(កំពង់ឆ្នាំង)៖ ជនសង្ស័យម្នាក់ដែលជាប់ចោទពីបទ «ទន្ទ្រាន ហ៊ុមព័ទ្ធ រុករាន ឈូសឆាយព្រៃលិចទឹក» នៅចំណុចស្មោញ ស្ថិតក្នុងភូមិពាមឆ្កោក ឃុំពាមឆ្កោក ស្រុកជលគីរី ខេត្តកំពង់ឆ្នាំង កាលពីថ្ងៃទី២១ ខែឧសភា ឆ្នាំ២០២៦ ត្រូវបានចៅក្រម នៃសាលាដំបូងខេត្តកំពង់ឆ្នាំង សម្រេចបញ្ជូនខ្លួនទៅដាក់ពន្ធនាគារ នៅថ្ងៃទី២៣ ខែឧសភា ឆ្នាំ២០២៦ រួចរាល់ហើយ។ ដោយឡែកករណីខាងលើ កំពុងបន្តនីតិវិធីបន្ថែមទៀត ពាក់ព័ន្ធនឹងម្ចាស់ត្រាក់ទ័រចំនួន ៣ គ្រឿង ដែលសមត្ថកិច្ចបានរឹបអូសក្នុងប្រតិបត្តិការបង្ក្រាប។

នេះបើយោងតាមការបញ្ជាក់របស់លោក ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង នៅព្រឹកថ្ងៃទី២៥ ខែឧសភា ឆ្នាំ២០២៦។

លោកព្រះរាជអាជ្ញាខេត្តកំពង់ឆ្នាំង បានបន្តថា ការអនុវត្តច្បាប់យ៉ាងម៉ឺងម៉ាត់ខាងលើនេះ ធ្វើឡើងក្នុងគោលបំណងទប់ស្កាត់ចំពោះសកម្មភាពបំផ្លិចបំផ្លាញធនធានធម្មជាតិ ក្នុងបឹងទន្លេសាប ជាពិសេសការឈូសឆាយដីព្រៃលិចទឹក ដែលជាកត្តាស្លាប់រស់របស់វិស័យជលផលដែលត្រូវបានកំណត់នៅក្នុងច្បាប់ស្ដីពីជលផលថា ជាដែននេសាទដែលត្រូវថែរក្សាការពារយ៉ាងម៉ឺងម៉ាត់បំផុត ដើម្បីធានាកុំឲ្យវិនាសបាត់បង់។

ករណីខាងលើនេះដែរ បច្ចុប្បន្នសំណុំរឿងនេះកំពុងស្ថិតក្រោមការចាត់ការបន្តរបស់ស្ថាប័នតុលាការ ដើម្បីស្វែងរកអ្នកពាក់ព័ន្ធជាម្ចាស់ត្រាក់ទ័រ ៣គ្រឿងផ្សេងទៀត យកមកអនុវត្តតាមផ្លូវច្បាប់។ ពាក់ព័ន្ធនឹងសំណុំរឿង ក្នុងតំបន់២ និងតំបន់៣ ក្នុងភូមិសាស្ត្រខេត្តកំពង់ឆ្នាំង កន្លងមកនេះមានជនជាប់ចោទជិត ១០នាក់ហើយ ត្រូវបានតុលាការចាត់ការតាមផ្លូវច្បាប់ និងបញ្ជូនទៅឃុំខ្លួននៅពន្ធនាគារ។

លោកព្រះរាជអាជ្ញាបានសង្កត់ធ្ងន់ថា សាលាដំបូងខេត្តកំពង់ឆ្នាំង នឹងបន្តអនុវត្តនីតិវិធី យ៉ាងតឹងតែង និងស្រាវជ្រាវរកអ្នកពាក់ព័ន្ធទាំងអស់ ដើម្បីយកមកផ្តន្ទាទោសតាមច្បាប់ ដោយមិនអនុញ្ញាតឲ្យជនខិលខូចណាម្នាក់រួចផុតពីសំណាញ់ច្បាប់បានឡើយ៕