ករណីក្មេងទំនើង២ក្រុម កាប់ប្រហារគ្នាបណ្ដាលឲ្យស្លាប់ម្នាក់ នៅស្រុកមុខកំពូល ត្រូវតុលាការខេត្តកណ្ដាលសម្រេចឃុំខ្លួន ៤នាក់ដាក់ពន្ធនាគារ
06-06-2026 16:10
(កណ្ដាល)៖ ករណីក្មេងទំនើង ២ក្រុមកាប់ប្រហារគ្នា នៅស្រុកមុខកំពូល ខេត្តកណ្ដាល បណ្ដាលឲ្យស្លាប់ម្នាក់ ត្រូវបានលោក ស្វាយ តុញ ចៅក្រមស៊ើបសួរ នៃសាលាដំបូងខេត្តកណ្ដាល សម្រេចឃុំខ្លួនជនសង្ស័យទាំង៤នាក់ ដាក់ពន្ធនាគារបណ្ដោះអាសន្ន ក្រោយលោកស្រី វ៉ា សក្កដា តំណាងអយ្យការ ចោទប្រកាន់ពីបទ «ឃាតកម្ម និងបទសមគំនិតក្នុងបទឃាតកម្ម» តាមបញ្ញត្តមាត្រា២៩, ១៩៩ នៃក្រមព្រហ្មទណ្ឌ។
នេះបើតាមលោក ខា ដែនណា អ្នកនាំពាក្យ អយ្យការអមសាលាដំបូងខេត្តកណ្ដាល និងលោក សូ សារិន អ្នកនាំពាក្យសាលាដំបូងខេត្តកណ្ដាល បានប្រាប់ភ្នាក់ងារ Fresh News នៅថ្ងៃទី៤ ខែឧសភា ឆ្នាំ២០២៦។
សូមរំលឹកថា កម្លាំងនគរបាលស្រុកមុខកំពូល បានស្រាវជ្រាវចាប់ជនសង្ស័យជាក្មេងទំនើង ចំនួន៤នាក់ ជាសិស្សសាលា៣នាក់ និងម្នាក់ជាកម្មករសំណង់ ដែលកាប់សម្លាប់គូបដិបក្ខខ្លួនជាសិស្សសាលាដូចគ្នា បណ្ដាលឲ្យស្លាប់ម្នាក់ និងម្នាក់ទៀតរត់ខ្លួន។ ករណីកាប់គ្នានេះ បានកើតឡើងកាលពីវេលាម៉ោង២៣៖២០នាទីកណ្តាលអាធ្រាតថ្ងៃទី២៩ ខែឧសភា ឆ្នាំ២០២៦ នៅចំណុចលើផ្លូវជាតិលេខ៦ ស្ថិតក្នុងភូមិឡឥដ្ឋ ឃុំព្រែកដំបង ស្រុកមុខកំពូល និងត្រូវសមត្ថកិច្ចតាមស្រាវជ្រាវរហូតឃាត់ខ្លួនក្រុមជនសង្ស័យទាំង៤នាក់ នៅថ្ងៃទី៣០ ខែឧសភា ឆ្នាំ២០២៦។
លោកវរសេនីយ៍ឯក ឯក លន់ អធិការនគរបាលស្រុកមុខកំពូល បានឲ្យដឹងថា ជនរងគ្រោះមានចំនួន២នាក់ ឈ្មោះ ធឿន សុខឈាង អាយុ១៧ឆ្នាំ មុខរបរសិស្ស មានទីលំនៅភូមិសាមគ្គី ឃុំព្រែកដំបង ស្រុកមុខកំពូល (ស្លាប់) និងឈ្មោះ សៀន សុខហេង អាយុ១៧ឆ្នាំ មុខរបរសិស្ស មានទីលំនៅភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្ដាល (មិនមានរងរបួសទេ)។
ចំណែកបក្ខពួកជនសង្ស័យមានចំនួន៤នាក់ ត្រូវបានឃាត់ខ្លួន ទី១៖ឈ្មោះ ផល សុភានិត អាយុ១៩ឆ្នាំ មុខរបរកម្មករ (ជនដៃដល់), ទី២៖ឈ្មោះ វុទ្ធី សៀងហៃ អាយុ១៨ឆ្នាំ, ទី៣៖ឈ្មោះ វី ដេវីត អាយុ១៨ឆ្នាំ និងទី៤៖ឈ្មោះ សុផល សុផាណា អាយុ១៦ឆ្នាំ ដែលអ្នកទាំងបីមានមុខរបរជាសិស្ស៕
