(ភ្នំពេញ)៖ បណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នៅថ្ងៃទី៣ ខែមិថុនា ឆ្នាំ២០២៦ បានអញ្ជើញ ដឹកនាំកិច្ចប្រជុំ ប្រចាំខែ ដើម្បីពិនិត្យវឌ្ឍនភាពការងារ។

ក្នុងឱកាសនេះដែរ លោកបណ្ឌិតប្រតិភូ បានសំណេះសំណាល និង ចែករំលែកបទពិសោធពី ភាពជាអ្នកដឹកនាំជូនដល់ថ្នាក់ដឹកនាំ និង បុគ្គលិក មកពីគ្រប់នាយកដ្ឋានទាំងអស់ ដោយផ្តោតលើប្រធានបទ How To Lead When You’re Not in Charge * : Leading Beyond Titles ដែលក្នុងនោះ លោកបណ្ឌិតប្រតិភូក៏បាន ផ្តល់ទស្សនៈល្អៗ ដើម្បីចូលរួមចំណែកជាបច្ច័យសម្រាប់បុគ្គលិកទាំងអស់ ក្នុងការអភិវឌ្ឍ សមត្ថភាពវិជ្ជាជីវៈរបស់ខ្លួន និងការពង្រឹងសមត្ថភាពផ្ទាល់ខ្លួនថែមទៀត ដើម្បី ចូលរួម បំពេញការងារប្រកបដោយវិជ្ជាជីវៈ និងការទទួលខុសត្រូវ ។

ទន្ទឹមនេះ លោកបណ្ឌិតបានលើកទឹកចិត្តបុគ្គលិកទាំងអស់ ឱ្យបន្តខិតខំប្រឹងប្រែង ពង្រឹងសមត្ថភាពបន្ថែមទៀត លើភាពជា អ្នកដឹកនាំនិងការដឹកនាំខ្លួនឯងជាគំរូគេ ជាពិសេស ត្រូវបណ្តុះស្មារតីភាពជាអ្នកដឹកនាំខ្លួនឯង និងបុគ្គលិកក្រោមឱវាទ ដើម្បីអាចក្លាយជា អ្នកដឹកនាំបន្ត ចូលរួម អភិវឌ្ឍន៏ ស្ថាប័ន ឱ្យរីកចម្រើន ប្រកប ដោយនិរន្តរភាព។

ជាសរុបមក លោកបណ្ឌិតប្រតិភូក៏បាន ផ្តល់អនុសាសន៍គន្លឹះជាគតិល្អៗ សម្រាប់បុគ្គលិក យកទៅ អនុវត្តការងារ រួមមាន៖ "ភាពជាអ្នកដឹកនាំ គឺមិនអាស្រ័យលើឋានៈ តួនាទី ឬមុខតំណែងនោះទេ ភាពជាអ្នកដឹកនាំពិតប្រាកដ អាចចាប់ផ្ដើមជាមួយនឹងការអភិវឌ្ឍសមត្ថភាពខ្លួនឯង មានគំនិតការផ្ដួចផ្ដើម(initiative) និងជួយដល់មនុស្សនៅជុំវិញខ្លួនដែលកំពុងជួបការលំបាក"។ ត្រូវគិតគូរ ពីការផ្លាស់ប្តូរទម្លាប់មកធ្វើ ការងារដោយផ្តោតលើគុណភាពការងារ(work quality) ល្បឿនការងារ (speed of work) និងខិតខំធ្វើ ការងារឱ្យល្អពីមួយថ្ងៃទៅមួយថ្ងៃបន្តិចម្តងៗ ព្រមទាំងអភិវឌ្ឍខ្លួនជាប្រចាំ។

ជាចុងក្រោយ លោកបណ្ឌិតប្រតិភូបានណែនាំថា ការធ្វើកិច្ចការងារដែលជោគជ័យទៅបានត្រូវចេះធ្វើការជាក្រុម និងត្រូវចេះទទួលយកការកែលម្អ ដើម្បីភាពរីកចម្រើន សម្រាប់ស្ថាប័ន ក្នុងនោះត្រូវមានស្មារតីសុទិដ្ឋិនិយម ហេីយត្រូវហ៊ានបដិសេធចំពោះស្មរតីទុទិដ្ឋិនិយម ពោលបុគ្គលិកធ្វើការល្អ ARDB នឹងរីកចម្រើន មិនចាំបាច់មើលអ្វីច្រើននោះទេ មានន័យថា ភាពជាអ្នកដឹកនាំត្រូវធ្វើជាគំរូគេ ទើបអ្នកក្រោមឱវាទគេដើរតាមនឹងទទួលបានការគោរព ពីអ្នកដទៃ ហេីយធ្វេីឲ្យស្ថាប័នក៏កាន់តែរីកចម្រើនថែមទៀត៕