រដ្ឋមន្ត្រីក្រសួងសុខាភិបាល ចាត់មន្ត្រីជាន់ខ្ពស់ ចុះពង្រឹងគុណភាពសេវាមន្ទីរពេទ្យបង្អែក នៅខេត្តត្បូងឃ្មុំ ដោយជំរុញឱ្យផ្តល់សេវាសុខាភិបាល ប្រកបដោយគុណភាព ប្រសិទ្ធភាព និងវិជ្ជាជីវៈខ្ពស់
23-05-2026 20:41
(ខេត្តត្បូងឃ្មុំ)៖ ដោយទទួលបានការណែនាំរបស់លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកបណ្ឌិត កែរ រដ្ឋា រដ្ឋលេខាធិការក្រសួងសុខាភិបាល និងលោកឱសថការី បាន បុត្តា អនុរដ្ឋលេខាធិការក្រសួងសុខាភិបាល បានអញ្ជើញចុះពង្រឹងគុណភាពសេវាមន្ទីរពេទ្យបង្អែកស្រុកចំនួន ៦នៅក្នុងខេត្តត្បូងឃ្មុំ។
មន្ទីរពេទ្យបង្អែកស្រុកទាំងនោះរួមមាន អូររាំងឪ, ព្រះនរោត្តមសីហនុ ត្បូងឃ្មុំ, ក្រូចឆ្មារ, តំបែរ, មេមត់ និងពញ្ញាក្រែក ចាប់ពីថ្ងៃទី១៨ដល់ថ្ងៃទី២២ខែមេសា ឆ្នាំ២០២៦ ។
ក្នុងឱកាសបំពេញបេសកកម្មនេះ លោកបណ្ឌិត កែរ រដ្ឋា បានពាំនាំនូវការផ្តាំផ្ញើសួរសុខទុក្ខពីលោកសាស្ត្រាចារ្យ រដ្ឋមន្ត្រី ជូនដល់ថ្នាក់ដឹកនាំមន្ត្រីរាជការ បុគ្គលិកមន្ទីរពេទ្យទាំងអស់ ដែលខិតខំប្រឹងប្រែង លះបង់ខ្ពស់ក្នុងការងារបំរើសេវាសុខាភិបាលជូនប្រជាពលរដ្ឋ ទទួលបានលទ្ធផលល្អប្រសើរ និងព្រមទាំងណែនាំដល់ថ្នាក់ដឹកនាំ មន្ត្រីរាជការ បុគ្គលទាំងអស់ ត្រូវបង្កើនការយកចិត្តទុកដាក់ ផ្តល់សេវាសុខាភិបាល ប្រកបដោយគុណភាព ប្រសិទ្ធភាព ប្រកបដោយវិជ្ជាជីវៈ ជូនប្រជាពលរដ្ឋដោយសមធម៌ និងបន្តស្មារតីសាមគ្គីភាពផ្ទៃក្នុង គោរពវិន័យការងារ ប្រកាន់ខ្ជាប់ខ្ជួននូវក្រមសីលធម៌វិជ្ជាជីវៈសុខាភិបាល មិនត្រូវរើសអើងអ្នកជំងឺណាម្នាក់ ជាពិសេសអ្នកជំងឺក្រីក្រ អ្នកជំងឺមានបណ្ណមូលនីធិសមធម៌ ងាយរងគ្រោះ ងាយហានិភ័យ ជនមានពិការភាព និងអ្នកជំងឺ ប.ស.ស -។ ល។
លោកបណ្ឌិត កែរ រដ្ឋា បានបញ្ជាក់ទៀតថា ក្រោមការដឹកនាំដ៏ឈ្លៀសវៃ និងប៉ិនប្រសប់របស់លោកសាស្ត្រាចារ្យ ឈាង រ៉ា មន្ត្រីក្រសួងសុខាភិបាល ក្នុអណ្ណតិរាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី វិស័យសុខាភិបាលបច្ចុប្បន្នមានការរីកចម្រើនជាទីមោទន: ។ ហើយក្នុងឆ្នាំ២០២៥កន្លងទៅនេះ រាជរដ្ឋាភិបាលបានផ្តល់ថវិកាសម្រាប់អភិវឌ្ឍមន្ទីរពេទ្យចំនួន៦១ កំរិត១ និងកំរិត២ អោយមានសមត្ថភាពផ្នែកវះកាត់ សង្គ្រោះបន្ទាន់ សង្រ្គោះទារក និងថែទាំអ្នកជំងឺធ្ងន់ធ្ងរ បង្ខិតសេវាសុខាភិបាលអោយកាន់តែកៀកនឹងប្រជាពលរដ្ឋ ដេីម្បីកាត់បន្ថយការបញ្ជូនទៅមន្ទីរពេទ្យថ្នាក់ជាតិ កាត់បន្ថយការចំណាយ និងពេលវេលារបស់ប្រជាពលរដ្ឋ ហើយនិងកាត់បន្ថយភាពក្រីក្រ៕
