(ភ្នំពេញ)៖ លោក ប្រាក់ ដាវីដ រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២ ខែមិថុនា ឆ្នាំ២០២៦ បានអញ្ជើញដឹកនាំកិច្ច​ប្រជុំ​ពិភាក្សារៀបចំកម្មវិធី «ផ្សព្វផ្សាយវេទិកា និងពិព័រណ៍កសិកម្មកម្ពុជា (CAFE26)» ដោយមានការចូលរួមពី អង្គការស្បៀង និងកសិកម្មនៃ​សហ​ប្រជាជាតិប្រចាំកម្ពុជា(FAO) អង្គការសង្គមស៊ីវិល តំណាងក្រុម​ហ៊ុន​ឯកជន ដៃគូអភិវឌ្ឍន៍ និងអ្នកពាក់ព័ន្ធប្រមាណជិត១០០នាក់ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

លោក បានគូសបញ្ជាក់ថា កិច្ចប្រជុំនេះរៀបចំឡើង​ក្នុងគោលបំណងផ្សព្វផ្សាយវេទិកា និងពិព័រណ៍កសិកម្មកម្ពុជា (CAFE26) ដែលនឹងផ្តល់ឱកាសឱ្យអ្នកចូលរួមស្វែងយល់​ពីបច្ចេក​វិទ្យាទំនើបៗ ផ្លាស់ប្តូរបទពិសោធន៍ និងពង្រឹងកិច្ចសហការ​ដើម្បីជំរុញ​វិស័យកសិកម្មឱ្យកាន់តែរីកចម្រើន។

ទន្ទឹមនឹងនោះ លោក ប្រាក់ ដាវីដ បានលើកឡើងពីជោគជ័យ នៃ​ការ​រៀប​ចំព្រឹត្តិការណ៍ពិព័រណ៍នេះ កាលពីលើកទី១ ក្នុងឆ្នាំ២០២៥ ដែលសរបញ្ជាក់ឱ្យឃើញថាព្រឹត្តិការណ៍នេះ មិនត្រឹមតែជាការដាក់បង្ហាញផលិតផលនោះទេ ប៉ុន្តែជាឱកាសនៃការផ្លាស់ប្តូរគំនិត បង្កើតទំនាក់​ទំនងធុរកិច្ចថ្មីៗ និងពង្រឹងសមត្ថភាពប្រកួតប្រជែងទាំងក្នុងទីផ្សារ​ក្នុង​ស្រុក និងឆាកអន្តរជាតិ។ លោកសូមលើកទឹកចិត្តឱ្យអ្នក​ពាក់ព័ន្ធ​ទាំងអស់ បន្តចូលរួមគាំទ្រឱ្យបានច្រើនជាងឆ្នាំមុនបន្ថែមទៀត។

តាមគម្រោងព្រឹត្តិការណ៍ វេទិកាពិព័រណ៍កសិកម្ម​កម្ពុជា(CAFE26) ដែលដឹកនាំរៀបចំដោយក្រសួងកសិកម្ម រុក្ខា​ប្រមាញ់ និងនេសាទ (MAFF) និងដោយមានការចូលរួមសហការ​ពីក្រសួងស្ថាប័នពាក់ព័ន្ធ អង្គការស្បៀង និងកសិកម្មនៃ​សហ​ប្រជាជាតិ (FAO) ដៃគូអភិវឌ្ឍន៍ និងវិស័យឯកជននានា នឹងរៀបចំ​ប្រព្រឹត្តទៅនៅថ្ងៃទី២៣-២៥ ខែតុលា ឆ្នាំ២០២៦ ខាងមុខនេះ៕