(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី០៣ ខែមិថុនា ឆ្នាំ២០២៦ បានចេញសេចក្តីប្រកាសព័ត៌មាន អំពីការប្រគល់វិញ្ញាបនបត្រសម្គាល់ម្ចាស់អចលនវត្ថុ ដំណាក់កាលទី១ ចំនួន ១,០៤៤បណ្ណ ជូនអតិថិជនគម្រោងឡេង ណាវ៉ាត្រា ផ្លូវជាតិលេខ៥១ ខេត្តកំពង់ស្ពឺ។

ក្រសួងសូមជម្រាបជូនអតិថិជនរបស់គម្រោងឡេង ណាវ៉ាត្រា ផ្លូវជាតិលេខ៥១ ដែលស្ថិតនៅភូមិស្តុកស្លាត និងភូមិត្រពាំងពោធិ៍ ឃុំភ្នំតូច ស្រុកសាមគ្គីមុនីជ័យ ខេត្តកំពង់ស្ពឺ ឱ្យបានជ្រាបថា ក្រសួងនឹងប្រគល់វិញ្ញាបនបត្រ សម្គាល់ម្ចាស់អចលនវត្ថុ ដំណាក់កាលទី១ ចំនួន ១,០៤៤បណ្ណ ជូនអតិថិជនដែលបានបង់ប្រាក់គ្រប់ ចំនួន១០០% ដូចមានឈ្មោះក្នុង បញ្ជីជូនភ្ជាប់មកជាមួយ ចាប់ពីថ្ងៃទី០៨ ដល់ថ្ងៃទី១៩ ខែមិថុនា ឆ្នាំ២០២៦ រៀងរាល់ម៉ោងធ្វើការ។

សូមលោក លោកស្រី អញ្ជើញមកទទួលបណ្ណកម្មសិទ្ធិ ដោយបំពេញលក្ខខណ្ឌដូចខាងក្រោម៖
១. អតិថិជនដែលជាម្ចាស់កម្មសិទ្ធិ ត្រូវអញ្ជើញមកដោយផ្ទាល់។ ក្នុងករណីជាទ្រព្យរួមប្តីប្រពន្ធ សូមអញ្ជើញមកទាំងពីរនាក់ប្តីនិងប្រពន្ធ។
២. សូមភ្ជាប់មកជាមួយនូវបង្កាន់ដៃទទួលពាក្យស្នើសុំផ្ទេរកម្មសិទ្ធិ (ច្បាប់ដើម) និងឯកសាររណបផ្សេងទៀតដែលអតិថិជននៅខ្វះ ក្នុងពេលដាក់ពាក្យស្នើសុំចុះបញ្ជីផ្ទេរកម្មសិទ្ធិកន្លងមក។

ទីតាំង៖ នៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ស្ពឺ៖ https://www.facebook.com/share/p/1EHtY9Nj3X/?mibextid=wwXIfr

ពេលវេលា៖ ចាប់ពីថ្ងៃទី០៨ ដល់ថ្ងៃទី១៩ ខែមិថុនា ឆ្នាំ២០២៦ រៀងរាល់ម៉ោងធ្វើការ៕