(កំពង់ឆ្នាំង)៖ បុរសម្នាក់មានមុខរបរជាអ្នកបើករថយន្តដឹកកម្មកររោងចក្រ ត្រូវបានប៉ូលីសការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង ហៅមកធ្វើ ការអប់រំណែនាំ និងឲ្យធ្វើកិច្ចសន្យាបញ្ឈប់ការបើកបរ ល្មើស ច្បាប់ជាបន្តទៀត បន្ទាប់ពីបុរសជាតៃកុងរថយន្តដឹកកម្មកររូបនេះ បើកបរមិនគោរពច្បាប់ចរាចរណ៍ ដោយបានបើកបញ្ច្រាសទិស ដែលងាយនិងប្រឈមគ្រោះថ្នាក់ដល់អាយុជីវិតកម្មករកម្មការិនីរាប់សិបអ្នក ដែលបានផ្ញើអាយុជីវិត នៅលើបងប្អូនដែលជាតៃកុងរថយន្តតែម្នាក់ប៉ុណ្ណោះ។

បុរសជាតៃកុងរថយន្តដឹកកម្មកររោងចក្រខាងលើនេះ មានឈ្មោះ ថាច ប៉ោ អាយុ៥៧ឆ្នាំ មានទីលំនៅភូមិពពេលពក ឃុំគោកមន្ទាយ ស្រុករលាប្អៀរ ខេត្តកំពង់ឆ្នាំង ត្រូវបានសមត្ថកិច្ចកោះហៅមកធ្វើការអប់រំ នៅព្រឹកថ្ងៃទី២៦ ខែឧសភា ឆ្នាំ២០២៦ពាក់ព័ន្ធនឹងករណីដែលរូបគាត់បាន បើករថយន្តដែលមានដឹកកម្មករពេញរថយន្តហើយបើក បរបញ្ច្រាសទិសចូលគន្លងផ្នែកខាងស្ដាំរបស់គេ នៅលើផ្លូវជាតិលេខ៥ ត្រង់ចំណុចផ្សារព្រៃខ្មែរ ក្នុងស្រុករលាប្អៀរ កាលពីថ្ងៃទី២៥ ខែឧសភា ឆ្នាំ២០២៦កន្លងទៅនេះ ដែលជាហេតុមួយបណ្ដាលឱ្យមានហានិភ័យខ្ពស់ សម្រាប់ជីវិតកម្មកររាប់សិបអ្នកនៅលើរថយន្ត។

លោកវរសេនីយ៍ឯក លី ណា នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា បន្ទាប់ពីសមត្ថកិច្ចរបស់លោកបានធ្វើការអប់រំណែ នាំបុរសខាងលើនេះ បានទទួលកំហុស និងសុំការអធ្យាស្រ័យ និងយោគយល់ពីសមត្ថកិច្ច និងសាធារណជន នៅតាមបណ្ដាញសង្គមនូវរាល់កំហុសឆ្គងរបស់គាត់។

គាត់បានធ្វើកិច្ចសន្យាជាលាយល័ក្ខអក្សរ ដោយសន្យាបញ្ឈប់នូវរាល់សកម្មភាព ដែលជាអំពើខុសច្បាប់ចរាចរណ៍ ថែមទាំងបានសន្យាកំណត់ចំនួនកម្មករដែលជិះនៅលើរថយន្តរបស់គាត់ ទៅតាមច្បាប់កំណត់ផងដែរ។

លោកវរសេនីយ៍ឯក បានបន្តឲ្យដឹងទៀតថា ទន្ទឹមនឹងនោះដែរក្រុមការងារសមត្ថកិច្ចរបស់លោក ក៏បានសហការនៅតាមបណ្ដារដ្ឋបាលរោងចក្រសហគ្រាសទាំងអស់ ក្នុងខេត្តកំពង់ឆ្នាំង ដើម្បីធ្វើការអប់រំណែនាំ ដល់បងប្អូន ដែលមានរថយន្តដឹកកម្មករកម្មការិនីទាំងអស់ បើកបរត្រូវគោរពច្បាប់ចរាចរណ៍ជាចម្បង ចំណែកចំនួនកម្មករដែលត្រូវដឹក គឺត្រូវកំណត់ចំនួន ទៅតាមច្បាប់ឱ្យបានត្រឹមត្រូវដោយមិនត្រូវដឹកលើសចំនួននៅឡើយ ដែលនាំឲ្យបង្កគ្រោះថ្នាក់ដល់បងប្អូនកម្មករកម្មការិនី ដែលបានផ្ញើអាយុជីវិតមកលើតៃកុងរថយន្តគ្រប់រូប៕