(ភ្នំពេញ)៖ កម្ពុជាអាចលាតដៃសម្រាប់សន្តិភាព ការគោរពគ្នាទៅវិញទៅមក និងចំពោះមិត្តភាពដែលស្មោះត្រង់ពិតប្រាកដតែប៉ុណ្ណោះ។ ប៉ុន្តែ សន្តិភាពអាចស្ថិតស្ថេរទៅបាន លុះត្រាតែព្រំដែនអន្តរជាតិត្រូវបានគោរពយ៉ាងពេញលេញ ហេដ្ឋារចនាសម្ព័ន្ធខុសច្បាប់ត្រូវបានដកចេញ និងរាល់សកម្មភាពទាំងអស់ត្រូវអនុលោមតាមច្បាប់អន្តរជាតិ និងកិច្ចព្រមព្រៀងអន្តរជាតិ រួមទាំងសន្ធិសញ្ញាបារាំង–សៀមផងដែរ។ នេះជាការលើកឡើងរបស់លោក អាន ប៉ាស្ទី អ្នកជំនាញច្បាប់អន្តរជាតិ ថ្លែងមកកាន់បណ្ដាញព័ត៌មាន Fresh News។

ក្នុងនាមអ្នកជំនាញច្បាប់អន្តរជាតិ លោក អាន ប៉ាស្ទី បានគូសបញ្ជាក់ថា កម្ពុជាសូមអំពាវនាវ និងទាមទារយ៉ាងម៉ឺងម៉ាត់ឱ្យប្រទេសថៃប្រគល់ដីកម្ពុជាទាំងអស់ ដែលបានកាន់កាប់ដោយខុសច្បាប់ត្រឡប់មកវិញ ដកចេញទៅវិញនូវហេដ្ឋារចនាសម្ព័ន្ធ និងសំណង់ខុសច្បាប់ទាំងអស់ត្រឡប់ទៅក្នុងទឹកដីថៃវិញ និងបញ្ឈប់រាល់សកម្មភាពដែលរំលោភលើអធិបតេយ្យភាព និងបូរណភាពទឹកដីនៃព្រះរាជាណាចក្រកម្ពុជា។

មិត្តភាពពិតប្រាកដរវាងប្រទេសជិតខាងដែលល្អ មិនអាចកសាងឡើងក្នុងរូបភាពនៃការបដិសេធឬ សកម្មភាពឯកតោភាគី ឬការមិនគោរពកាតព្វកិច្ចផ្លូវច្បាប់បានឡើយ។ មិត្តភាពនោះ ត្រូវតែឈរលើភាពស្មោះត្រង់ក្នុងទំនាក់ទំនងអន្តរជាតិ ការគោរពសន្ធិសញ្ញា ការកសាងទំនុកចិត្តគ្នាទៅវិញទៅមក និងការប្រកាន់ខ្ជាប់នូវគោលការណ៍នៃធម្មនុញ្ញអង្គការសហប្រជាជាតិ សាមគ្គីភាពអាស៊ាន និងការរួមរស់ដោយសន្តិសហវិជ្ជមាន។ នេះជាការបញ្ជាក់បន្ថែមពីលោក អាន ប៉ាស្ទី។

ជាការពិតណាស់ កម្ពុជានៅតែបន្តប្តេជ្ញាចិត្តចំពោះសន្តិភាព ការទូត និងស្ថិរភាពក្នុងតំបន់។ លោកជឿជាក់ថា ការគោរពច្បាប់អន្តរជាតិ គឺជាមាគ៌ាតែមួយគត់ដើម្បីស្តារទំនុកចិត្តនៅតាមព្រំដែន ពង្រឹងមិត្តភាពទ្វេភាគី រឹងមាំសាមគ្គីភាពអាស៊ាន និងរក្សាកិត្តិយសចំពោះសហគមន៍អន្តរជាតិ។ ការកសាងអនាគតរួមគ្នាមួយប្រកបដោយសន្តិភាព ត្រូវការការពិត ភាពស្មោះសរ និងការគោរពអធិបតេយ្យភាពរបស់គ្នាទៅវិញទៅមក៕