(សៀមរាប)៖ លោក សំកុល សុចិត្រា អភិបាលរងខេត្តសៀមរាប បានជំរុញដល់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត, ការិយាល័យរៀបចំដែនដីក្រុងស្រុក, អភិបាលក្រុងស្រុក និងមេឃុំចៅសង្កាត់ទាំងអស់ ត្រូវបន្តយកចិត្តទុកដាក់លើការងារប្រមូលពន្ធ បង្កើនកិច្ចសហការយ៉ាងជិតស្និទ្ធជាមួយសាខាពន្ធដារខេត្ត ដើម្បីឱ្យការប្រមូលពន្ធលើវិស័យអចលនទ្រព្យបានគ្រប់ជ្រុងជ្រោយ និងមានប្រសិទ្ធភាព។

ការថ្លែងយ៉ាងដូច្នេះរបស់លោក សំកុល សុចិត្រា នៅក្នុងពិធីបើកសិក្ខាសាលាផ្សព្វផ្សាយលើលិខិតបទដ្ឋានគតិយុត្តថ្មីៗ ពាក់ព័ន្ធទៅនឹងប្រភេទពន្ធមួយចំនួន នៅខេត្តសៀមរាប នាថ្ងៃទី២៦ ខែឧសភា ឆ្នាំ២០២៦នេះ ដោយមានការចូលរួមពីលោក ចៅ ម៉ៅមុន្នី ប្រធានសាខាពន្ធដារខេត្តសៀមរាប និងអាជ្ញាធរក្រុង ស្រុក ឃុំសង្កាត់ ព្រមទាំងភាគីពាក់ព័ន្ធជាច្រើនចូលរួមផងដែរ។

លោកក៏បានធ្វើការកោតសរសើរចំពោះថ្នាក់ដឹកនាំ ព្រមទាំងមន្ត្រីគ្រប់ជាន់ថ្នាក់នៃសាខាពន្ធដារខត្តសៀមរាប ដែលកន្លងមកបានខិតខំប្រឹងប្រែងយកអស់កម្លាំងកាយចិត្ត ប្រាជ្ញាស្មារតី និងការប្ដេជ្ញាចិត្តខ្ពស់ក្នុងការខិតខំបំពេញភារកិច្ចបម្រើជាតិមាតុភូមិរហូតសម្រេចបាននូវសមិទ្ធផលជោគជ័យគួរជាទីមោទនៈ។ ជាពិសេសសាខាពន្ធដារខេត្ត តែងតែបំពេញការងារយ៉ាងលឿនឆាប់រហ័ស ប្រកបដោយឆន្ទៈមោះមុត និងមានភាពបុរេសកម្ម ក្នុងការអនុវត្តការងារប្រកបដោយប្រសិទ្ធភាព។

លោក សំកុល សុចិត្រា សង្ឃឹមថា សិក្ខាសាលានាថ្ងៃនេះ នឹងផ្ដល់នូវការយល់ដឹងថ្មីៗបន្ថែមទៀត ជាពិសេសនោះ គឺលិខិតបទដ្ឋានគតិយុត្តថ្មីៗ ពាក់ព័ន្ធនឹងវិស័យអចលនទ្រព្យ ដើម្បីបន្តពង្រឹងកិច្ចសហការនៃការប្រមូលពន្ធរបស់អគ្គនាយកដ្ឋានពន្ធដារឱ្យបានគ្រប់ចំនួន ឬលើសពីផែនការដែលបានកំណត់និយាយជារួម និងនិយាយដោយឡែក នៅសាខាពន្ធដារខេត្តសៀមរាប ឱ្យអស់សក្ដានុពល និងចូលរួមផ្ដល់សេវាសាធារណៈពាក់ព័ន្ធ ជូនដល់ប្រជាពលរដ្ឋបានកាន់តែប្រសើរឡើងថែមទៀត។

លោក ចៅ ម៉ៅមុន្នី បានឲ្យដឹងថា សិក្ខាសាលានេះ ធ្វើឡើងគោលបំណងដើម្បីជំរុញដល់ការផ្សព្វផ្សាយបន្តជូនដល់អ្នកជាប់ពន្ធ និងសាធារណជន ឱ្យកាន់តែយល់ច្បាស់ពីប្រភេទពន្ធទាំងនេះ សម្រាប់ជាគុណប្រយោជន៍ដល់ថវិកាថ្នាក់ក្រោមជាតិ៕