នាយទាហានរង និងពលទាហាន ដែលមានឈ្មោះត្រូវហ្វឹកហាត់សរុបចំនួន ១៣៣នាក់។

លោកឧត្តមសេនីយ៍ឯក រ័ត្ន ស្រ៊ាង បានបញ្ជាក់ថា ការបង្កើតកម្មវិធីនេះឡើង គឺដោយសារលោកមានការបារម្ភពីសុខភាពរបស់កម្លាំងក្រោមឱវាទ ដ្បិតអីការលើសទម្ងន់អាចបង្កផលវិបាកជាច្រើនដល់សុខភាព។ ការថែរក្សាសុខភាព និងពង្រឹងកាយសម្បទា គឺជារឿងចាំបាច់ដើម្បីកាត់បន្ថយការចំណាយថវិកានិងពេលវេលាក្នុងការព្យាបាលជំងឺ។ លោកបានដាស់តឿនដល់សិក្ខាកាមទាំងអស់ ត្រូវមានភាពអត់ធ្មត់ មិនត្រូវធុញទ្រាន់ ឬខ្ជិលច្រអូសឡើយ ហើយត្រូវអនុវត្តតាមការណែនាំរបស់គ្រូឧទ្ទេសឱ្យបានត្រឹមត្រូវ ទាំងរបបអាហារ និងការហាត់ប្រាណ។

ទន្ទឹមនឹងនេះ លោកមេបញ្ជាការក៏បានដាក់បទបញ្ជាម៉ឺងម៉ាត់ដល់កម្លាំងអាវុធហត្ថរាជធានីភ្នំពេញទាំងអស់ ត្រូវបន្តអនុវត្តតួនាទីភារកិច្ចឱ្យកាន់តែប្រសើរឡើង ដោយសហការជាមួយគណៈបញ្ជាការឯកភាពរាជធានី និងសមត្ថកិច្ចពាក់ព័ន្ធ ដើម្បីបង្ការ និងទប់ស្កាត់បទល្មើសគ្រប់ប្រភេទ។ ក្នុងនោះ ត្រូវផ្តោតសំខាន់លើបទល្មើសក្មេងទំនើង គ្រឿងញៀន ល្បែងស៊ីសងអនឡាញ និងការឆបោកតាមប្រព័ន្ធបច្ចេកវិទ្យា (Online Scam) នៅក្នុងភូមិសាស្ត្ររបស់ខ្លួន។

លោកបានសង្កត់ធ្ងន់ថា ដាច់ខាតហាមពាក់ព័ន្ធ សមគំនិត ឬលាក់បំបាំងបទល្មើសជាដាច់ខាត បើពុំនោះសោតនឹងត្រូវចាត់វិធានការតាមផ្លូវច្បាប់ ដោយគ្មានការលើកលែង ស្របតាមបទបញ្ជាដ៏ម៉ឺងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ព្រមទាំងការណែនាំរបស់លោកនាយឧត្ដមសេនីយ៍ សៅ សុខា និងលោក ឃួង ស្រេង អភិបាលរាជធានីភ្នំពេញ៕