(ភ្នំពេញ)៖ អគ្គនាយកដា្ឋនសេដ្ឋកិច្ចឌីជីថល នៃក្រសួងសេដ្ឋកិច្ច និងហិរញ្ញវត្ថុ នាថ្ងៃទី២៦ ខែឧសភា ឆ្នាំ២០២៦ បានរៀបចំសិក្ខាសាលាផ្សព្វផ្សាយ និងបណ្ដុះបណ្តាលស្តីពី «ប្រព័ន្ធវិក្កយបត្រអេឡិចត្រូនិកកម្ពុជា» ទៅកាន់ក្រុមហ៊ុន សហគ្រាស ក្នុងគោលបំណង ផ្សព្វផ្សាយបញ្ជ្រាបព័ត៌មាន ​ពីប្រព័ន្ធវិក្កយបត្រអេឡិចត្រូនិកកម្ពុជា ការចុះឈ្មោះជាសមាជិក និងរបៀបនៃការប្រើប្រាស់ផតថលវិក្កយបត្រអេឡិចត្រូនិកកម្ពុជា ជូនដល់វិស័យឯកជន ជាពិសេសក្រុមហ៊ុនដែលបាននិងកំពុងផ្គត់ផ្គង់ទំនិញ សេវាកម្ម សំណង់ជូនក្រសួង-ស្ថាប័នរដ្ឋ រួមទាំងក្រុមហ៊ុនដែលផ្ដល់សេវាកម្មសុហ្វវែរផ្នែកគណនេយ្យ ឬសុហ្វវែរគ្រប់គ្រងការចេញវិក្កយបត្រ ដើម្បីឱ្យក្រុមហ៊ុននីមួយៗត្រៀមលក្ខណៈ ក្នុងការផ្តល់កិច្ចសហការ និងចូលរួមអនុវត្តការប្រើប្រាស់ប្រព័ន្ធវិក្កយបត្រអេឡិចត្រូនិកកម្ពុជាឱ្យ បានជាអតិបរមា ទាំងការអនុវត្តជាកាតព្វកិច្ច និងការអនុវត្តដោយស្ម័គ្រចិត្ត។

​សិក្ខាសាលានេះ រៀបចំឡើង ក្រោមអធិបតីភាព លោកបណ្ឌិត តាំង ងួនលី អគ្គនាយកនៃអគ្គនាកដ្ឋានសេដ្ឋកិច្ចឌីជីថល,លោក អៀច សេដ្ឋា អគ្គនាយករងនៃអគ្គនាយកដ្ឋានសេដ្ឋកិច្ចឌីជីថល ​និងវត្តមានតំណាងអង្គភាពរដ្ឋ ក្រុមហ៊ុន សហគ្រាស គ្រឹះស្ថានឯកជន ក្រុមហ៊ុនធនាគារជាច្រើនរូប។

ថ្លែងក្នុងសិក្ខាសាលានេះ លោក អៀច សេដ្ឋា អគ្គនាយករងនៃអគ្គនាយកដ្ឋានសេដ្ឋកិច្ចឌីជីថល​ បានលើកឡើងថា ការចាប់ផ្តើមគិតគូរការអនុវត្ត ជាកាតព្វកិច្ចលើវិក្កយបត្រអេឡិចត្រូនិករវាងវិស័យឯកជននិងវិស័យឯកជន(B2B) ​នឹងត្រូវ កំណត់ជាយុទ្ធសាស្ត្រឱ្យបានរួចរាល់នៅក្នុងឆ្នាំ ២០២៦ នេះ ដើម្បីអាចចាប់ផ្តើមអនុវត្តបានជាបណ្តើរៗពីឆ្នាំ ២០២៧ តទៅ។

លោកបន្តថា សម្រាប់ការងារតភ្ជាប់សន្ធានកម្មជាមួយប្រព័ន្ធពាក់ព័ន្ធនៅ ក្នុងប្រព័ន្ធអេកូឡូស៊ីនៃវិក្កយបត្រ នៅតែបន្តសម្របសម្រួល និងជំរុញការតភ្ជាប់ និងអន្តរ ប្រតិបត្តិការទាំងប្រព័ន្ធរបស់រដ្ឋ និងប្រព័ន្ធរបស់ក្រុមហ៊ុន ដែលក្នុងនោះ សម្រាប់ប្រព័ន្ធរបស់រដ្ឋ ប្រព័ន្ធអេឡិចត្រូនិកពន្ធដារ ជាអាទិភាព និងបានចាប់ផ្តើមធ្វើការជាមួយគ្នាចាប់ពីឆ្នាំ ២០២៦ នេះតទៅ។

​លោកបណ្ឌិត តាំង ងួនលី អគ្គនាយកនៃអគ្គនាកដ្ឋានសេដ្ឋកិច្ចឌីជីថល ​បានសង្កេតឃើញ​នូវកំណើនប្រើប្រាស់ វិក្កយបត្រអេឡិចត្រូនិក ដោយការស្ម័គ្រចិត្តតាមប្រព័ន្ធវិក្កយបត្រអេឡិចត្រូនិកកម្ពុជា​ រវាងក្រុមហ៊ុននិងក្រុមហ៊ុនជាប្រភេទឯកជន-ឯកជន (B2B – Business-to-Business) និង ការសម្រេចបានជោគជ័យលើការតភ្ជាប់សន្ធានកម្ម រវាងប្រព័ន្ធវិក្កយបត្រអេឡិចត្រូនិកកម្ពុជា ជាមួយប្រព័ន្ធរបស់ក្រុមហ៊ុនផ្តល់សេវាសុហ្វវែរគណនេយ្យចំនួន ៧ កាលពីឆ្នាំ២០២៥ កន្លង ទៅនេះ។

លោកមានប្រសាសន៍ថា ការអភិវឌ្ឍប្រព័ន្ធវិក្កយបត្រអេឡិចត្រូនិកកម្ពុជា គឺជាផ្នែកមួយនៅក្នុងរបៀបវារៈនៃការកសាងថ្នាលឌីជីថលគ្រឹះ គាំទ្រដល់ការអភិវឌ្ឍសេដ្ឋកិច្ចនិងធុរកិច្ចឌីជីថលកម្ពុជា ដែលបានតម្រង់ទិស ចេញពីក្របខ័ណ្ឌគោលនយោបាយសេដ្ឋកិច្ច និង សង្គមឌីជីថលកម្ពុជា សំដៅរួមចំណែក គាំទ្រដល់ការរីកលូតលាស់នៃអាជីវកម្ម និងការចូលរួមធ្វើទំនើបកម្មបច្ចេកវិទ្យាហិរញ្ញវត្ថុ ដែលកំណត់នៅក្នុងគោលនយោបាយអភិវឌ្ឍបច្ចេកវិទ្យាហិរញ្ញវត្ថុ។

ជាមួយគ្នានេះ ប្រព័ន្ធវិក្កយបត្រអេឡិចត្រូនិកកម្ពុជា ក៏នឹងបន្តចូលរួមគាំទ្រដល់ គោលដៅនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី ៤ របស់រាជរដ្ឋាភិបាលកម្ពុជា ដែលផ្តោតលើការលើកកម្ពស់ប្រសិទ្ធភាព តម្លាភាព និងគណនេយ្យភាពក្នុងការចំណាយថវិការដ្ឋ ដោយមិនតម្រូវឱ្យក្រុមហ៊ុនផ្គត់ផ្គង់បញ្ជូនវិក្កយបត្រជាក្រដាសទៅអង្គភាពរដ្ឋទៀតឡើយ ព្រមទាំងមានភាពប្រទាក់ក្រឡាជាមួយផែនការសកម្មភាពនៅក្នុងយុទ្ធសាស្ត កៀរគរចំណូលរបស់រដ្ឋាភិបាលផងដែរ។

សូមជម្រាបថា ប្រព័ន្ធវិក្កយបត្រអេឡិចត្រូនិកកម្ពុជាបានដាក់ឱ្យដំណើរការជាផ្លូវការ ចាប់តាំងពីខែមករា ឆ្នាំ២០២៥កន្លងទៅ និងបានឆ្លងកាត់ការដាក់ឱ្យប្រើប្រាស់ជាកាតព្វកិច្ច សម្រាប់ការចេញវិក្កយបត្រអេឡិចត្រូនិក លើការផ្គត់ផ្គង់ជូនអង្គភាពថ្នាក់កណ្តាលនៃក្រសួង ស្ថាប័នរដ្ឋចំនួន ១៤ រួចហើយ ជាប្រភេទឯកជន-រដ្ឋ (B2G ) និងគ្រោងក្នុងការពង្រីកការអនុវត្តជាកាតព្វកិច្ចទៅក្រសួង ស្ថាប័នចំនួន ១៤ បន្ថែមទៀត ក្នុងត្រីមាសទី២ ឆ្នាំ២០២៦ ឆាប់ៗនេះ៕