(ភ្នំពេញ)៖ ក្នុងវីដេអូនេះ ជាទិដ្ឋភាពនៃការដាំដុះដើមប្រេងខ្យល់ ការលូតលាស់ ការប្រមូលផលឈើ និងការកែច្នៃដើមប្រេងខ្យល់។ ទិដ្ឋភាពនេះ ស្ថិតនៅដីក្នុងភូមិសាស្ត្រស្រុកសំបូរ ខេត្តក្រចេះ និងស្រុកសៀមបូក ខេត្តស្ទឹងត្រែង ដែលជាទីតាំងវិនិយោគដាំដើមប្រេងខ្យល់ដោយក្រុមហ៊ុន​ហូលី​​ផ្លេន​​ថេសិន។

ក្រុមហ៊ុនហូលីផ្លេន​ថេ​សិន ទទួលបានសិទ្ធិពីរាជរដ្ឋាភិបាលអភិវឌ្ឍលើការដាំដើមប្រេងខ្យល់យក​ទៅ​កែច្នៃនៅ​លើផ្ទៃដី​ស្ថានីយផ្សព្វផ្សាយ ស្តារព្រៃឈើរបស់ក្រសួងកសិកម្ម រុក្ខាប្រមាញ់ និង​នេ​សាទ ក្នុងភូមិសាស្ត្រ​ស្រុក​សំបូរ ខេត្តក្រចេះ និងស្រុកសៀមបូក ខេត្តស្ទឹងត្រែង លើផ្ទៃដីសរុប​ទំហំ ៣៤,០០៧ហិក​តា។ ប៉ុន្តែផ្ទៃដីជាក់ស្តែងដែលក្រុមហ៊ុនអាចដាំដុះបានមានតែជាង ២ម៉ឺនហិក​តា​ប៉ុណ្ណោះ ដោយឡែកផ្ទៃដី​ជាង ១ម៉ឺនហិកតាទៀត ជាប់ពាក់ព័ន្ធនឹងផ្ទៃដីសហគមន៍ និងដីដែល​ប្រជា​ពលរដ្ឋបានកាន់កាប់។

ចាប់តាំងពីឆ្នាំ២០១៩មក ក្រុមហ៊ុន បានដាំដុះដើមប្រេងខ្យល់ជាបន្តបន្ទាប់នៅលើផ្ទៃស្ថិតក្នុងភូមិ​សាស្ត្រស្រុកសំបូរ ខេត្តក្រចេះ។ បច្ចុប្បន្នក្រុមហ៊ុន បានដាំដុះរួចរាល់លើផ្ទៃដីជាង ១ម៉ឺន ៣ពាន់​ហិកតា ហើយឈើខ្លះ ក៏អាចកាត់យកមកកែច្នៃបានហើយ។ ក្រុមហ៊ុនកំពុងបន្តដាំដើម​ប្រេង​ខ្យល់ថ្មីក្នុងភូមិសាស្ត្រស្រុកសៀមបូក ខេត្តស្ទឹងត្រែង លើផ្ទៃដីជាង ៤ពាន់ហិកតាបន្ថែមទៀត។

ដើមប្រេងខ្យល់ដែលដាំតាំងពីឆ្នាំ២០១៩មកនោះ បច្ចុប្បន្ននេះ ប្រមូលផលបាន​ជិត៣ពាន់ហិក​តា​ហើយ។ ឈើដែលប្រមូលផលនេះ ត្រូវបានយកទៅកែច្នៃជាក្តាបន្ទះ និងគ្រឿងសង្ហារឹម​ផ្សេងៗ​មួយចំនួនទៀត ក្នុងមួយឆ្នាំប្រើឈើពីចំការឈើដាំនេះ រង្វង់១០ម៉ឺនតោន។

ជាមួយនឹងការវិនិយោគដាំដើមប្រេងខ្យល់នេះ ក្រុមហ៊ុនក៏កំពុងរួមចំណែកជួយដល់សហគមន៍​តាម​រយៈសង់ផ្លូវ និងស្ពានជូនប្រជាពលរដ្ឋប្រើប្រាស់ ជាពិសេសបានផ្តល់ការងារជូនប្រជាពល​រដ្ឋ​ក្នុងតំបន់ដាច់ស្រយាលនេះ ឱ្យមានប្រាក់ចំណូលទៀងទាត់ តាមរយៈការងារដាំដុះ ថែទាំ ប្រមូលផល និងក្នុងរោងចក្រកែច្នៃ៕