(តាកែវ)៖ សាលាដំបូងខេត្តតាកែវ និងអយ្យការអមសាលាដំបូងខេត្តតាកែវ នៅព្រឹកថ្ងៃទី២៦ ខែឧសភា ឆ្នាំ២០២៦ បានរៀបចំកិច្ចប្រជុំស្តីពីការអនុវត្តប្រឆាំងការឆបោកតាមប្រព័ន្ធបច្ចេកវិទ្យាក្រោមវត្តមានលោក ធាម ច័ន្ទពិសិដ្ឋ ប្រធានសាលាដំបូងខេត្តតាកែវ និងលោក ឯក ឆេងហួត ព្រះរាជអាជ្ញា នៃអយ្យការអមសាលាដំបូងខេត្តតាកែវ ព្រមទាំងមានការចូលរួមពីលោកស្នងការ មេបញ្ជាការកងរាជអាវុធហត្ថ ខេត្តតាកែវ និងមន្ត្រីនគរបាលយុត្តិធម៌ជាច្រើននាក់ទៀតផងដែរ។

នាឱកាសនោះលោក ធាម ច័ន្ទពិសិដ្ឋ បានបញ្ជាក់ថា កិច្ចប្រជុំដ៏មានសារៈសំខាន់នេះត្រូវបានរៀបចំឡើងក្នុងគោលបំណងពង្រឹងកិច្ចសហការ និងលើកកម្ពស់ប្រសិទ្ធភាពការងាររវាងស្ថាប័នតុលាការ អយ្យការ និងកងកម្លាំងប្រដាប់អាវុធទាំងពីរ ប្រភេទ (នគរបាល និងអាវុធហត្ថ) ដែលជាមន្ត្រីនគរបាលយុត្តិធម៌ ក្នុងការបង្ក្រាប និងទប់ស្កាត់បទល្មើសបច្ចេកវិទ្យា ជាពិសេសសកម្មភាពឆបោកតាមប្រព័ន្ធអនឡាញ ដែលកំពុងតែបង្កការខូចខាតដល់ទ្រព្យសម្បត្តិ និងប៉ះពាល់ដល់សន្តិសុខសណ្តាប់ធ្នាប់សង្គម ។

ក្នុងឱកាសនោះលោក ឯក ឆេងហ៊ួត ព្រះរាជអាជ្ញាអមសាលាដំបូងខេត្តតាកែវ បានជំរុញ និងណែនាំដល់មន្ត្រីនគរបាលយុត្តិធម៌ទាំងអស់ ត្រូវបន្តយកចិត្តទុកដាក់ ស្រាវជ្រាវ និងក្តាប់ឱ្យបានរាល់ល្បិចកលថ្មីៗ របស់ក្រុមឧក្រិដ្ឋជន ដើម្បីចាត់វិធានការច្បាប់ឱ្យបានម៉ឺងម៉ាត់ ហ្មត់ចត់ និងទាន់ពេលវេលា សំដៅការពារសុវត្ថិភាព និងផលប្រយោជន៍ស្របច្បាប់របស់ប្រជាពលរដ្ឋនៅក្នុងខេត្តតាកែវទាំងមូល៕