(ព្រះសីហនុ)៖ អ្នកនាំពាក្យសាលាដំបូងខេត្តព្រះសីហនុ នៅថ្ងៃទី៥ ខែមិថុនា ឆ្នាំ២០២៦នេះ បានចេញសេចក្ដីប្រកាសព័ត៌មាន បង្ហាញអំពីចំណាត់ការតាមផ្លូវច្បាប់ក្នុងការផ្ដន្ទាទោសជនជាតិចិនចំនួន៣នាក់ ពាក់ព័ន្ធករណីចាប់ឃុំឃាំង និងបង្ខាំងមនុស្សដោយខុសច្បាប់មានស្ថានទម្ងន់ទោស, កាន់កាប់អាវុធដោយគ្មានការអនុញ្ញាត និងប្រើប្រាស់ឯកសារសាធារណៈក្លែង។

កាលពីថ្ងៃទី៣ ខែមិថុនា ឆ្នាំ២០២៦ ក្រុមប្រឹក្សាជំនុំជម្រះ នៃសាលាដំបូងខេត្តព្រះសីហនុ បានបើកសវនាការជាសាធារណៈ ដើម្បីប្រកាសសាលក្រមលើសំណុំរឿងព្រហ្មទណ្ឌលេខ ៥៦៦ ចុះថ្ងៃទី១៧ ខែឧសភា ឆ្នាំ២០២៥ ហើយបានប្រកាសសាលក្រមលេខ ១៨៧/១៦ ក្រ៦ "ជ” ចុះថ្ងៃទី៣ ខែមិថុនា ឆ្នាំ២០២៦ ដោយបានសម្រេច៖

* ផ្តន្ទាទោសលើជនជាប់ចោទ៖
១៖ ឈ្មោះ FU YANG MIN ហៅ AH FU ភេទប្រុស កើតឆ្នាំ១៩៩៣ ជនជាតិចិន

២៖ ឈ្មោះ FU JING PENG ហៅ A PENG ភេទប្រុស កើតឆ្នាំ១៩៩៣ ជនជាតិចិន ដាក់ពន្ធនាគារម្នាក់ៗ កំណត់រយៈពេល២៥ (ម្ភៃប្រាំ) ឆ្នាំ និងពិន័យជាប្រាក់ក្នុងម្នាក់ៗ ចំនួន៦,០០០,០០០(ប្រាំមួយលាន) រៀលពីបទចាប់ឃុំឃាំង និងបង្ខាំងមនុស្សដោយខុសច្បាប់មានស្ថានទម្ងន់ទោស (ជំរិតយកប្រាក់ និងធ្វើទារុណកម្ម ឬអំពើឃោរឃៅ), កាន់កាប់អាវុធដោយគ្មានការអនុញ្ញាត និងប្រើប្រាស់ឯកសារសាធារណៈក្លែង ប្រព្រឹត្តនៅបុរីឡឹសិន ក្រុមទី១៤ ភូមិ២ សង្កាត់លេខ១ ក្រុងព្រះសីហនុ ខេត្តព្រះសីហនុ, នៅផ្ទះជួល ភូមិ១ ឃុំអូរត្រេះ ស្រុកស្ទឹងហាវ ខេត្តព្រះសីហនុ និងនៅវីឡាជួលក្រោយសាលាក្រុងព្រះសីហនុ ភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី៩ ខែឧសភា ឆ្នាំ២០២៥ រហូតដល់ថ្ងៃទី១១ ខែឧសភា ឆ្នាំ២០២៥ តាមបញ្ញត្តិមាត្រា២៥៤, មាត្រា៤៩០ និងមាត្រា៦៣០ នៃក្រមព្រហ្មទណ្ឌ

៣៖ ឈ្មោះ CAI MAO ZI ភេទប្រុស កើតឆ្នាំ១៩៨៣ ជនជាតិចិន ដាក់ពន្ធនាគារកំណត់ រយៈពេល ២០(ម្ភៃ) ឆ្នាំ និងពិន័យជាប្រាក់ ៦,០០០,០០០ (ប្រាំមួយលាន) រៀល ពីបទ សមគំនិតក្នុងអំពើ ចាប់ឃុំឃាំង និងបង្ខាំងមនុស្សដោយខុសច្បាប់មានស្ថានទម្ងន់ទោស (ជំរិតយកប្រាក់ និងធ្វើទារុណកម្ម ឬអំពើឃោរឃៅ), កាន់កាប់អាវុធដោយគ្មានការអនុញ្ញាត និងប្រើប្រាស់ឯកសារសាធារណៈក្លែង ប្រព្រឹត្តនៅ បុរីឡឹសិន ក្រុមទី១៤ ភូមិ២ សង្កាត់លេខ១ ក្រុងព្រះសីហនុ ខេត្តព្រះសីហនុ, នៅផ្ទះជួល ភូមិ១ ឃុំអូរត្រេះ ស្រុកស្ទឹងហាវ ខេត្តព្រះសីហនុ និងនៅវីឡាជួល ក្រោយសាលាក្រុងព្រះសីហនុ ភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី៩ ខែឧសភា ឆ្នាំ២០២៥ រហូតដល់ថ្ងៃទី១១ ខែឧសភា ឆ្នាំ២០២៥ តាមបញ្ញត្តិ មាត្រា២៩, មាត្រា២៥៤, មាត្រា៤៩០ និងមាត្រា៦៣០ នៃក្រមព្រហ្មទណ្ឌ។

* ហាមឃាត់ជនជាប់ចោទខាងលើ ចំពោះការចូល និងការស្នាក់នៅក្នុងដែនដីនៃព្រះរាជាណាចក្រកម្ពុជាជាស្ថាពរ។
* វត្ថុតាងពាក់ព័ន្ធនឹងបទល្មើសខាងលើ ត្រូវបានសម្រេចរឹបអូស តាមបញ្ញត្តិមាត្រា៦២ នៃក្រមព្រហ្មទណ្ឌ៕