(ស្វាយរៀង)៖ ករណីរថយន្តដឹកកម្មករដាច់ហ្វ្រាំងក្រឡាប់នៅភូមិស្វាយចេក ឃុំស្វាយចេក ស្រុករំដួល ខេត្តស្វាយរៀង នាព្រឹកថ្ងៃទី៤ ខែមិថុនា ឆ្នាំ២០២៦នេះ បណ្ដាលឲ្យកម្មករកម្មការិនីរងរបួសចំនួន២៨នាក់ ក្នុងនោះធ្ងន់៥នាក់។

យោងតាមរបាយការណ៍សាខាកាកបាទក្រហមកម្ពុជាខេត្តស្វាយរៀង បានឲ្យដឹងថា ករណីគ្រោះថ្នាក់ចរាចរណ៍ក្រឡាប់រថយន្តដឹកកម្មករសរុប៣៧នាក់ បណ្ដាលឲ្យកម្មករកម្មការិនីរងរបួសសរុបចំនួន២៨នាក់ ក្នុងនោះ របួសធ្ងន់៥នាក់ នៅចំណុចខាងមុខសាលាបឋមសិក្សាម្រាក ស្ថិតនៅក្នុងភូមិម្រាក ឃុំស្វាយចេក ស្រុករំដួល ខេត្តស្វាយរៀង។

សូមបញ្ជាក់ថា រថយន្តជួបគ្រោះថ្នាក់ចរាចរណ៍នេះ ដឹកកម្មករកម្មការិនី មកពីភូមិបឹង ឃុំច្រេស ស្រុកមេសាងខេត្តព្រៃវែង។ បច្ចុប្បន្នក្រុមគ្រូពេទ្យ មន្ទីរពេទ្យបង្អែកសាមគ្គីស្រុករំដួល កំពុងព្យាបាលយ៉ាងយកចិត្តទុកដាក់។

ក្រោយពីកើតហេតុលោក ហែម ស៊ីណា អភិបាលស្រុករំដួល បានចុះទៅដល់មន្ទីរពេទ្យបង្អែកស្រុករំដួល ដើម្បីសួរសុខទុក្ខកម្មករ កម្មការិនី និងចូលរួមសោកស្ដាយនូវហេតុការណ៍ គ្រោះចរាចរណ៍ដែលកើតឡើងនេះផងដែរ៕