បណ្ឌិតសេដ្ឋកិច្ចមួយរូប អង្កេតឃើញមានការលក់ភេសជ្ជៈផ្អែម ប្រហិត និងមីដល់កុមារ ដែលប៉ះពាល់សុខភាពយ៉ាងខ្លាំង (Video inside)
26-05-2026 14:27
(ភ្នំពេញ)៖ លោកស្រី ព្រុំ ទេវី បណ្ឌិតសេដ្ឋកិច្ចមកពីប្រទេសអាល្លឺម៉ង់ ដែលបានបង្រៀននៅកម្ពុជាជិត ៣០ឆ្នាំ បានអង្កេតឃើញមានការលក់ភេសជ្ជៈផ្អែម ប្រហិត និងមីដល់កុមារ ដែលបង្កផលប៉ះពាល់អវិជ្ជមានដល់សុខភាពយ៉ាងខ្លាំង។
ថ្លែងប្រាប់បណ្តាញព័ត៌មាន Fresh News នៅថ្ងៃទី២៦ ខែឧសភា ឆ្នាំ២០២៦ លោកស្រីបណ្ឌិត បានសំណូមពរឲ្យមានការអនុវត្តច្បាប់ស្តីពីសុវត្ថិភាពម្ហូបអាហារឲ្យបានតឹងតែង ដើម្បីសុខភាពកុមារ ដែលជាអនាគតនៃជោគវាសនារបស់ជាតិ។
ច្បាប់ស្តីពីសុវត្ថិភាពម្ហូបអាហារ គឺជាក្របខណ្ឌគតិយុត្តដែលកំណត់ពីយន្តការ គ្រប់គ្រង និងធានានូវគុណភាព អនាម័យ និងសុវត្ថិភាពនៃចំណីអាហារក្នុងគ្រប់ដំណាក់កាល។ ច្បាប់នេះមានគោលដៅសំខាន់ក្នុងការការពារសុខភាពអ្នកប្រើប្រាស់ ទប់ស្កាត់ការបំពុល ឬការលាយសារធាតុគីមីខុសច្បាប់ និងលើកកម្ពស់ការប្រកួតប្រជែងដោយសុចរិត។
អត្ថន័យ និងខ្លឹមសារសំខាន់ៗនៃច្បាប់នេះ រួមមាន៖ ការគ្រប់គ្រងគ្រប់ខ្សែចង្វាក់ ពោលគឺការធានាសុវត្ថិភាពតាំងពីការផលិត ការកែច្នៃ ការវេចខ្ចប់ ការដឹកជញ្ជូន រហូតដល់ការចែកចាយដល់ដៃអ្នកប្រើប្រាស់ (កសិដ្ឋានដល់តុអាហារ) និងការការពារសុខភាពសាធារណៈ ដូចជា ការពារអាយុជីវិត និងសុខភាពអ្នកបរិភោគពីជំងឺនានា ដែលបណ្ដាលមកពីចំណីអាហារខ្វះអនាម័យ ឬមានសារធាតុពុល៕
ខាងក្រោមនេះជាវិដេអូ៖
