(កំពង់ឆ្នាំង)៖ ដោយមានការយកចិត្តទុកដាក់ និងដើម្បីកាត់បន្ថយចំពោះករណីគ្រោះថ្នាក់ចរាចរណ៍ដល់ប្រជាពលរដ្ឋដែលធ្វើចរាចរណ៍តាមផ្លូវ លោក ស៊ុន សុវណ្ណរិទ្ធិ អភិបាលខេត្តកំពង់ឆ្នាំង និងជាប្រធានគណៈបញ្ជាការឯកភាពរដ្ឋបាលខេត្ត បានចេញបទបញ្ជាយ៉ាងម៉ឹងម៉ាត់ដល់សមត្ថកិច្ច និងអាជ្ញាធរពាក់ព័ន្ធ ដោយត្រូវយកចិត្តទុកដាក់ពិនិត្យទៅលើយានយន្តគ្រប់ប្រភេទ ដែលធ្វើចរាចរណ៍នៅលើដងផ្លូវសាធារណៈ ក្នុងភូមិសាស្ត្រខេត្តកំពង់ឆ្នាំង ករណីការកែច្នៃខុសលក្ខណៈបច្ចេកទេសត្រូវអប់រំណែនាំដល់ម្ចាស់ អនុវត្តឲ្យបានត្រឹមត្រូវតាមច្បាប់ចរាចរណ៍ផ្លូវគោក។

ពិសេសណែនាំដល់ម្ចាស់យានយន្ត ត្រូវត្រួតពិនិត្យលក្ខណៈបច្ចេកទេសយានយន្តជាប្រចាំ (ឆៀក) គឺមានសារៈសំខាន់ដើម្បីធានាសុវត្ថិភាព កាត់បន្ថយគ្រោះថ្នាក់ចរាចរណ៍ និងការពារហេដ្ឋារចនាសម្ព័ន្ធផ្លូវថ្នល់។ ខណៈការកែច្នៃរថយន្តខុសលក្ខណៈបច្ចេកទេស គឺជាបញ្ហាដែលអាជ្ញាធរបាននិងកំពុងយកចិត្តទុកដាក់ត្រួតពិនិត្យ និងចាត់វិធានការយ៉ាងតឹងរឹងបំផុត។

ជាក់ស្ដែងនៅយប់ថ្ងៃទី៣ ខែមិថុនា ឆ្នាំ២០២៦ លោកបានបញ្ជាផ្ទាល់ឲ្យការិយាល័យនគរបាលចរាចរណ៍ផ្លូវគោកខេត្ត និងមន្ត្រីអាវុធហត្ថខេត្ត ចុះឃាត់រថយន្តកែច្នៃខុសលក្ខណៈបច្ចេកទេស បានចំនួន៥គ្រឿង ដែលធ្វើចរាចរណ៍ឆ្លងកាត់ភូមិសាស្ត្រខេត្តកំពង់ឆ្នាំង ដើម្បីយកមកអនុវត្តតាមនីតិវិធី ក្នុងនោះអាវុធហត្ថខេត្តឃាត់រថយន្តកែច្នៃខុសលក្ខណៈបច្ចេកទេសបានចំនួន២គ្រឿង និងមន្ត្រីនគរបាលចរាចរណ៍ផ្លូវគោក ស្រុកបរិបូណ៌ ឃាត់រថយន្តកែច្នៃខុសលក្ខណៈបច្ចេកទេសបានចំនួន៣គ្រឿង។

ពាក់ព័ន្ធករណីការចុះឃាត់រថយន្តកែច្នៃខុសលក្ខណៈបច្ចេកទេសតាមបទបញ្ជារបស់លោកអភិបាលខេត្តខាងលើនេះ លោកវរសេនីយ៍ឯក ហង្ស សុជាតិ មេបញ្ជាការរង នៃបញ្ជាការដ្ឋានកងរាជអាវុធហត្ថខេត្តកំពង់ឆ្នាំង បានឲ្យដឹងថា បន្ទាប់ពីទទួលបានបទបញ្ជាពីលោកអភិបាលខេត្តផ្ទាល់ កម្លាំងរបស់លោកបានចុះឃាត់រថយន្តកែច្នៃខុសលក្ខណៈបច្ចេកទេស បានចំនួន២គ្រឿង។ បច្ចុប្បន្នរថយន្តទាំង២គ្រឿងនេះ ត្រូវបានរក្សាទុកនៅក្បែរមន្ទីរសាធារណៈការខេត្តនៅឡើយ ដោយរង់ចាំទទួលបទបញ្ជាពីលោកអភិបាលខេត្តដើម្បីបន្តនីតិវិធី។

ដោយឡែកលោកវរសេនីយ៍ឯក លី ណា នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង បានបញ្ជាក់ថា នៅយប់ថ្ងៃទី៣ ខែមិថុនា ឆ្នាំ២០២៦នេះ នគរបាលចរាចរណ៍ផ្លូវគោកស្រុកបរិបូរណ៍ អនុវត្តតាមបទបញ្ជារបស់លោកឧត្តមសេនីយ៍ តេង ច័ន្ទណាត ស្នងការនគរបាលខេត្ត បានចុះឃាត់រថយន្តកែច្នៃខុសលក្ខណៈបច្ចេកទេសដូចខាងលើនេះ បានចំនួន៣គ្រឿងផងដែរ។ បច្ចុប្បន្នរថយន្តទាំង៣គ្រឿងនោះកំពុងរក្សាទុកនៅអធិការដ្ឋាននគរបាលស្រុកបរិបូណ៌ ដោយរង់ចាំបទបញ្ជដើម្បីអនុវត្តនីតិវិធីបន្ត។

លោកបានបន្ថែមថា ទាំងរយៈពេលកន្លងមក និងបច្ចុប្បន្នកម្លាំងជំនាញរបស់លោកបាននិងកំពុងអនុវត្តតាមបទបញ្ជារបស់ប្រធានគណៈបញ្ជាការឯកភាពរដ្ឋបាលខេត្ត ក៏ដូចជាតាមបទបញ្ជារបស់លោកស្នងការ ដោយបានចុះណែនាំអប់រំដល់ប្រជាពលរដ្ឋដែលធ្វើដំណើរតាមដងផ្លូវសាធារណៈ ជាពិសេសដល់ម្ចាស់យានយន្តគ្រប់ប្រភេទ បើកបរត្រូវមានការប្រុងប្រយ័ត្ន បើកបរត្រូវគោរពច្បាប់ចរាចរណ៍ជាចម្បង។ ក្នុងកិច្ចប្រតិបត្តិការរយៈពេលប៉ុន្មានថ្ងៃកន្លងមកនេះផងដែរ រថយន្តជាច្រើនគ្រឿងត្រូវបានត្រួតពិនិត្យហើយរថយន្តដែលរកឃើញថា បានកែច្នៃខុសលក្ខណៈបច្ចេកទេស ត្រូវបានចាប់កាត់ទ្រង់ ឬតម្រូវឲ្យធ្វើកិច្ចសន្យាកាត់ទ្រង់ដោយខ្លួនឯង៕