(ភ្នំពេញ)៖ កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ នៅថ្ងៃទី២៨-២៩ ខែឧសភា ឆ្នាំ២០២៦នេះ បានចុះធ្វើរដ្ឋបាល និងបង្ក្រាបទីតាំងលបលួចប្រព្រឹត្តបទល្មើស Online Scams នៅអគារខុនដូរ R&F ស្ថិតនៅភូមិព្រែកតានូ១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

ប្រតិបត្តិការនេះធ្វើឡើងដោយអនុវត្តតាមបទបញ្ជារបស់លោក ឃួង ស្រេង អភិបាល និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ ដែលមានការចូលរួមពី កម្លាំងស្នងការដ្ឋាននគរបាលរាជធានីភ្នំពេញ និងបញ្ជាការដ្ឋានកងរាជអាវុធហត្ថរាជធានីភ្នំពេញ ដោយមានការសម្របសម្រួលនីតិវិធីពី តំណាងអយ្យការ អមសាលាដំបូងរាជធានីភ្នំពេញ។

ក្នុងរង្វង់កិច្ចប្រតិបត្តិការខាងលើ ក្រុមការងារចម្រុះបានរកឃើញបន្ទប់ជាប់ពាក់ព័ន្ធ អំពើឆបោកតាមប្រព័ន្ធបច្ចេកវិទ្យា សរុបចំនួន៣៧បន្ទប់ ក្នុងនោះ៖

* អគារ A១ មានចំនួន៥បន្ទប់
* អគារ A២ មានចំនួន១០បន្ទប់
* អគារ A៣ មានចំនួន៤បន្ទប់
* អគារ A៤ មានចំនួន៨បន្ទប់
* អគារ A៥ មានចំនួន៥បន្ទប់
* អគារ A៨ មានចំនួន២បន្ទប់
* អគារ A៩ មានចំនួន១បន្ទប់
* អគារ B១១ មានចំនួន២បន្ទប់។ សរុបមនុស្ស ចំនួន១៦នាក់ (ស្រី៣នាក់) ក្នុងជាប់ពាក់ព័ន្ធអំពើ Online Scams ចំនួន៩នាក់ (ស្រី១នាក់) ជនជាតិវៀតណាម និងជាប់ពាក់ព័ន្ធស្នាក់នៅខុសច្បាប់៧នាក់ (ស្រី២នាក់) ជនជាតិចិន៦នាក់ និងកូរ៉េខាងត្បូង១នាក់។

ដកហូតសម្ភារៈវត្ថុតាងរួមមាន៖ កុំព្យូទ័រ All in One ចំនួន២០៥គ្រឿង, ម៉ូនីទ័រ (Monitor) ចំនួន៤២គ្រឿង, ស៊ីភីយូ (CPU) ចំនួន២១គ្រឿង, កុំព្យូទ័រយួរដៃ ចំនួន៥៤គ្រឿង, ទូរស័ព្ទដៃ ចំនួន១១៤០គ្រឿង និងត្រាក្លែង ចំនួន៣ត្រា។ ចំពោះមនុស្ស និងសម្ភារៈវត្ថុតាងខាងលើ ប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធី។ ចំពោះទីតាំងបន្ទប់ជាប់ពាក់ព័ន្ធខាងលើ សម្រេចបិទឃ្លុំបេជាបណ្តោះអាសន្ន៕