(ក្រចេះ)៖ ក្រុមការងារអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) សហការជាមួយអាជ្ញាធរស្រុកស្នួល កាលពីថ្ងៃទី២៥ ខែឧសភា ឆ្នាំ២០២៦ បានចុះពិនិត្យទំនិញដាក់លក់នៅ ក្នុងភូមិសាស្ត្រស្រុកស្នួល ខេត្តក្រចេះ ដើម្បីពិនិត្យគុណភាពទំនិញ សុវត្ថិភាពចំណីអាហារ និងទប់ស្កាត់ការចរាចរទំនិញខូចគុណភាព ឬផ្ទុកសារធាតុហាមឃាត់ ដែលអាចបង្កផលប៉ះពាល់ដល់សុខភាពប្រជាពលរដ្ឋ។

ក្នុងប្រតិបត្តិការនេះ ក្រុមការងារចម្រុះបានធ្វើការត្រួតពិនិត្យលើផលិតផលចំណីអាហារ បន្លែ ផ្លែឈើ សាច់គ្រប់ប្រភេទ ភេសជ្ជៈ និងទំនិញប្រើប្រាស់មួយចំនួន​ ដោយផ្តោតសំខាន់លើ៖

*ទំនិញហួសកាលបរិច្ឆេទប្រើប្រាស់

*ទំនិញគ្មានប្រភពច្បាស់លាស់

*ផលិតផលផ្ទុកសារធាតុគីមីហាមឃាត់

*ទំនិញខូចគុណភាព និងអនាម័យមិនត្រឹមត្រូវ។

ជាលទ្ធផល ក្រុមការងារ បានរកឃើញទំនិញមួយចំនួនខូចគុណភាព និងហួសសុពលភាពប្រើប្រាស់ ហើយបានធ្វើការដកហូត និងណែនាំដល់អាជីវករអោយបញ្ឈប់ការដាក់លក់ជាបន្ទាន់ ព្រមទាំងអប់រំផ្សព្វផ្សាយអំពីច្បាប់ និងវិធានការសុវត្ថិភាពចំណីអាហារ ដើម្បីធានាការពារសុខភាពអ្នកប្រើប្រាស់។

ក្រុមការងាររបស់រដ្ឋបាលស្រុកស្នួល នឹងបន្តសហការជាមួយមន្ត្រីជំនាញពាក់ព័ន្ធ ចុះត្រួតពិនិត្យជាប្រចាំ ដើម្បីទប់ស្កាត់ និងបង្ក្រាបរាល់ទំនិញខូចគុណភាព និងទំនិញខុសច្បាប់ ដែលអាចប៉ះពាល់ដល់សុខភាព និងជីវភាពរស់នៅរបស់ប្រជាពលរដ្ឋ៕