(កំពង់ឆ្នាំង)៖ ដើម្បីទប់ស្កាត់នូវរាល់សកម្មភាពបទល្មើសផ្សេងៗ ជាពិសេសគឺដើម្បីកាត់បន្ថយនូវអត្រាគ្រោះថ្នាក់ចរាចរណ៍នៅក្នុងមូលដ្ឋាន នៅព្រឹកថ្ងៃទី៥ ខែមិថុនា ឆ្នាំ២០២៦នេះ លោក យ៉ែម លក្ខិណា អភិបាលស្រុកកំពង់លែង បានដឹកនាំក្រុមការងារគណៈបញ្ជាការឯកភាពរដ្ឋបាលស្រុក និងមន្ត្រីជំនាញពាក់ព័ន្ធ ចុះធ្វើការអប់រំផ្សព្វផ្សាយដល់សិស្សានុសិស្ស បណ្ដាក្រុមហ៊ុន សហគ្រាស និងប្រជាពលរដ្ឋក្នុងមូលដ្ឋានឱ្យយល់ដឹងអំពីច្បាប់ចរាចរណ៍ និងចូលរួមទប់ស្កាត់នូវរាល់សកម្មភាពបទល្មើសផ្សេងៗពិសេសគឺបទល្មើសអនឡាញស្កេម។

លោក យ៉ែម លក្ខិណា ឱ្យដឹងថា ការណ៍ដែលលោកដឹកនាំក្រុមការងារគណៈបញ្ជាការឯកភាពរដ្ឋបាលស្រុក និងមន្ត្រីជំនាញពាក់ព័ន្ធចុះជួបសំណេះសំណាលនិងអប់រំណែនាំដល់សិស្សានុសិស្ស ក្រុមហ៊ុនសហគ្រាស និងបងប្អូនប្រជាពលរដ្ឋនៅតាមមូលដ្ឋានខាងលើនេះ ក្នុងគោលបំណងផ្សព្វផ្សាយ និងបំផុសស្មារតីដល់ពួកគាត់ ដើម្បីចូលរួមទប់ស្កាត់នូវរាល់សកម្មភាពបទល្មើសផ្សេងៗ ដូចជា៖ ការរុករានទន្ទ្រានដីព្រៃលិចទឹករបស់រដ្ឋ, ការនេសាទខុសច្បាប់, ការប្រព្រឹត្តនូវល្បែងស៊ីសង, ការប្រើប្រាស់គ្រឿងញៀន, ក្មេងទំនើង ពិសេសគឺចូលរួមទប់ស្កាត់អនឡាញស្កេម (online scams) ដែលករណីនេះរាជរដ្ឋាភិបាលកំពុងយកចិត្តទុកដាក់យ៉ាងខ្លាំងជារៀងរាល់ថ្ងៃ ក្នុងការបង្ក្រាបល្បែងស៊ីសងអនឡាញ និងការឆបោកតាមប្រព័ន្ធបច្ចេកវិទ្យា។

តាមរយៈការផ្សព្វផ្សាយព័ត៌មាននេះផងដែរ លោកអភិបាលស្រុកក៏សូមអំពាវនាវដល់ប្រជាពលរដ្ឋនៅគ្រប់មូលដ្ឋានក្នុងស្រុកកំពង់លែងទាំងមូល សូមបងប្អូនមេត្តាចូលរួមជាមួយអាជ្ញាធរ និងសមត្ថកិច្ច ដើម្បីទប់ស្កាត់នូវរាល់សកម្មភាពបទល្មើសទាំងអស់ខាងលើនេះ ប្រសិនបើបងប្អូនជួបប្រទះនូវសកម្មភាពបទល្មើសណាមួយ សូមមេត្តាប្រញាប់រាយការណ៍មកអាជ្ញាធរ ឬសមត្ថកិច្ចក្នុងមូលដ្ឋានរបស់បងប្អូន ដើម្បីអាជ្ញាធរ និងសមត្ថកិច្ចចាត់វិធានការឱ្យបានទាន់ពេលវេលាទាំងនេះ ក៏ដើម្បីភូមិឃុំមានសុវត្ថិភាពរបស់យើងទាំងអស់គ្នាផងដែរ៕