(ឧត្តរមានជ័យ)៖ បុរសម្នាក់បានស្លាប់នៅកន្លែងកើតហេតុ ពេលកំពុងកាប់អុសនៅក្នុងព្រៃសម្រាប់ដុតយកដុតធ្វើធ្យូង ប៉ុន្តែចៃដន្យកាប់ប៉ះចំគ្រាប់មិនទាន់ផ្ទុះ បណ្តាលឱ្យផ្ទុះកក្រើកឡើងតែម្តងនៅក្នុងបរិវេណដងអូរ ស្ថិតក្នុងភូមិផ្អុង សង្កាត់កូនគ្រៀល ក្រុងសំរោង ខេត្តឧត្តរមានជ័យ។

លោកវរសេនីយ៍ឯក ហម ភិរម្យ អធិការនគរបាលក្រុងសំរោង បានថ្លែងឱ្យដឹងនៅព្រឹកថ្ងៃទី២៩ ខែឧសភា ឆ្នាំ២០២៦ថា ហេតុការណ៍ដ៏រន្ធត់នេះ បានកើតឡើងនៅវេលាម៉ោង៩៖៣០នាទីព្រឹកថ្ងៃម្សិលមិញ។ លោកថា ជនរងគ្រោះមានឈ្មោះ ក្តឹប ស្រៀត អាយុ២៨ឆ្នាំ មានទីលំនៅភូមិផ្អុង សង្កាត់កូនគ្រៀល ក្រុងសំរោង ខេត្តឧត្តរមានជ័យ។

អធិការក្រុងថ្លែងបញ្ជាក់ទៀតថា តាមការស្រាវជ្រាវ និងការបំភ្លឺពីសាច់ញាតិជនរងគ្រោះ មុនពេលកើតហេតុជនរងគ្រោះបានចេញពីផ្ទះទៅកាន់ទីតាំងខាងលើ ដើម្បីដើរកាប់ឆ្កាព្រៃ រកឈើ និងអុស សម្រាប់យកមកដុតធ្យូង។ លុះពេលកំពុងកាប់ឈើនៅចំណុចកើតហេតុ ស្រាប់តែកាប់ប៉ះចំគ្រាប់មិនទាន់ផ្ទុះមួយគ្រាប់ បណ្តាលឱ្យផ្ទុះយ៉ាងខ្លាំង និងឆក់យកជីវិតជនរងគ្រោះភ្លាមៗនៅនឹងកន្លែង។

ក្រោយទទួលបានព័ត៌មាន កម្លាំងប៉ុស្តិ៍នគរបាលរដ្ឋបាលកូនគ្រៀល បានចុះទៅពិនិត្យ និងធ្វើកោសល្យវិច័យជាក់ស្តែងនៅកន្លែងកើតហេតុ និងលំនៅឋានរបស់សព។

តាមការសន្និដ្ឋានរបស់សមត្ថកិច្ច ជនរងគ្រោះពិតជាបានកាប់ប៉ះគ្រាប់មិនទាន់ផ្ទុះ ដែលនៅសេសសល់ពីការបាញ់ឈ្លានពានរបស់ទាហានសៀមមកលើទឹកដីកម្ពុជា កាលពីអំឡុងខែកក្កដា និងខែធ្នូ ឆ្នាំ២០២៥ បណ្តាលឱ្យផ្ទុះស្លាប់យ៉ាងអាណោចអាធ័ម។

បច្ចុប្បន្ន សាកសពជនរងគ្រោះត្រូវបានក្រុមគ្រួសារ និងសាច់ញាតិដឹកយកមកតម្កល់ធ្វើបុណ្យតាមប្រពៃណីនៅគេហដ្ឋានខាងលើ៕