(កណ្ដាល)៖ ព្រះសាសនមុនី ហ៊ឹម ប៊ុនធឿន ធម្មត្ថេរោ ប្រធាន​ពុទ្ធ​មណ្ឌល​វិបស្សនា​ធុរៈ​ នៃ​ព្រះ​រាជាណាចក្រ​កម្ពុជា​ បានមានសង្ឃដិកាថា វត្ដមានរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត គឺតែងតែយកចិត្តទុកដាក់ទៅលើការទំនុកបម្រុងដល់ព្រះសង្ឃ សីលវន្ត សីលវតី នៅក្នុងព្រះពុទ្ធសាសនា ដើម្បីចូលរួមចំណែកក្នុងការផ្សព្វផ្សាយព្រះធម៌វិន័យរបស់ព្រះសម្មាសម្ពុទ្ធផង និងការចូលរួមលើកតម្កើងតម្លៃព្រះពុទ្ធសាសនាទាំងព្រះបរិយត្តិ ទាំងការបដិបត្តិ។ ទឹកចិត្តរបស់លោកជំទាវបណ្ឌិត តែងតែបានមកបំពេញនូវការសួរសុខទុក្ខ ទំនុកបម្រុងដល់ព្រះសង្ឃ លោកតា លោកយាយ រៀងរាល់ខែនោះផង ដោយលោកជំទាវ លោកបានយកចិត្តទុកដាក់ណាស់ ក្នុងការអប់រំចិត្តតាមឱវាទរបស់ព្រះសម្មាសម្ពុទ្ធ។

សង្ឃដិកាយ៉ាងដូច្នេះរបស់ព្រះសាសនមុនី ហ៊ឹម ប៊ុនធឿន ធម្មត្ថេរោ ប្រធាន​ពុទ្ធ​មណ្ឌល​វិបស្សនា​ធុរៈ​ នៃ​ព្រះ​រាជាណាចក្រ​កម្ពុជា​ ក្នុងឱកាសលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាធិបតីបញ្ចុះបឋមសិលាកសាង «រតនមន្ទីរពុទ្ធមណ្ឌលវិបស្សនាឧដុង្គ» ដែលប្រព្រឹត្តទៅនៅក្នុងបរិវេណពុទ្ធមណ្ឌលវិបស្សនាធុរៈ ជាបូជនីយដ្ឋានពុទ្ធសាសនា និងជាទីបដិបត្តិផ្នែកវិបស្សនាធុរៈរបស់ជាតិធំជាងគេនៅកម្ពុជា សម្រាប់ការផ្សព្វផ្សាយព្រះធម៌ រួមទាំងសម្រាប់រៀបចំកម្មវិធីបដិបត្តិវិបស្សនាទាំងថ្នាក់ជាតិ និងថ្នាក់អន្តរជាតិ នៅថ្ងៃទី៦ ខែមិថុនា ឆ្នាំ២០២៦នេះ។

ព្រះសាសនមុនី ហ៊ឹម ប៊ុនធឿន បានមានសង្ឃដិកាបន្ដថា «រយៈខាងវិបស្សនានេះ គឺជារតនតម្លៃមួយដ៏ឧត្តុង្គឧត្តម ជាការជួយទៅផ្លូវចិត្តរបស់យើង ឱ្យមានកម្លាំងកាយ កម្លាំងចិត្តក្នុងការចូលរួមអភិវឌ្ឍសង្គមជាតិរបស់យើង ផ្សារភ្ជាប់ជាមួយនិងព្រះពុទ្ធសាសនា។ ហេតុដូច្នេះទោះបីជាលោកជំទាវបណ្ឌិត មមាញឹកយ៉ាងណាក៏ឆ្លៀតឱ្យតម្លៃទៅលើការសិក្សាបដិបត្តិធម៌ព្រះវិន័យរបស់អង្គព្រះសម្មាសម្ពុទ្ធដ៏ខ្ជាប់ខ្ជួន ដើម្បីផ្សព្វផ្សាយដល់ពុទ្ធបរិស័ទរបស់យើងនៅក្នុងកម្ពុជានេះ ឱ្យកាន់តែមានថាមពលទាំងផ្លូវកាយ ផ្លូវចិត្ត រួមចំណែកក្នុងការអភិវឌ្ឍសង្គមជាតិជាមួយ និងរាជរដ្ឋាភិបាលរបស់យើង ឱ្យរក្សាបាននូវសុខសន្តិភាព និងការអភិវឌ្ឍចម្រុងចម្រើនតរៀងទៅ»។

នាឱកាសនោះ ព្រះសាសនមុនី ហ៊ឹម ប៊ុនធឿន សូមថ្លែងអំណរគុណចំពោះថ្នាក់ដឹកនាំ មានសម្ដេចតេជោ ប្រធានព្រឹទ្ធសភា និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន, សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ព្រមទាំងមាតាបិតារបស់លោក។ សូមតេជះនៃគុណព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក គឺគុណព្រះពុទ្ធ ព្រះធម៌ ព្រះសង្ឃ ជួយបីបាច់ថែរក្សា សម្ដេច លោកជំទាវ ញាតិញោមពុទ្ធបរិស័ទទាំងអស់ សូមទទួលបាននូវពរទាំងបួនប្រការ គឺអាយុ វណ្ណៈ សុខៈ និងពលៈ គ្រប់ៗគ្នា កុំបីអាក់ខានឡើយ៕