(កំពង់ធំ)៖ លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍ នៃគណៈកម្មការការពារ ទប់ស្កាត់ និងបង្ការបទល្មើសធនធានធម្មជាតិខេត្តកំពង់ធំ រួមជាមួយអាជ្ញាធរដែនដី សមត្ថកិច្ចជំនាញពាក់ព័ន្ធ ផ្សព្វផ្សាយសេចក្តីជូនដំណឹង ស្ដីពីរដូវបិទនេសាទ ឆ្នាំ២០២៦ ជូនដល់កងកម្លាំងចម្រុះ និងអាជ្ញាធរដែនដី។

ក្នុងពិធីនៅថ្ងៃទី២៩ ខែឧសភា ឆ្នាំ២០២៦នេះ លោកក៏បានប្រគល់ប្រេងឥន្ធនៈ ស្បៀងអាហារ គ្រឿងឧបភោគបរិភោគ ជូនដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលកំពុងប្រចាំការ ការពារទប់ស្កាត់ និងបង្ក្រាបបទល្មើសនេសាទ ប្រចាំទីបញ្ជាការស្រាលនៅឃុំពាមបាង ស្រុកស្ទោង និងទីបញ្ជាការស្រាលប្រចាំការនៅឃុំផាត់សណ្ដាយ ស្រុកកំពង់ស្វាយ នៅកោះក្របី តំបន់អភិរក្សអតីតឡូលេខ២ស្ទួនផងដែរ។

លោកអនុសេនីយ៍ឯក លុយ សុភាព នាយទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ប្រធានក្រុមប្រចាំការនៅទីបញ្ជាការស្រាល ឃុំពាមបាង និងលោកអនុសេនីយ៍ឯក ហែម ថន ប្រធានក្រុម ទីបញ្ជាការស្រាល ប្រចាំការនៅឃុំផាត់សណ្ដាយ និង​លោក​ ឡេង​ សុខ​ ប្រធាន​ក្រុម​ប្រឹក្សា​ឃុំ​ផាត់​សណ្តាយ​ ខេត្តកំពង់​ធំ​ បានឡើងរាយការណ៍អំពីសភាពការណ៍ទូទៅ និងលទ្ធផលស្តីពីការការពារ ទប់ស្កាត់ និងបង្ក្រាបបទល្មើសនេសាទខុសច្បាប់ក្នុងភូមិសាស្ត្រទទួលខុសត្រូវ នារយៈពេលកន្លងទៅ ជា​លទ្ធផល​ បទល្មើស​នេសាទ​ក្នុង​តំបន់​បឹង​ទន្លេ​សាប​ ក្នុង​ឃុំ​ពាម​បាង​ និងឃុំ​ផាត់​សណ្តាយ​ មានការ​ថយចុះពី៧០%​ ទៅ​៨០%​ ព្រមទាំងបានគូសបញ្ជាក់អំពីបញ្ហាប្រឈមមួយចំនួនដែលត្រូវធ្វើការដោះស្រាយ។

លោក​ ជិន​ សុីថា​ នាយ​ខណ្ឌ​រដ្ឋ​បាល​ជល​ផល​ ខេត្តកំពង់​ធំ​ បានឡើងអានសេចក្តី ជូនដំណឹងស្ដីពីរដូវបិទនេសាទឆ្នាំ ២០២៦ ដែលនឹងត្រូវចាប់ផ្ដើមអនុវត្តន៍ពីថ្ងៃទី១ ខែ​មិថុនា​ ដល់ថ្ងៃទី៣០ ខែកញ្ញា ឆ្នាំ២០២៦ រួមមាន ខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប កំពង់ធំ ព្រះវិហារ រតនគិរី មណ្ឌលគិរី ក្រចេះ ត្បូងឃ្មុំ កំពង់ចាម និងមួយផ្នែក នៃរាជធានីភ្នំពេញ និងខេត្តកណ្ដាល ដែលស្ថិតនៅខាងជើងខ្សែស្របទន្លេចតុមុខ។ ជាមួយគ្នានេះ លោក​ ជិន​ សុីថា បាន​បញ្ជាក់​បន្ថែម​ពី​ឧបករណ៍​នេសាទ​ ដែល​ប្រជានេសាទ​អាច​នេសាទ​បាន​ស្របច្បាប់​ មាន​ចំនួន​៤៩​មុខ​ ក្នុងរដូវ​បិទ​នេសាទ​នេះ​។

លោកឧត្តមសេនីយ៍ទោ សោម ស៊ុន បានថ្លែងអំណរគុណ ចំពោះកងកម្លាំងចម្រុះទាំងអស់ រួមជាមួយអាជ្ញាធរដែនដី និងប្រជាពលរដ្ឋ ដែលបានរួមគ្នាក្នុងការការពារធនធានមច្ឆជាតិ ដោយសហការជាមួយកងកម្លាំងចម្រុះក្នុងការផ្ដល់ព័ត៌មាន និងចូលរួមបង្ក្រាបបទល្មើសនេសាទខុសច្បាប់ ក្នុងរយៈពេលកន្លងទៅទទួលបានលទ្ធផលល្អប្រសើរ ធ្វើឲ្យទិន្នផលត្រីបានសម្បូរឡើងវិញ ដែលមជ្ឈដ្ឋានទូទៅមានការកោតសរសើរដល់កងទ័ព ដែលបានរួមចំណែកសហការជាមួយស្ថាប័នពាក់ព័ន្ធ ក្នុងការបង្ក្រាបបទល្មើសនេសាទខុសច្បាប់ ទទួលបានជោគជ័យ។

លោកបានប្រគល់ភារកិច្ចដល់អាជ្ញាធរដែនដី ស្ថាប័នជំនាញពាក់ព័ន្ធ ពិសេសជំនាញជលផល សូមមេត្តារួមគ្នាជាមួយកងកម្លាំងចម្រុះ បន្តការពារ ទប់ស្កាត់ និងបង្ក្រាបបទល្មើសនេសាទខុសច្បាប់ ឲ្យទទួលបានជោគជ័យបន្ថែមទៀត ពិសេសបន្តការពារឲ្យបានឡូត៍អភិរក្សពូជត្រី ដើម្បីរក្សាទុកឲ្យត្រីពងកូន នៅក្នុងរដូវវស្សាខាងមុខនេះ។ ជាមួយនោះដែរ ត្រូវរួមគ្នាក្នុងការអនុវត្តឲ្យបានជោគជ័យនៅសេចក្តី ជូនដំណឹងស្ដីពីរដូវបិទការនេសាទឆ្នាំ២០២៦ ឲ្យមានប្រសិទ្ធភាព។

លោកឧត្តមសេនីយ៍ទោសោម ស៊ុន បាននាំយកនូវប្រេងសាំង ចំនួន៧០០លីត្រ, អង្ករ ចំនួន២៥០គីឡូក្រាម, មីជាតិ ចំនួន១០កេស និងគ្រឿងឧបភោគបរិភោគមួយចំនួនទៀត ដែលជាអំណោយរបស់លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទីស្ដីការគណៈរដ្ឋមន្ត្រី និងជាប្រធានក្រុមការងាររបស់រាជរដ្ឋាភិបាលចុះមូលដ្ឋានខេត្តកំពង់ធំ ប្រគល់ជូនកងកម្លាំងចម្រុះ ដើម្បីបន្តសកម្មភាពការពារ ទប់ស្កាត់ និងបង្ក្រាបបទល្មើសនេសាទខុសច្បាប់ ដោយគ្មានការដកថយឡើយ៕