(ភ្នំពេញ)៖ កាលពីយប់ថ្ងៃទី២៩ ខែឧសភា ឆ្នាំ២០២៦កន្លងទៅ នៅក្នុងខណ្ឌដង្កោ មានហេតុការណ៍ដ៏ភ្ញាក់ផ្អើលមួយ ក្រោយពលរដ្ឋប្រទះឃើញសពជនជាតិចិនម្នាក់ ត្រូវបានគេយកទៅផ្លុងចោល ដែលព័ត៌មាននេះត្រូវបាន គេចែកចាយ ជាពិសេសជនជាតិចិនបានយកទៅបង្ហោះយ៉ាងច្រើននៅក្នុងបណ្តាញសង្គម WeChat និងបណ្តាញសង្គមផ្សេងទៀត នាំឲ្យជនជាតិចិនមួយចំនួនមានការគិតមិនល្អពីស្ថានភាពសន្តិសុខក្នុងស្រុករបស់យើង។

ក្រោយទទួលបានព័ត៌មាន និងមានករណីឃាតកម្មនេះកើតឡើងភ្លាម កម្លាំងនគរបាលរាជធានីភ្នំពេញ សហការជាមួយកម្លាំងនគរបាលជំនាញ នៃអគ្គស្នងការដ្ឋាននគរបាលជាតិ​ បានបើកការស្រាវជ្រាវ ហើយឈានដល់ការចាប់ខ្លួនជនល្មើសបាន៤នាក់ជាបន្តបន្ទាប់។

ប្រតិបត្តិការនេះ បានធ្វើឡើងក្រោមការបញ្ជាផ្ទាល់របស់នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ។

ថ្លែងប្រាប់បណ្តាញព័ត៌មាន Fresh News នៅរសៀលថ្ងៃទី៦ ខែមិថុនា ឆ្នាំ២០២៦ លោកឧត្តមសេនីយ៍ឯក ជួន ណារិន្ទ បានបញ្ជាក់ថា ក្រុមជនល្មើសដែលជាជនជាតិចិនគ្នាឯងចំនួន៤នាក់ ត្រូវបានកម្លាំងនគរបាលចាប់ខ្លួនបានហើយ និងកំពុងតាមចាប់បក្ខពួកមួយចំនួនទៀត។

បើតាមលោកឧត្តមសេនីយ៍ស្នងការ, ករណីនេះកើតឡើងដោយសារជនជាតិចិន បានឈ្លោះ និងមានគំនុំជាមួយគ្នានៅស្រុកចិន ហើយពេលជនរងគ្រោះមកខ្មែរ ក៏ក្រុមជនល្មើសមកតាមសម្លាប់តែម្តង។

សូមបញ្ជាក់ថា ជនរងគ្រោះជាជនជាតិចិនត្រូវបានឃាតកសម្លាប់ ហើយដឹកយកមកផ្លុងចោលក្នុងរថយន្តព្រូស​ ពណ៌ស​ ពាក់ផ្លាកលេខ​ភ្នំពេញ​ 2BH-1311​ នៅចំណុចដីវាលមួយកន្លែងក្នុងភូមិបាគូ​ សង្កាត់ដង្កោ​ ខណ្ឌដង្កោ​ រាជធានីភ្នំពេញ​។

នៅពេលនេះ សម្រាប់ជនល្មើសទាំង៤នាក់ ត្រូវបាននិងកំពុងសួរនាំនៅស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿងបញ្ជូនទៅតុលាការចាត់ការបន្តទៀត៕