(ព្រះវិហារ)៖ លោក ឃិត សុធារ៉ា អភិបាលស្រុកឆែប និងជាប្រធានគណៈបញ្ជាការឯកភាពរដ្ឋបាលស្រុក នៅថ្ងៃទី២៥ ខែឧសភា ឆ្នាំ២០២៦ បានដឹកនាំកម្លាំងគណៈបញ្ជាការឯកភាពរដ្ឋបាលស្រុក ចុះត្រួតពិនិត្យ និងស្រាវជ្រាវទីតាំងសង្ស័យពាក់ព័ន្ធបទល្មើស ការឆបោកតាមប្រព័ន្ធបច្ចេកវិទ្យា នៅតំបន់ជិតជុំវិញទឹកធ្លាក់ព្រះនិមិត្ត តាមបណ្តោយព្រំដែនកម្ពុជា-ឡាវ បន្ទាប់ពីមានប្រជាពលរដ្ឋរាយការណ៍អំពីសកម្មភាពគួរឲ្យសង្ស័យនៅក្នុងមូលដ្ឋាន។

ប្រតិបត្តិការនេះ ធ្វើឡើងតាមបទបញ្ជា និងការណែនាំដោយផ្ទាល់ពីលោក គីម រិទ្ធី អភិបាលខេត្តព្រះវិហារ និងជាប្រធានគណៈបញ្ជាការឯកភាពរដ្ឋបាលខេត្ត ក្នុងគោលបំណងពង្រឹងការត្រួតពិនិត្យ និងបង្ក្រាបបទល្មើស ការឆបោកតាមប្រព័ន្ធបច្ចេកវិទ្យា នៅតាមតំបន់ព្រំដែន និងទីតាំងសង្ស័យនានា ក្នុងភូមិសាស្ត្រខេត្តព្រះវិហារ។

ក្នុងប្រតិបត្តិការនោះ លោកអភិបាលស្រុកឆែប និងកម្លាំងចម្រុះ ក៏បានបន្តចុះពិនិត្យទីតាំងមួយកន្លែង ស្ថិតនៅភូមិកំពង់សង្កែ ឃុំកំពង់ស្រឡៅ១ ស្រុកឆែប ខេត្តព្រះវិហារ ដែលត្រូវបានអ្នកសារព័ត៌មាន ចុះផ្សាយកាលពីថ្ងៃទី១៩ ខែឧសភា ឆ្នាំ២០២៦ ថា ជាទីតាំងជួញដូរជនជាតិចិន និងជាកន្លែងឆ្លងដែនខុសច្បាប់។

ក្រោយការចុះពិនិត្យជាក់ស្តែង ក្រុមការងារមិនបានរកឃើញសកម្មភាពខុសច្បាប់ ឬវត្តមានជនបរទេសដូចការចុះផ្សាយនោះឡើយ។ ដោយឡែក ចំពោះរបងស័ង្កសីដែលព័ទ្ធនៅខាងមុខផ្ទះមួយកន្លែង លោកអភិបាលស្រុកឆែប បានណែនាំឲ្យម្ចាស់ទីតាំងរុះរើចេញ ដើម្បីបង្កភាពងាយស្រួលក្នុងការត្រួតពិនិត្យ និងរក្សាសណ្តាប់ធ្នាប់ ហើយម្ចាស់ទីតាំងក៏បានយល់ព្រមអនុវត្តតាមការណែនាំផងដែរ។

ជាលទ្ធផលនៃការចុះត្រួតពិនិត្យពេញមួយថ្ងៃ ដែលដឹកនាំដោយលោក ឃិត សុធារ៉ា អភិបាលស្រុកឆែប គឺមិនបានរកឃើញវត្តមានក្រុមជនបរទេស ឬជនជាតិចិន លាក់ខ្លួន និងប្រព្រឹត្តសកម្មភាពពាក់ព័ន្ធបទល្មើសការឆបោកតាមប្រព័ន្ធបច្ចេកវិទ្យា នៅក្នុងភូមិសាស្ត្រខាងលើនោះទេ។

លោក ឃិត សុធារ៉ា បានថ្លែងបញ្ជាក់ថា អាជ្ញាធរស្រុកឆែប និងកម្លាំងពាក់ព័ន្ធ នឹងបន្តអនុវត្តវិធានការតាមដាន ស្រាវជ្រាវ និងបង្ក្រាបបទល្មើស ការឆបោកតាមប្រព័ន្ធបច្ចេកវិទ្យា ឲ្យបានម៉ឺងម៉ាត់ ដោយមិនអនុគ្រោះចំពោះសកម្មភាពខុសច្បាប់ណាមួយឡើយ។ ជាមួយគ្នានេះ លោកក៏បានអំពាវនាវដល់ប្រជាពលរដ្ឋឲ្យចូលរួមសហការជាមួយអាជ្ញាធរ ដោយរាយការណ៍ជាបន្ទាន់ ប្រសិនបើប្រទះឃើញសកម្មភាពសង្ស័យ ឬបទល្មើសពាក់ព័ន្ធ ការឆបោកតាមប្រព័ន្ធបច្ចេកវិទ្យា ដើម្បីឲ្យសមត្ថកិច្ចអាចចាត់វិធានការបានទាន់ពេលវេលា។

សូមបញ្ជាក់ថា ការចុះត្រួតពិនិត្យនេះ ធ្វើឡើងស្របពេលដែលរាជរដ្ឋាភិបាលកម្ពុជា កំពុងបង្កើនវិធានការបង្ក្រាបបទល្មើស ការឆបោកតាមប្រព័ន្ធបច្ចេកវិទ្យា នៅទូទាំងប្រទេស ជាពិសេសនៅតាមតំបន់ព្រំដែន និងទីតាំងដែលអាចជាកន្លែងលាក់ខ្លួនរបស់ក្រុមឧក្រិដ្ឋជនអនឡាញ៕