(ភ្នំពេញ)៖ ជនដៃដល់ដែលបានប្រេីកាំបិតចិតបន្លែ កាប់នារីជាសង្សារបណ្តាលឲ្យរងរបួសធ្ងន់ធ្ងរ នៅចំណុចបន្ទប់ជួលលេខ ៤១B ស្ថិតនៅភូមិជម្ពូវន័២ សង្កាត់ចោមចៅទី៣ ខណ្ឌពោធិ៍សែនជ័យ ត្រូវបានកម្លាំងការិល័យ ព្រហ្មទណ្ឌស្រាល បានសហការជាមួយអធិការដ្ឋានខណ្ឌពោធិ៍សែនជ័យ ស្រាវជ្រាវចាប់ហើយ នាយប់ថ្ងៃទី២៨ ខែឧសភា ឆ្នាំ២០២៦នេះ។

ការចាប់ជនដៃដល់បានធ្វើឡើងតាមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ។

នៅថ្ងៃទី២៨ ខែឧសភា ឆ្នាំ២០២៦ កម្លាំងការិយាល័យនគរបាលព្រហ្មទណ្ឌកម្រិតស្រាល ដឹកនាំដោយលោកឧត្តមសេនីយ៍ត្រី ប៊ុត សត្យា ស្នងការរង ទទួលផែនការងារនគរបាលព្រហ្មទណ្ឌ, លោកឧត្តមសេនីយ៍ទោ លី ប៊ុនអេង ស្នងការរងទទួលការិយាល័យនគរបាលព្រហ្មទណ្ឌកម្រិតស្រាល និងលោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងអធិការដ្ឋាននគរបាលពោធិ៍សែនជ័យ បានធ្វើការស្រាវជ្រាវឃាត់ខ្លួនជនដៃដល់។

ជនដៃដល់មានឈ្មោះ ឡុក ប៊ូណា អាយុ ១៩ឆ្នាំ មុខរបរបុគ្គលិកហាង មានទីលំនៅបន្ទប់ជួលលេខ៤១B ស្ថិតនៅភូមិជម្ពូវន័២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ ជននេះ ក្រោយប្រើហិង្សាលើសង្សាររបស់ខ្លួន បានរត់ទៅចងក តែមិនស្លាប់ ហើយបន្ទាប់មកត្រូវនគរបាលតាមចាប់បាន។

ដោយឡែកជនរងគ្រោះ មានឈ្មោះ ថា សូរិយា អាយុ២០ឆ្នាំ ជានិស្សិតឆ្នាំទី៣។

បច្ចុប្បន្នកម្លាំងការិយាល័យកំពុងសាកសួរតាមនីតិវិធី៕