(ភ្នំពេញ)៖ ក្នុងកិច្ចប្រជុំវាយតម្លៃការងារគ្រប់គ្រងធាតុ​ចូលកសិកម្ម នៅថ្ងៃទី៣ ខែមិថុនា ឆ្នាំ២០២៦ នៅអគ្គនាយកដ្ឋានក្សេត្រសាស្រ្ត នៃក្រសួងកសិកម្ម រុក្ខាប្រមាញ់ និងនេសាទ លោក គង់ ច័ន្ទវាសនា រដ្ឋលេខាធិការ ទទួលបន្ទុកធាតុចូលកសិកម្ម​ បានកោតសរសើរមន្ត្រីគ្រប់ជាន់ថ្នាក់ ដែលសម្រេចបានលទ្ធផលល្អប្រសើរក្នុងការគ្រប់គ្រងជី និងថ្នាំកសិកម្ម។

លោកបានគូសបញ្ជាក់ថា ការផ្គត់ផ្គង់ធាតុចូលកសិកម្មប្រកបដោយគុណភាព សុវត្ថិភាព និងតម្លៃសមរម្យ បានចូលរួមចំណែក​យ៉ាងសំខាន់ដល់ការរីកចម្រើននៃអនុវិស័យដំណាំ ការ​នាំចេញ និងការលើកកម្ពស់ជីវភាពរបស់បងប្អូនកសិករ។

លោក គង់ ច័ន្ទវាសនា បានកត់សម្គាល់សមិទ្ធផលការងារគ្រប់គ្រងធាតុចូលកសិកម្ម​ ក្នុងឆ្នាំ២០២៥កន្លងទៅ ដូចជា៖

*បានចុះត្រួតពិនិត្យដេប៉ូលក់ជី និងថ្នាំកសិកម្ម​ចំនួន ១​ ២៦២ទីតាំង នៅទូទាំងប្រទេស

*បានយកសំណាករាប់រយប្រភេទមកពិសោធន៍ និងអនុវត្តច្បាប់ម៉ឺងម៉ាត់ចំពោះផលិតផលខ្វះគុណភាពមួយចំនួនតូច

*បានទប់ស្កាត់ និងបង្ក្រាបការដឹកជញ្ជូនផលិតផលខុសច្បាប់ជាច្រើនករណីតាម​តំបន់ព្រំដែន

*បានបណ្តុះបណ្តាលអាជីវករថ្មីជិត ៦០០នាក់ សំណេះសំណាលជាមួយ​ម្ចាស់ដេប៉ូជាង ២​ ២០០នាក់ និងបណ្តុះបណ្តាល​មន្ត្រីកសិកម្មឃុំ ៥៩នាក់ អំពីបច្ចេកទេសកាត់បន្ថយថ្លៃដើម

*បានរៀបចំលិខិតបទដ្ឋានគតិយុត្តថ្មីៗ ដើម្បីពង្រឹងការគ្រប់គ្រងឱ្យកាន់តែល្អប្រសើរ

*បានតាមដាន​ និងចាត់វិធានការច្បាប់លើគណនីបណ្តាញសង្គមជាង ១០០ផេក ដែលលក់ផលិតផលគ្មានបញ្ជីកា

*បានផ្តល់ការគាំទ្រជាបន្តបន្ទាប់ដល់ក្រុមហ៊ុនផលិតជីធម្មជាតិក្នុងស្រុក។

ដើម្បីបន្តកាត់បន្ថយថ្លៃដើមផលិត បង្កើនការធានាគុណភាព និងការពារផលប្រយោជន៍កសិករ លោករដ្ឋលេខាធិការ បានផ្តល់អនុសាសន៍តម្រង់ទិសចំនួន៦ចំណុចសំខាន់ៗ រួមមាន៖

១៖ គាំទ្រក្រុមហ៊ុនក្នុងស្រុក៖ ផ្តល់ការគាំទ្រទាំងផ្លូវច្បាប់ និងបច្ចេកទេសដល់ការផលិតជីធម្មជាតិ ដើម្បីផ្គត់ផ្គង់ក្នុងតម្លៃសមរម្យ បង្កើតការងារ កាត់បន្ថយការនាំចូល និងជួយផ្នែកអនាម័យ-បរិស្ថាន​

២៖ រឹតបន្តឹងការត្រួតពិនិត្យគុណភាព៖ បន្តយកសំណាកទៅពិសោធន៍ និងពិន័យធ្ងន់ធ្ងរ ឬដកហូតបញ្ជីកាចំពោះផលិតផលដែលស្ទើរគុណភាព​

៣៖ ពង្រឹងអធិការកិច្ចតាមដេប៉ូ៖ ត្រួតពិនិត្យឱ្យបានតឹងរ៉ឹង ដើម្បីធានាថាដេប៉ូទូទាំងប្រទេសដាក់លក់តែផលិតផលស្របច្បាប់ និងមានសុវត្ថិភាព​

៤៖ គ្រប់គ្រងការផ្សព្វផ្សាយតាមអនឡាញ៖ ស្រាវជ្រាវ និងចាត់វិធានការច្បាប់ម៉ឺងម៉ាត់​ចំពោះផេកដែលលក់ផលិតផលខុសច្បាប់ ឬផ្សាយបំផ្លើសការពិត​

៥៖ ទប់ស្កាត់បទល្មើសតាមព្រំដែន៖ សហការជិតស្និទ្ធជាមួយអាជ្ញាធរមូលដ្ឋាន ដើម្បីបង្ក្រាបការដឹកជញ្ជូនផលិតផលខុសច្បាប់​

៦៖ អប់រំផ្សព្វផ្សាយដល់កសិករ៖ បន្តណែនាំប្រជាកសិករឱ្យប្រើប្រាស់តែផលិតផលដែលស្របច្បាប់៕