(កំពត)៖ អ្នកនាំពាក្យសាលាដំបូងខេត្តកំពត បានឲ្យដឹងថា កាលពីថ្ងៃ ទី១៩ ខែឧសភា ឆ្នាំ២០២៦ ក្រុមប្រឹក្សាជំនុំជម្រះ នៃសាលាដំបូងខេត្តកំពត បានបើកសវនាការជំនុំជម្រះលើ សំណុំរឿងព្រហ្មទណ្ឌលេខ៥៩១ ចុះថ្ងៃទី៧ ខែសីហា ឆ្នាំ២០២៥ ដែលមានជនជាប់ចោទឈ្មោះ WEI HUAN MO ជនជាតិចិន, ឈ្មោះ LIU LONG FU ជនជាតិចិន, ឈ្មោះ AYE AYE ជនជាតិភូមា,ឈ្មោះ ZHAO YANG LONG ជនជាតិចិន,ឈ្មោះ XIE SAN JIANG ជនជាតិចិន និងឈ្មោះ LIN XIN ជនជាតិចិន ក្រោមការចោទប្រកាន់របស់តំណាងអយ្យការពីបទ «ឃាតកម្មដោយមានទារុណកម្ម អំពើឃោរឃៅ» ប្រព្រឹត្តនៅចំណុចអគារមួយកន្លែង នៅចំណុចគីឡូម៉ែត្រ លេខ២៦ (លើភ្នំបូកគោ) ស្ថិតក្នុងភូមិរលួស សង្កាត់បឹងទូក ក្រុងបូកគោ ខេត្តកំពត កាលពីថ្ងៃទី៤ ខែសីហា ឆ្នាំ ២០២៥ បទល្មើសព្រហ្មទណ្ឌដែលមានចែង និងឱ្យផ្តន្ទាទោសតាមបញ្ញាត្តិ មាត្រា២០៥ នៃក្រមព្រហ្មទណ្ឌ។

ក្រោយពីការធ្វើកិច្ចពិភាក្សាដេញដោលលើជនជាប់ចោទ ភាគីពាក់ព័ន្ធ និងបានពិនិត្យភស្តុតាង អង្គហេតុ និងអង្គច្បាប់រួចមកឃើញថា មានភស្តុតាង និងពិរុទ្ធភាពគ្រប់គ្រាន់ លើជនជាប់ចោទទាំង៦នាក់ខាងលើ។ ហេតុដូច្នេះក្រុមប្រឹក្សាជំនុំជម្រះនៃសាលាដំបូងខេត្តកំពត បានប្រកាសជាសាធារណៈ នូវសាលក្រមព្រហ្មទណ្ឌ លេខ ៣២១ (គ) ចុះថ្ងៃទី៤ ខែមិថុនា ឆ្នាំ២០២៦ ដោយបានសម្រេចផ្តន្ទាទោសលើជនជាប់ចោទ ដូចខាងក្រោម ៖

១៖ ឈ្មោះ WEI HUAN MO ភេទប្រុស កើតថ្ងៃទី២៥ ខែកុម្ភៈ ឆ្នាំ១៩៨៤ ជនជាតិចិន
២៖ ឈ្មោះ LIU LONG FU ភេទប្រុស អាយុ២៥ឆ្នាំ ជនជាតិចិន
៣៖ ឈ្មោះ AYE AYE (អាយ អាយ) ភេទប្រុស កើតឆ្នាំ២០០៤ ជនជាតិភូមា
៤៖ ឈ្មោះ ZHAO YANG LONG ភេទប្រុស កើតថ្ងៃទី២២ ខែមេសា ឆ្នាំ១៩៨៧ ជនជាតិចិន
៥៖ ឈ្មោះ XIE SAN JIANG ភេទប្រុស កើតថ្ងៃទី៥ ខែឧសភា ឆ្នាំ១៩៩២ ជនជាតិចិន
៦៖ ឈ្មោះ LIN XIN ភេទប្រុស កើតថ្ងៃទី១៦ ខែឧសភា ឆ្នាំ១៩៩៣ ជនជាតិចិន

អ្នកទាំង៦នេះ ត្រូវបានដាក់ពន្ធនាគារកំណត់ក្នុងម្នាក់ៗ អស់មួយជីវិត ពីបទ «ឃាតកម្មដោយមានទារុណកម្ម អំពើឃោរឃៅ» ប្រព្រឹត្តនៅអគារមួយកន្លែង នៅចំណុចគីឡូម៉ែត្រលេខ២៦ (លើភ្នំបូកគោ) ស្ថិតនៅភូមិរលួស សង្កាត់បឹងទូក ក្រុងបូកគោ ខេត្តកំពត កាលពីថ្ងៃទី៤ ខែសីហា ឆ្នាំ២០២៥ បទល្មើសព្រហ្មទណ្ឌដែលមានចែង និងបញ្ញត្តិឱ្យ ផ្តន្ទាទោសតាម មាត្រា២០៥ នៃក្រមព្រហ្មទណ្ឌ ព្រមទាំងសម្រេចរឹបអូសវត្ថុដែលចាប់យកពាក់ព័ន្ធបទល្មើស ខាងលើផងដែរ៕