(បន្ទាយមានជ័យ)៖ កម្លាំងគណៈបញ្ជាការឯកភាពរដ្ឋបាលខេត្តបន្ទាយមានជ័យ នៅថ្ងៃទី២៩ ខែឧសភា ឆ្នាំ២០២៦នេះ បានចុះពិនិត្យរដ្ឋបាលទីតាំងចំនួន៤ ក្នុងភូមិសាស្ដ្រក្រុងប៉ោយប៉ែត ក្រែងមានការលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)។

ប្រតិបត្តិការនេះធ្វើឡើងដោយអនុវត្តតាមបទបញ្ជារបស់លោក អ៊ុំ រាត្រី អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត ក្រោមការសម្របសម្រួលពីលោក កើត វណ្ណារ៉េត ព្រះរាជអាជ្ញា នៃអយ្យការអមសាលាដំបូងខេត្ត និងដឹកនាំដោយលោក ប្រាក់ ប៉ូលី អភិបាលរងខេត្ត ដែលមានការចូលរួមពីសមាជិកក្រុមទី៤ ទទួលខុសត្រូវខេត្តបន្ទាយមានជ័យ កម្លាំងជំនាញស្នងការដ្ឋាននគរបាលខេត្ត កម្លាំងបញ្ជាការដ្ឋានកងរាជអាវុធហត្ថខេត្ត អាជ្ញាធរមូលដ្ឋាន។ ក្នុងនោះសមត្ថកិច្ចបានពិនិត្យរួមមាន៖

*ទីតាំងទី១ អគារកម្ពស់៤ជាន់ផ្ទាល់ដី មាន២០បន្ទប់ នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត រកឃើញមានជនបរទេសចំនួន២៧នាក់ ស្រី១៥នាក់ ជាជនជាតិឥណ្ឌូនេស៊ី (មានលិខិតឆ្លងដែន និងទិដ្ឋាការត្រឹមត្រូវ)។ ជនបរទេសខាងលើ បានសំណូមពរសមត្ថកិច្ចជំនាញជួយអន្ដរាគមន៍បញ្ជូនគាត់ទៅខេត្តសៀមរាប ដើម្បីធ្វើយ៉ាងណាបានត្រឡប់ទៅប្រទេសដើមវិញ។

តាមការសន្និដ្ឋានរបស់ក្រុមការងារ ជនបរទេសខាងលើ ពុំមានលទ្ធភាពទិញសំបុត្រធ្វើដំណើរ ដោយរង់ចាំការឧបត្ថម្ភពីក្រុមគ្រួសារ ដើម្បីបានត្រឡប់ទៅប្រទេសកំណើតវិញ ប៉ុន្ដែសមត្ថកិច្ចជំនាញមិនមានលទ្ធភាព ធ្វើតាមសំណូមពររបស់ពួកគាត់ទេ ដោយបានណែនាំពួកគាត់ឲ្យចាកចេញឱ្យបានឆាប់តាមដែលអាចធ្វើទៅបាន និងបានអប់រំម្ចាស់ទីតាំងអំពីច្បាប់ និងអនុក្រឹត្យលេខ០៣ និងបានឲ្យម្ចាស់ធ្វើកិច្ចសន្យា។

*ទីតាំងទី២ ផ្ទះជួលកម្ពស់២ជាន់ ១៩បន្ទប់ មានជនបរទេសចំនួន៦នាក់ ជាជនជាតិថៃ បានបញ្ជូនទៅអធិការដ្ឋាននគរបាលក្រុង ដើម្បីសាកសួរបន្ដនីតិវិធី ពុំមានសម្ភារ:សង្ស័យពាក់ព័ន្ធបទល្មើសស្កេម អប់រំ និងធ្វើកិច្ចសន្យា។

*ទីតាំងទី៣ ផ្ទះជួលកម្ពស់៤ជាន់ផ្ទាល់ដី មាន១៩បន្ទប់ ជាបន្ទប់ស្នាក់នៅ ពុំមានជនបរទេស មានតែជនជាតិខ្មែរស្នាក់នៅចំនួន៣៥នាក់ ស្រី១៥នាក់ ពុំមានសម្ភារៈសង្ស័យ អប់រំ ធ្វើកិច្ចសន្យា។

*ទីតាំងទី៤ មានកម្ពស់៣ជាន់ផ្ទាល់ដី នៅភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ពុំឃើញមានមនុស្សស្នាក់នៅ គ្មានសម្ភារៈសង្ស័យពាក់ព័ន្ធបទល្មើសស្កេម៕