(កំពង់ធំ)៖ ការតម្កល់ជាចម្បងចំពោះការដឹកនាំកសាងជាតិឱ្យរីកចម្រើន ហើយផ្តល់អាទិភាព​ចំពោះ​​ជីវភាពរបស់ប្រជាពលរដ្ឋ បានធ្វើឱ្យប្រជាពលរដ្ឋពេញចិត្ត និងផ្តល់ការគាំទ្រ​ចំពោះ​គណ​បក្សប្រជាជនកម្ពុជា។ ការគាំទ្រមិនត្រឹមតាមរយៈការទម្លាក់សន្លឹកឆ្នោតឱ្យដឹងនាំប្រទេសជាតិ​ប៉ុណ្ណោះទេ តែក៏បានស្ម័គ្រចិត្តចូលរួមធ្វើសកម្មភាពជាមួយបក្ស ដើម្បីបានរួមចំណែកក្នុងកិច្ច​កសាង​ជាតិថែមទៀតផង។

ជាក់ស្តែងនៅព្រឹកថ្ងៃសុក្រ ទី២៩ ខែឧសភា ឆ្នាំ២០២៦​នេះ ប្រជាពលរដ្ឋស្រុកប្រាសាទបល្ល័ង្ក ខេត្ត​កំពង់ធំជិត៧ពាន់នាក់ បានស្ម័គ្រចិត្តចូលរួមជីវភាពនយោបាយជាមួយគណបក្សប្រជាជន​កម្ពុជា។ ពិធីប្រកាសបញ្ចូលសមាជិកថ្មីរបស់បក្សកំពុងកាន់អំណាចនេះ ត្រូវបានធ្វើឡើងយ៉ាង​មហោ​ឡារិក ក្រោមអធិបតីភាពលោកអ្នកឧកញ៉ា ទ្រី ភាព ប្រធានក្រុមការ​ងារ​គណ​បក្ស​ចុះ​មូល​ដ្ឋានស្រុកប្រាសាទបល្ល័ង្ក។ ពិធីនេះ ក៏មានការអញ្ជើញចូលរួមពីសំណាក់ក្រុមការងារ​បក្ស​​ថ្នាក់​ជាតិ និងនៅមូលដ្ឋានស្រុកប្រាសាទបល្ល័ង្ក។

នៅចំពោះមុខសមាជិកបក្សដែលបញ្ចូលថ្មី ជួសមុខឱ្យសម្តេចតេជោ ហ៊ុន សែន ប្រធានគណ​បក្សប្រជាជនកម្ពុជា, លោកអ្នកឧកញ៉ា ទ្រី ភាព បានថ្លែងស្វាគមន៍ប្រកបដោយភាពកក់ក្តៅ​បំផុតចំពោះសមាជិកបក្ស ដែលបានផ្តល់ការជឿទុកចិត្តចំពោះគណបក្សប្រជាជនកម្ពុជា ហើយ​ចូលរួមជីវភាពនយោបាយជាមួយបក្ស ដើម្បីប្រកៀកស្មាគ្នារួមចំណែកកសាងសង្គមកម្ពុជា។

លោកអ្នកឧកញ៉ា ទ្រី ភាព ចាត់ទុកការចូលរួមជីវភាពនយោបាយរបស់ប្រជាពលរដ្ឋស្រុក​ប្រា​សាទបល្ល័ង្កនាពេលនេះ បង្ហាញឱ្យឃើញច្បាស់នូវការជឿទុកចិត្តដ៏មុតមាំបំផុតចំពោះការដឹកនាំ​របស់​​សម្តេចតេជោ ហ៊ុន សែន សម្តេចមហាបវរធិបតី ហ៊ុន ម៉ាណែត និងថ្នាក់ដឹកនាំគណបក្ស​ប្រជាជនកម្ពុជា ដែលជាគណបក្សបានដឹកនាំរំដោះអាយុជីវិតប្រជាពលរដ្ឋពីរបបប្រល័យពូជ​សាសន៍ប៉ុលពត បញ្ចប់ភ្លើងសង្គ្រាមផ្ទៃក្នុង និងកសាងប្រទេសចេញពីសំណល់ផេះនៃភ្លើង​សង្គ្រាមឱ្យរីកចម្រើនដូចពេលបច្ចុប្បន្ន។

ដើម្បីតបស្នងនូវការជឿទុកចិត្តរបស់ប្រជាពលរដ្ឋស្រុកប្រាសាទបល្ល័ង្កលើគណបក្សប្រជាជនកម្ពុជា លោកអ្នកឧកញ៉ា ទ្រី ភាព ក្នុងនាមជាប្រធានគណៈពង្រឹងការងារនៅស្រុកប្រាសាទបល្ល័ង្ក ប្តេជ្ញាឆ្លើយតបនូវតម្រូវការនានារបស់ប្រជាពលរដ្ឋនៅស្រុកប្រាសាទបល្ល័ង្ក និងប្រឹងប្រែង​កសាង​នូវសមិទ្ធផលទាំងឡាយជាឧត្តមប្រយោជន៍ដល់ការរស់នៅប្រចាំថ្ងៃ។

តំណាងសមាជិកថ្មីរបស់គណបក្សប្រជាជនកម្ពុជា ដែលមានយុវជនទើបគ្រប់អាយុ​បោះឆ្នោត​ដែរ​នោះ បានឡើងប្តេជ្ញារក្សាការពាររាល់សមិទ្ធផលឡាយដែលបានកសាងដោយរាជរដ្ឋាភិបាល​កើតចេញពីគណបក្សប្រជាជនកម្ពុជា។ ប្តេជ្ញាគាំទ្រសម្តេចមហាបវរធិបតី ហ៊ុន ម៉ាណែត ជាបេក្ខ​ភាពនាយករដ្ឋមន្ត្រីនៅគ្រប់អាណត្តិ ហើយដើរតាមមាគ៌ា និងគោលនយោបាយគណបក្សប្រជា​ជន​កម្ពុជា ក្នុងបុព្វហេតុជាតិ និងកសាង ការពារជាតិមាតុភូមិ ព្រមទាំងចូលរួមបម្រើប្រជាជននៅ​មូល​ដ្ឋានឱ្យបានល្អប្រសើរ។

គណបក្សប្រជាជនកម្ពុជា បានក្លាយជាគណបក្សនយោបាយមានរចនាសម្ព័ន្ធដឹកនាំរឹងមាំបំផុត​នៅ​កម្ពុជានាពេលបច្ចុប្បន្ន ហើយទទួលបានការគាំទ្រខ្លាំងក្លាពីប្រជាពលរដ្ឋឱ្យដឹកនាំប្រទេស​ជាតិ ព្រោះតែការជឿជាក់លើសមត្ថភាពដឹកនាំ ហើយរំលេចឱ្យឃើញនូវសមិទ្ធផលជាច្រើន​នាពេលបច្ចុប្បន្ន។

ឈរលើមូលហេតុនៃជំនឿចិត្តលើការដឹកនាំ ការគិតគូរលើសុខទុក្ខរបស់ប្រជាពលរដ្ឋ និងសមិទ្ធ​ផលជាតិជាច្រើន ដែលគណបក្សប្រជាជនកម្ពុជានាំមកជូនជាតិ និងប្រជាជននេះហើយ ទើប​ជំរុញឱ្យប្រជាពល​​រដ្ឋ​ស្រុកប្រាសាទបល្ល័ង្កក្នុងចំនួនដ៏ច្រើនសម្រេចចិត្តចូលរួមជីវភាពនយោបាយ​ជា​មួយ​គណបក្សប្រជាជនកម្ពុជា។

ក្រៅពីផ្អែកលើហេតុផលស្នាដៃ និងសមិទ្ធផលកើតចេញពីការដឹកនាំរបស់ថ្នាក់ដឹកនាំគណបក្ស​ប្រជា​ជន​កម្ពុជាហើយនោះ ការយកចិត្តទុកដាក់ក្នុងកិច្ចអភិវឌ្ឍនៅមូលដ្ឋាន និងការយកចិត្តទុក​ដាក់ដោះស្រាយទុក្ខលំបាកនានារបស់ប្រជាពលរដ្ឋពីសំណាក់ក្រុមការងារគណៈពង្រឹងមូលដ្ឋាន ក៏ជាចំណែកជំរុញឱ្យពលរដ្ឋនៅស្រុកប្រាសាទបល្ល័ង្កស្ម័គ្រចិត្តចូលរួមសកម្មភាពជាមួយគណបក្សប្រជាជនដែរ។

យុវតី កុក ស្រីស្រស់ បានលើកឡើងថា ក្រោយពីបក្សប្រជាជនកម្ពុជា តែងតាំងជាប្រធានគណៈ​ពង្រឹងការងារនៅស្រុកប្រាសាទបល្ល័ង្ក លោកអ្នកឧកញ៉ា ទ្រី ភាព បានចូលរួមកសាងសមិទ្ធ​ផល​បន្តបន្ទាប់ក្នុងឃុំ។ សកម្មភាពរបស់លោកអ្នកឧកញ៉ា ក៏ជាហេតុជំរុញឱ្យកញ្ញាពេញចិត្តចំពោះ​គណ​បក្ស​ប្រជាជនកម្ពុជាដែរ។

ក្នុងឋានៈជាប្រធានគណៈពង្រឹងការងារនៅស្រុកប្រាសាទបល្ល័ង្ករបស់គណបក្សប្រជាជនកម្ពុជាលោកអ្នកឧកញ៉ា ទ្រី ភាព ក្រៅពីការចូលរួមជួយកសាងសមិទ្ធផលនានាហើយនោះ លោក​ក៏​បានផ្សារភ្ជាប់មនោសញ្ចេតនាជាមួយប្រជាពលរដ្ឋ ដោយដាក់ចេញកម្មវិធីចងដៃរាល់ប្រជាពល​រដ្ឋ​រៀប​អាពាហ៍ពិពាហ៍ដោយការមួយរោងចងដៃ១០០ដុល្លារ។ សម្រាប់ពលរដ្ឋមានសមាជិក​គ្រួសារទទួលមរណភាព ចូលរួមបុណ្យសព ២០ម៉ឺនរៀល និងអង្ករ៥០គីឡូក្រាម។

របាយការណ៍បង្ហាញថា មកដល់ពេលបច្ចុប្បន្ននេះ លោកអ្នកឧកញ៉ា បានចងដៃមង្គលការចំនួន ៤១៣គូ ចំណាយថវិកា ៤១,៣០០ដុល្លារ និងចូលរួមបុណ្យសព ៧៤០សព​ ចំណាយថវិកាជាង ១៤៨លានរៀល និងអង្ករជិត ៤ម៉ឺនគីឡូក្រាម។ តាមរយៈកម្មវិធីនេះ ជួយដោះស្រាយការលំបាក និងធ្វើឱ្យប្រជាពលរដ្ឋ​ស្រុក​ប្រាសាទបល្ល័ង្កពេញចិត្ត។

សូមបញ្ជាក់ថា ក្នុងកម្មវិធីនាព្រឹកមិញនេះ លោកអ្នកឧកញ៉ា បានចំណាយថវិកាសរុបប្រមាណ ៥២០.០០០.០០០រៀល។ កម្មវិធីត្រូវបានបិទបញ្ចប់ប្រកបដោយក្តីសប្បាយរីករាយ និងប្រកបដោយមេត្រីភាព៕