(សៀមរាប)៖ លោក សុខ ណារ៉េត អភិបាលស្រុកក្រឡាញ់ និងជាប្រធានគណៈបញ្ជាការឯកភាពស្រុក នៅថ្ងៃទី២ ខែមិថុនា ឆ្នាំ២០២៦នេះ បានដឹកនាំកម្លាំងគណៈបញ្ជាការឯកភាពស្រុក ចុះផ្សព្វផ្សាយច្បាប់ស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scmas) ព្រមទាំងពង្រឹងការអនុវត្តខ្លឹមសារអនុក្រឹត្យលេខ ០៣ អនក្រ.បក នៅតាមមូលដ្ឋាន។

ក្នុងឱកាសនោះ លោក សុខ ណារ៉េត បានលើកឡើងថា ការផ្សព្វផ្សាយនេះ កម្លាំងជំនាញបានចុះត្រួតពិនិត្យ និងណែនាំដល់ម្ចាស់ផ្ទះសំណាក់ចំនួន ២ទីតាំង និងម្ចាស់បន្ទប់ជួលចំនួន ១ទីតាំង ឱ្យបង្កើនការប្រុងប្រយ័ត្នខ្ពស់ ដោយត្រូវរួមសហការគ្នា ពិនិត្យឯកសារស្នាក់នៅឱ្យបានច្បាស់លាស់ ដើម្បីបង្ការ និងទប់ស្កាត់ពួកក្រុមឧក្រិដ្ឋជន ដែលអាចបន្លំខ្លួនមកជ្រកកោន និងប្រើប្រាស់ទីតាំងទាំងនោះសម្រាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅក្នុងភូមិសាស្ត្រស្រុកក្រឡាញ់។

‎លោកក៏បានសង្កត់ធ្ងន់ថា តាមរយៈវិធានការដុតដៃដុតជើងទាំងនេះ រដ្ឋបាលស្រុកក្រឡាញ់រំពឹងថា នឹងអាចកាត់បន្ថយហានិភ័យសន្តិសុខ និងធានាបាននូវបរិយាកាសរស់នៅប្រកបដោយសុវត្ថិភាពខ្ពស់ជូនដល់ប្រជាពលរដ្ឋ និងភ្ញៀវទេសចរជាតិ និងអន្តរជាតិ។

លោកបន្ថែមថា កាលពីថ្ងៃទី៣ ខែកុម្ភៈ ឆ្នាំ២០២៦កន្លងទៅ រដ្ឋបាលស្រុក បានបើកកិច្ចប្រជុំផ្សព្វផ្សាយខ្លឹមសារអនុក្រឹត្យលេខ ០៣ អនក្រ.បក ស្ដីពីការគ្រប់គ្រងសន្ដិសុខសុវត្ថិភាព តាមទីតាំងរស់នៅប្រមូលផ្ដុំ។ កិច្ចប្រជុំនេះ គឺដើម្បីធានាសន្ដិសុខ សុវត្ថិភាពសង្គម និងសណ្ដាប់ធ្នាប់សាធារណៈ ដោយមានការចូលរួមពីកងកម្លាំងប្រដាប់អាវុធ, មន្រ្តីរាជការ, ក្រុមប្រឹក្សាឃុំ, ម្ចាស់ផ្ទះសំណាក់, បន្ទប់ជួល, ផ្ទះជួល និងតំណាងវិហារសាសនានានាក្នុងស្រុក។

លោកបានបញ្ជាក់ថា ចាប់ពីថ្ងៃទី២៩ ខែមេសា រហូតដល់ថ្ងៃទី១១ ខែឧសភា ឆ្នាំ២០២៦ លោកបានដឹកនាំកម្លាំងចម្រុះចុះត្រួតពិនិត្យរថយន្តដឹកអ្នកដំណើរជនបរទេស ដែលធ្វើដំណើរឆ្ពោះមកកាន់ទឹកដីខេត្តសៀមរាប។ ប្រតិបត្តិការនេះ ត្រូវបានធ្វើឡើងនៅចំណុចក្បែរក្បាលស្ពានតាប៉ុន ដែលជាព្រំប្រទល់រវាងស្រុកក្រឡាញ់ ខេត្តសៀមរាប និងស្រុកព្រះនេត្រព្រះ ខេត្តបន្ទាយមានជ័យ៕