(រតនគិរី)៖ នៅថ្ងៃទី២៥ ខែឧសភា ឆ្នាំ២០២៦ អាជ្ញាធរស្រុកអូរយ៉ាដាវ ដោយមានការចូលរួមពីកម្លាំងនគរបាល មេឃុំប៉ាតេ ដឹកនាំដោយអភិបាលរងស្រុកម្នាក់ បានចុះទៅពិនិត្យទីតាំងកើតហេតុពាក់ព័ន្ធករណីក្រុមហ៊ុន «ហ្គោលដេន ជេនើរេសិន អុិនវេសមុិន (ខេមបូឌា)ឯ.ក» ដែលធ្វើសកម្មភាពស្វែងរុករក (រ៉ែលោហៈ) ស្ថិតនៅក្នុងភូមិគងធំ ឃុំប៉ាតេ ស្រុកអូរយ៉ាដាវ ខេត្តរតនគិរី។

សកម្មភាពរុករករ៉ែរបស់ក្រុមហ៊ុន បានប៉ះពាល់ជាមួយប្រជាពលរដ្ឋចំនួន៤គ្រួសារ ដែលមានចម្ការដំឡូងមីនៅទីនោះ។ ហេតុការណ៍នេះកើតឡើងនៅថ្ងៃទី២៣ ខែឧសភា ឆ្នាំ២០២៦កន្លងទៅ។

ក្រុមការងារស្រុកបានរកឃើញសកម្មភាពស្វែងរុករករ៉ែរបស់ក្រុមហ៊ុន ពិតជាបានធ្វើឲ្យប៉ះពាល់ទម្រង់ដី និងខូចខាតដល់ដើមដំឡូងមីរបស់ប្រជាពលរដ្ឋដែលទើបដាំរួចចំនួន៤គ្រួសារ។ នៅរសៀលថ្ងៃទី២៥ ខែឧសភា ឆ្នាំ២០២៦ លោកអភិបាលស្រុកអូរយ៉ាដាវ បានអញ្ជើញមន្ត្រីមន្ទីររ៉ែ និងថាមពលខេត្តរតនគិរី និងក្រុមហ៊ុន បើកកិច្ចប្រជុំពិភាក្សាបញ្ហាដោះស្រាយនេះ។

អាជ្ញាធរស្រុក បានធ្វើការសំណូមពរស្នើសុំមន្ទីររ៉ែ និងថាមពលខេត្តរតនគិរី និងក្រុមហ៊ុននូវចំណុចមួយចំនួន៖

*មុនក្រុមហ៊ុនចុះធ្វើសកម្មភាព ត្រូវទំនាក់ទំនងសហការជាមួយអាជ្ញាធរមូលដ្ឋានឱ្យបានល្អ ដើម្បីធ្វើការផ្សព្វផ្សាយជូនដំណឹងដល់អ្នកភូមិដែលពាក់ព័ន្ធឲ្យបានទូលំទូលាយ
*ស្នើសុំក្រុមហ៊ុនផ្អាកសកម្មភាពនៅទីតាំងទាំង៤គ្រួសារ ដែលមានបញ្ហានេះសិន
*ចំពោះចំណុចដែលក្រុមហ៊ុនត្រូវស្វែងរុករក ក្នុងករណីប៉ះចំដីចម្ការប្រជាពលរដ្ឋ ក្រុមហ៊ុនត្រូវធ្វើការជជែកគ្នាជាមួយម្ចាស់ចម្ការឲ្យបានច្បាស់លាស់ និងត្រូវមានកិច្ចព្រមព្រៀងជាលាយលក្ខណ៍អក្សរ រវាងក្រុមហ៊ុន និងម្ចាស់ចម្ការជាមុនសិន មុននឹងក្រុមហ៊ុនចូលធ្វើសកម្មភាព៕