(រតនគិរី)៖ លោក ញ៉ែម សំអឿន អភិបាលខេត្តរតនគិរី នៅរសៀលថ្ងៃទី២ ខែមិថុនា ឆ្នាំ២០២៦នេះ បានអញ្ជើញចែកវិញ្ញាបនបត្រសម្គាល់ម្ចាស់អចលនវត្ថុចំនួន ១,៦៨៦បណ្ណ ជូនប្រជាពលរដ្ឋចំនួន ៤ភូមិ គឺភូមិទុយ ចំនួន៣៩៨គ្រួសារ, ភូមិកប ចំនួន២៦៤គ្រួសារ, ភូមិលូតចំនួន ២៨៦គ្រួសារ និងភូមិប៉ាណល់ ចំនួន១៣៤គ្រួសារ ក្នុងឃុំទីងចាក់ ស្រុកបរកែវ។

ពិធីនេះមានការចូលរួមពីអភិបាលរងខេត្ត, កងកម្លាំងប្រដាប់អាវុធទាំង៣, លោក កង សា រឿន អភិបាលស្រុកបរកែវ, មេឃុំ មេភូមិ និងប្រជាពលរដ្ឋទាំង ៤ភូមិយ៉ាងច្រើនកុះករ។

បើតាមលោក លី ឧសភា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានឱ្យដឹងថា ក្រុមការងារចុះបញ្ជីដីធ្លីនៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានខិតខំអនុវត្តការងារយ៉ាងសកម្មប្រកបដោយយកការចិត្តទុកដាក់ និងស្មារតីទទួលខុសត្រូវលើវិស័យដីធ្លី។

ជារួមស្រុកបរកែវ ត្រូវបានបញ្ចប់ការវាស់វែង ដែលមានក្បាលដីចំនួន ១៥,២៧៣ក្បាលដី បានចុះបញ្ជីចេញបណ្ណចំនួន៦,២៨០ វិញ្ញាបនបត្រ ចែកបណ្ណរួចចំនួន ៣,៣២៩បណ្ណ និងត្រៀមបិទផ្សាយចំនួន០៦ ភូមិបន្តទៀត។

នាឱកាសនោះដែរ លោក ញ៉ែម សំអឿន បានសម្តែងនូវការ អបអរសាទរចំពោះប្រជាពលរដ្ឋជាម្ចាស់ដី ដែលកន្លងមកបានចូលរួមគ្រប់នីតិវិធីនៃការចុះបញ្ជីដីធ្លីមានលក្ខណៈជាប្រព័ន្ធជាមួយក្រុមការងារបច្ចេកទេសរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត រហូតឈានដល់ដំណាក់កាលនៃការចែកបណ្ណនាឱកាសនេះ។

លោកអភិបាលខេត្តបានបន្តថា ការចុះបញ្ជីដីធ្លីមានលក្ខណៈជាប្រព័ន្ធ គឺបានផ្តល់សារៈសំខាន់សម្រាប់ប្រជាពលរដ្ឋជាម្ចាស់ដី ក្នុងគោលដៅធានានូវភាពស្របច្បាប់ កាត់បន្ថយទំនាស់ដីធ្លី កាត់បន្ថយភាពក្រីក្រ ការប្រើប្រាស់ និងចាត់ចែងផ្សេងទៀតតាមដែលអាចធ្វើបាន។

ជាមួយគ្នា នេះក្នុងនាមរដ្ឋបាលខេត្ត លោក ញ៉ែម សំអឿន សម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងអនុវត្តការងាររបស់ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ក្រុមការងារចុះបញ្ជីដីធ្លីមានលក្ខណៈជាប្រព័ន្ធ និងយុវជនស្ម័គ្រចិត្ត ទោះបីកន្លងមកមានស្ថានភាពលំបាក ភ្លៀង ធ្លាក់ច្រើន ផ្លូវរអិល និងស្ថានភាពផ្សេងក្នុងគោលដៅជំរុញការចុះបញ្ជីដីធ្លីជូនប្រជាពលរដ្ឋ។

លោកអភិបាលខេត្ត បានផ្តាំផ្ញើដល់ប្រជាពលរដ្ឋ ក្រោយពីទទួលបានវិញ្ញាបនបត្រសម្គាល់ម្ចាស់អចលនវត្ថុរួច ត្រូវទុកដាក់ ឱ្យបានគង់វង្ស កុំឱ្យបាត់បង់ ឬខូច ត្រូវទុកកន្លែងដែលស្ងួត គ្មានសំណើម និងត្រូវធានាថាមានសុវត្ថិភាព។ ក្នុងករណីត្រូវលក់ទិញ ឬធ្វើអំណោយបន្ត ត្រូវអនុវត្តតាមនីតិវិធីសុរិយោដី និងសៀវភៅគោលបញ្ជីដីធ្លី ដោយត្រូវឆ្លងកាត់ការផ្ទេរកម្មសិទ្ធិ (កាត់ឈ្មោះ) តាមរយៈរដ្ឋបាលសុរិយោដី ដែលមានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត តាមរយៈអាជ្ញាធរឃុំ ការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុក៕