(កំពង់ស្ពឺ)៖​ លោក ឈួ សុបញ្ញា រដ្ឋលេខាធិការក្រសួងធម្មការ និងសាសនា ជាសមាជិកក្រុមការងាររបស់រាជរដ្ឋាភិបាលចុះជួយខេត្តកំពង់ស្ពឺ និងព្រះរតនសោភ័ណ ម៉ន បឿន ព្រះវិន័យធរគណខេត្តកំពង់ស្ពឺ (ស្តីទី) និងជាព្រះចៅអធិការវត្តចំបក់ពោធិ៍ពាន់ នៅថ្ងៃទី២៨ ខែឧសភា ឆ្នាំ២០២៦នេះ បានអញ្ជើញ និងនិមន្តរៀបចំកម្មវិធីអប់រំសីលធម៌ ចរិយាធម៌ និងការគាំទ្រឥរិយាបថវិជ្ជមានរបស់សិស្ស ត្រូវផ្សព្វផ្សាយជូនដល់លោកគ្រូ អ្នកគ្រូ និងសិស្សានុសិស្សនៅវិទ្យាល័យ ហ៊ុន សែន ចំបក់ចំនួន ២៩០នាក់។

ពិធីនេះមានការចូលរួមពីប្រធានការិយាល័យអប់រំស្រុក, លោក សួង សាវ៉ន តំណាងមន្ទីរធម្មការ និងសាសនា ខេត្តកំពង់ស្ពឺ នាយកសាលា លោកគ្រូ អ្នកគ្រូ នៃវិទ្យាល័យ ហ៊ុន សែនចំបក់ ជាច្រើនរូបទៀត។

លោក ឈួ សុបញ្ញា បានគូសបញ្ជាក់ទៅកាន់លោកគ្រូ អ្នកគ្រូ និងសិស្សានុសិស្ស ថាកម្មវិធីផ្សព្វផ្សាយនេះធ្វើឡើងដើម្បីឱ្យសិស្សានុសិស្សមានឱកាសទទួលចំណេះដឹង និងប្រតិបត្តិតាមមាគ៌ាព្រះពុទ្ធសាសនា។ សិស្សានុសិស្សមានរបៀបរៀបរយ និងសណ្តាប់ធ្នាប់ល្អតាមក្រមសីលធម៌ សិស្សានុសិស្ស ក្លាយខ្លួនជាកូនល្អរបស់ឪពុក ម្តាយជាសិស្សល្អរបស់លោកគ្រូអ្នកគ្រូ ជាសមាជិកល្អរបស់សង្គម និងជាពុទ្ធសាសនិកល្អរបស់ព្រះពុទ្ធសាសនា។

មន្ត្រីជាន់ខ្ពស់ក្រសួងធម្មការ និងសាសនា បានថ្លែងថា ការយល់ដឹងអំពីបុណ្យបាប គុណទោស ជាពិសេសដើម្បីអប់រំពង្រឹងគុណធម៌ សុជីវធម៌ និងចរិយាធម៌ក្នុងសង្គមឱ្យចៀសផុតពីការប្រើប្រាស់គ្រឿងញៀន ទប់ស្កាត់អំពើហិង្សាក្នុងគ្រួសារ អំពើអនាចារ និងគ្រោះថ្នាក់ចរាចរណ៍ ហ្វឹកហាត់កាយវាចាចិត្តល្អ ក្នុងការរស់នៅប្រចាំថ្ងៃ។

ព្រះរតនសោភ័ណ ម៉ន បឿន មានសង្ឃដីកាថា ព្រះពុទ្ធសាសនាពិតជាបានរួមចំណែកច្រើនណាស់ជួយដល់សង្គមជាតិ ឬមនុស្សជាតិទាំងមូល ដោយបានដើរតួនាទីយ៉ាងសំខាន់ក្នុងការអប់រំចិត្ត ឬអប់រំសីលធម៌ គុណធម៌ សុជីវធម៌ និងចរិយាធម៌ក្នុងសង្គមខ្មែរ។ ជាក់ស្ដែងនៅក្នុងសង្គមបច្ចុប្បន្ននេះមានមនុស្សមួយចំនួន ពេលខ្លះព្រោះតែភាពលោភលន់ ព្រោះតែការគិតតែប្រយោជន៍ផ្ទាល់ខ្លួនធ្វើឱ្យលែងស្គាល់បុណ្យ បាប គុណទោស ខ្លះទៀតលែងស្គាល់បងប្អូន ឬឪពុកម្តាយជាដើម។ ព្រះពុទ្ធសាសនាតែងតែដើរតួរជួយពង្រឹង ជួយណែនាំ ជួយអប់រំដល់មនុស្សទាំងនោះឱ្យមានសេចក្តីភ្ញាក់រលឹកឡើងវិញ ចេះស្គាល់គុណទោស បុណ្យបាប ចេះឱ្យតម្លៃមនុស្សចេះគិតផលប្រយោជន៍រួមជាធំ និងចេះធ្វើអំពើល្អផ្សេងៗជាដើម។

ទន្ទឹមនឹងនេះ ព្រះរតនសោភ័ណ ម៉ន បឿន មានសង្ឃដីកាដោយមានក្តីសង្ឃឹមយ៉ាងមុតមាំថា កម្មវិធីអប់រំសីលធម៌តាមបែបព្រះពុទ្ធសាសនា ដែលបានប្រារព្ធឡើងនេះ នឹងរួមចំណែកយ៉ាងសំខាន់ក្នុងការដាស់តឿនស្មារតីប្អូនសិស្សានុសិស្ស ក្រើនរំលឹកដល់ប្អូនៗសិស្សានុសិស្សទាំងអស់ត្រូវចងចាំពុទ្ធឱវាទ ឬខ្លឹមសារអប់រំដ៏មានសារសំខាន់នាថ្ងៃនេះ ដើម្បីប្រើជាពន្លឺដាស់តឿនខ្លួនឯង ក៏ដូចជាមិត្តភក្តិនៅជុំវិញខ្លួនឱ្យក្លាយជាកូនល្អ សិស្សល្អ មិត្តល្អ និងពលរដ្ឋល្អទាំងនៅក្នុងសាលារៀន និងក្នុងសង្គម និងសូមសិស្សានុសិស្សទាំងអស់ចូលរួមគោរពច្បាប់ចរាចរណ៍ផ្លូវគោកឱ្យបានគ្រប់ៗគ្នា និងចៀសឆ្ងាយពីគ្រឿងញៀន ព្រោះគ្រឿងញៀនបំផ្លាញខ្លួនឯង គ្រួសារ និងសង្គមជាតិទាំងមូល៕