(ភ្នំពេញ)៖ ធនាគារពិភពលោក (The World Bank) បានដាក់ចេញនូវរបាយការណ៍ស្តីពីការសិក្សាប្រៀបធៀបសម្រាប់
ការអភិវឌ្ឍហេដ្ឋារចនាសម្ព័ន្ធ ដែលបានគូសរំលេចនូវការពង្រឹងយន្តការភាពជាដៃគូរវាងរដ្ឋ និង ឯកជន នៅតាមបណ្តាប្រទេសកំពុងអភិវឌ្ឍន៍ជាច្រើន ក្នុងនោះប្រទេសកម្ពុជាត្រូវបានចាត់ទុកថា ជាប្រទេសដែលបានរៀបចំក្របខណ្ឌ និង បទប្បញ្ញត្តិសម្រាប់យន្តការភាពជាដៃគូរវាងរដ្ឋ និង ឯកជន យ៉ាងពេញលេញ និង គ្រប់ជ្រុងជ្រោយ។

ផ្អែកលើការសិក្សា និង ស្ថិតិ ដែលបានបង្ហាញនៅក្នុងរបាយការណ៍នេះ ការអនុវត្តគម្រោងភាពជាដៃរវាងរដ្ឋ និង ឯកជន នៅប្រទេសកម្ពុជា គឺបាន និង កំពុងឈានឆ្ពោះទៅកាន់ចំណុចដែលល្អប្រសើរជាបន្តបន្ទាប់។ ជាក់ស្តែង ស្ថិតិនៃការអនុវត្តយន្តការភាពជាដៃគូរវាងរដ្ឋ និង ឯកជន នៅកម្ពុជាត្រូវបានពង្រឹង និង មានពិន្ទុជារួមកើនឡើង គួរឱ្យកត់សម្គាល់ដូចមានបង្ហាញខាងក្រោម៖

តាមរបាយការណ៍ ការសិក្សារៀបចំគម្រោង មានចំនួន ២៦ ពិន្ទុ កាលពីកំឡុងឆ្នាំ ២០១៩ ដល់ឆ្នាំ ២០២២ និង មានចំនួន ៣៩ ពិន្ទុនៅឆ្នាំ ២០២៥។ ការដាក់ដេញថ្លៃគម្រោង មានចំនួន ៨ ពិន្ទុ កាលពីកំឡុងឆ្នាំ ២០១៩ ដល់ឆ្នាំ ២០២២ និង មានចំនួន ៥១ ពិន្ទុនៅឆ្នាំ ២០២៥។ ការគ្រប់គ្រងគម្រោង មានចំនួន ៧៦ ពិន្ទុ កាលពីកំឡុងឆ្នាំ ២០១៩ ដល់ឆ្នាំ ២០២២ និង មានចំនួន ៧៩ ពិន្ទុនៅឆ្នាំ ២០២៥ និងគម្រោងដែលផ្តួចផ្តើមដោយឯកជន មានចំនួន ១៧ ពិន្ទុ កាលពីកំឡុងឆ្នាំ ២០១៩ ដល់ឆ្នាំ ២០២២ និង មានចំនួន ៣៣ ពិន្ទុនៅឆ្នាំ២០២៥។

រាជរដ្ឋាភិបាលកម្ពុជាក៏បានបង្កើតនូវ មូលនិធិអភិវឌ្ឍន៍គម្រោង ដើម្បីគាំទ្រដល់ការរៀបចំគម្រោងភាពជាដៃគូរវាងរដ្ឋ និង ឯកជន និង ជំរុញដល់ការសិក្សារៀបចំគម្រោងរបស់ក្រសួងស្ថាប័នសាមី។

អ្នកជំនាញការរបស់ធនាគារពិភពលោក ក៏បានបង្ហាញអំពីជំនឿជឿជាក់យ៉ាងមុតមាំលើការរីកចម្រើនរបស់ប្រទេសកម្ពុជាក្នុងការរៀបចំអនុវត្តយន្តការភាពជាដៃគូរវាងរដ្ឋ និង ឯកជន ដែលនឹងជួយឱ្យប្រទេសកម្ពុជាពង្រឹងសមត្ថភាពរបស់ខ្លួន និង ពន្លឿនការអភិវឌ្ឍន៍វិស័យដឹកជញ្ជូន; វិស័យថាមពល; វិស័យទឹកស្អាត និង វិស័យហេដ្ឋារចនាសម្ព័ន្ធសំខាន់ៗ ផ្សេងទៀតទាំងក្នុងពេលបច្ចុប្បន្ន និង ទៅអនាគត៕