ពលរដ្ឋ និងយុវជន មកពីគ្រួសារក្រីក្រ និងងាយរងហានិភ័យជាង ៤ ០០០នាក់ នៅក្នុងខេត្តសៀមរាប ទទួលបានការបណ្ដុះបណ្ដាលជំនាញក្នុងកម្មវិធី១,៥លាននាក់របស់សម្ដេចធិបតី
24-05-2026 19:20
(សៀមរាប)៖ ប្រជាពលរដ្ឋ និងយុវជន ដែលមកពីគ្រួសារក្រីក្រ និងងាយរងហានិភ័យចំនួនជាង ៤ ០០០នាក់ ទទួលបានការបណ្ដុះបណ្ដាលជំនាញ នៅគ្រឹះស្ថានបណ្ដុះបណ្ដាលជំនាញចំនួន ២កន្លែងនៅក្នុងខេត្តសៀមរាប តាមរយៈកម្មវិធីវិធីបណ្តុះបណ្តាលជំនាញវិជ្ជាជីវៈ និងបច្ចេកទេស(TVET 1.5M) របស់សម្ដេចធិបតី។
គ្រឹះស្ថានបណ្ដុះបណ្ដាលជំនាញនៅក្នុងខេត្តសៀមរាបចំនួន២ ដូចជា វិទ្យាស្ថានពហុបច្ចេកទេសភូមិភាគតេជោសែនសៀមរាប (RPITSSR) និងវិទ្យាស្ថានពហុបច្ចេកទេសអង្គរ(NPIA) បានផ្ដល់ជូនការបណ្ដុះបណ្ដាលជំនាញចំពោះប្រជាពលរដ្ឋនៅក្នុងតំបន់ជាង ៤ ៣២១នាក់ និងចំនួន ២,១៣៦នាក់ ដែលជាយុវជនមកពីគ្រួសារក្រីក្រ និងងាយរងហានិភ័យ។ នេះបើគិតចាប់តាំងពីដើមឆ្នាំ២០២៤ រហូតមកត្រឹមត្រីមាសទី១ នៃឆ្នាំ២០២៦។
លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានសាទរចំពោះការកើនឡើងនៃតួលេខអ្នកចុះឈ្មោះ និងនៅតែបន្តអំពាវនាវដល់យុវជន ប្រជាពលរដ្ឋ និងអតីតពលករដែលវិលត្រឡ់មកពីប្រទេសថៃ ដែលមិនទាន់មានជំនាញ សូមចុះឈ្មោះ ដើម្បីទទួលបានការបណ្ដុះបណ្ដាលជំនាញ ដោយឥតគិតថ្លៃ អាចបង្កើនចំណូល ដើម្បីចាកចេញពីភាពក្រីក្រ។
គួរំលឹកដែរថា ចាប់តាំងពីការប្រកាសអនុវត្តនូវកម្មវិធី TVET 1.5M ដល់យុវជនគោលដៅមកពីគ្រួសារក្រីក្រ និងងាយរងហានិភ័យ កាលពីថ្ងៃទី១៥ ខែមករា ឆ្នាំ២០២៤ រហូតត្រឹមត្រីមាសទី១ ឆ្នាំ២០២៦នេះ សរុប ១៦៤,៦៧៧នាក់។ ក្នុងនោះមានអ្នកមានបណ្ណសមធម៍ ៧០,៧៨០នាក់ ដែលទទួលបានការបណ្ដុះបណ្ដាលជំនាញនៅទូទាំងប្រទេសកម្ពុជា៕
