(កំពង់ធំ)៖ លោកស្រី ឃួន ឃុនឌី ប្រធានក្រុមការងារចុះមូលដ្ឋានស្រុកកំពង់ស្វាយ បានជំរុញដល់សមាជិកសមាជិកាគណបក្សទាំងអស់ត្រូវតែសហការណ៍គ្នាឲ្យបានល្អ និងបន្តចុះជួបប្រជាពលរដ្ឋក្នុងមូលដ្ឋានដើម្បីបង្កើនភាពជឿជាក់និងស្និទ្ធស្នាល ព្រមទាំងផ្តល់ទំនុកចិត្តខ្ពស់និងភាពរឹងមាំរបស់សមាជិកសមាជិកាគណបក្ស។

លោកស្រី ឃួន ឃុនឌី បានថ្លែងក្នុងកិច្ចប្រជុំបូកសរុបលទ្ធផលការងារគណបក្សស្រុកប្រចាំខែឧសភាឆ្នាំ២០២៦ និងលើកទិសដៅអនុវត្តបន្ត នៅទីស្នាក់ការគណបក្សស្រុកកំពង់ស្វាយខេត្តកំពង់ធំ ថ្ងៃទី២៣ ខែឧសភា ឆ្នាំ២០២៦។

លោកស្រីសង្កត់ធ្ងន់ថា យើងត្រូវតែគិតគូរឲ្យបានខ្លាំងបំផុតចំពោះបញ្ហាកើតឡើងក្នុងមូលដ្ឋានទោះបីជាបញ្ហានោះតិចតួចក្តីដែលបង្កផលប៉ះពាល់ដល់សតិអារម្មណ៍ ដែលទាមទារដល់ថ្នាក់ពង្រឹងមូលដ្ឋានត្រូវតែយកចិត្តទុកដាក់ដើម្បីជៀសវាងបក្សប្រឆាំងយកមកវ៉ៃប្រហារបង្កផលប៉ះពាល់ដល់ថ្នាក់ដឹកនាំក៏ដូចជាគណបក្សប្រជាជនរបស់យើង។

លោកស្រីបន្តថា យើងត្រូវតែក្តាប់ឲ្យបាននូវក្រុមយុវជនគ្រប់អាយុបោះឆ្នោតក្នុងមូលដ្ឋានដើម្បីឲ្យពួកគាត់ទាំងបានចូលរួមជាមួយគណបក្សប្រជាជនកម្ពុជា ពីព្រោះយុវជនជាកំលាំងស្នូល កំលាំងរឺងមាំដែលមិនអាចខ្វះបានឡើយ។ ដើម្បីទាញយកប្រជាប្រិយភាពនេះបានលុះត្រាតែថ្នាក់ដឹកនាំបក្សឃុំទាំងអស់ត្រូវតែរួមសាមគ្គីគ្នា ឯកភាពផ្ទៃក្នុងឱ្យបានល្អទើបយើងអាចទាញយកបេះដូងពួកគាត់បាន។

លោកស្រី ឃួន ឃុនឌី ក៏បានជំរុញក្រុមការងារគណបក្សទាំងអស់ធ្វើសកម្មភាពទាំងថ្នាក់ស្រុកថ្នាក់ឃុំ និងថ្នាក់ភូមិទៅដល់មូលដ្ឋានផ្ទាល់ ដើម្បីសម្រួលសតិអារម្មណ៍ និងផ្តល់ភាពកក់ក្តៅ និងដោះស្រាយបញ្ហាជូនពួកគាត់បានទាន់ពេលវេលា។

លោកស្រីបានជម្រុញឲ្យសមាជិកបក្សទាំងអស់ត្រូវអប់រំប្រជាពលរដ្ឋកុំទៅធ្វើការនៅប្រទេសថៃ ដែលបង្កហានិភ័យខ្ពស់ដល់គ្រួសារនិងពន្យល់ឲ្យគាត់ធ្វើការងារក្នុងស្រុកជំនួសវិញ។

លើសពីនេះទៅទៀតលោកស្រី ឃួន ឃុនឌី បានជម្រុញឲ្យក្រុមការងារគណបក្សឃុំទាំងអស់ត្រូវតែក្តាប់ការងារខ្លួនឲ្យបានច្បាស់លាស់ពីព្រោះនៅថ្ងៃទី៣ ខែមិថុនា ឆ្នាំ២០២៦ ខាងមុខសម្តេចតេជោនិងមកប្រជុំសំណេះសំណាលជាមួយថ្នាក់ដឹកនាំឃុំ នៅសាលាខេត្តកំពង់ធំ៕