(ស្វាយរៀង)៖ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាចុះជួយខេត្តស្វាយរៀង នៅព្រឹកថ្ងៃទី៦ ខែមិថុនា ឆ្នាំ២០២៦ បានអញ្ជើញ ដឹកនាំកិច្ចប្រជុំផ្សព្វផ្សាយសេចក្តីសម្រេចស្តីពីផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៦ ឆ្នាំ២០២៧ និងបូកសរុបលទ្ធផលការងារឆមាសទី១ និងលើកទិសដៅអនុវត្តបន្តឆមាសទី២ ឆ្នាំ២០២៦ របស់ក្រុមការងារគណបក្សចុះមូលដ្ឋានខេត្តស្វាយរៀង។

ក្នុងឱកាសនោះសម្ដេចកិត្តិសង្គហបណ្ឌិត ម៉ែន សំអន បានកោតសរសើរ និងអរគុណយ៉ាងជ្រាលជ្រៅចំពោះលោក លោកស្រី ក្រុមការងារគណបក្ស គណៈកម្មាធិការគណបក្សគ្រប់ថ្នាក់ ដែលជានិច្ចកាលបានយកចិត្ត ទុកដាក់ទ្វេរដង ក្នុងការចូលរួមគ្រប់សកម្មភាពនៅតាមមូលដ្ឋាននីមួយៗ ធ្វើឱ្យខេត្តស្វាយរៀងយើងមានការរីកចម្រើនលើគ្រប់វិស័យ និងនៅតែជាខេត្តមួយរឹងមាំជានិច្ច។

ជាមួយគ្នានេះសម្ដេច ម៉ែន សំអន បានស្នើដល់អង្គប្រជុំ យកចិត្តទុកដាក់ជាអាទិភាពលើការងារមួយចំនួនបន្ថែមទៀត ដូចខាងក្រោម៖

*១៖ មន្ត្រីគណបក្សគ្រប់ថ្នាក់ គ្រប់ផ្នែក ត្រូវរួមសហការគ្នាខិតខំអនុវត្តនិងសម្រេចបានតាមអនុសាសន៍ដ៏ខ្ពង់ខ្ពស់ទាំង ១២ចំណុច របស់ សម្តេចតេជោ ប្រធានគណបក្ស ក្នុងពិធីសំណេះសំណាល ជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តស្វាយរៀង ដែលបានប្រព្រឹត្តទៅកាលពីថ្ងៃទី១៤ ខែឧសភា ឆ្នាំ២០២៦។

*២៖ បន្តពង្រឹងការអនុវត្ត «គោលនយោបាយភូមិ-ឃុំ-សង្កាត់មានសុវត្ថិភាព» និងបទបញ្ជាយ៉ាងម៉ឺងម៉ាត់ របស់ សម្តេចមហាបវរធិបតី នាយករដ្ឋមន្ត្រី ក្នុងការបង្ក្រាបបណ្តាញឆបោកតាមប្រព័ន្ធ បច្ចេកវិទ្យា(អនឡាញស្គម) ដែលត្រូវដើរទន្ទឹមនឹងការបោសសម្អាត និងបង្ក្រាបមន្ត្រីដែលជាប់ ពាក់ព័ន្ធ។ ការងារនេះ អាជ្ញាធរមូលដ្ឋានត្រូវបង្ក្រាបឱ្យទាល់តែអស់ជាដាច់ខាត ព្រោះនេះជាមុខមាត់ របស់ប្រទេសជាតិ។

*៣៖ ក្រុមការងារគណបក្ស គណៈកម្មាធិការគណបក្ស អង្គការមហាជនគណបក្ស និងមន្ត្រីគណបក្ស ពាក់ព័ន្ធគ្រប់ថ្នាក់ ត្រូវបង្កើនសកម្មភាពចិញ្ចឹមចលនានៅក្នុងមូលដ្ឋានឃុំ សង្កាត់ ដែលខ្លួនទទួល ខុសត្រូវ ដោយមានកម្មវិធីច្បាស់លាស់សម្រាប់ចុះផ្ទាល់ជាមួយសមាជិកគណបក្ស និងប្រជាពលរដ្ឋ នៅតាមភូមិនីមួយៗ ក្រុម និងតាមខ្នងផ្ទះ ដើម្បីពង្រឹងជំនឿលើគណបក្ស ពង្រឹងការគាំទ្រគណបក្ស និងទៅបោះឆ្នោតជូនគណបក្ស។

*៤៖ បន្តជំរុញការកសាងកម្លាំងពិតរបស់គណបក្សទាំងខាងបរិមាណ និងគុណភាព។

*៥៖ យោងតាមស្មារតីនៃផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិ ទី៦ របស់គណៈអចិន្ត្រៃយ៍គណៈកម្មាធិការកណ្តាល, ក្រុមការងារនិងគណៈកម្មាធិការគណបក្ស គ្រប់ថ្នាក់ ត្រូវពិនិត្យកែសម្រួល (ឬចាត់តាំងជាថ្មីឡើងវិញ) នូវគណៈបញ្ជាការយុទ្ធនាការបោះឆ្នោត គ្រប់ថ្នាក់ ឱ្យបានសមស្របជាមួយនឹងសភាពការណ៍ជាក់ស្តែង និងឱ្យបានរួចរាល់នៅត្រឹមបំណាច់ ឆ្នាំ២០២៦។

*៦៖ ក្រុមការងារនិងគណៈកម្មាធិការគណបក្សក្រុង ស្រុក ត្រូវបន្តជួយជ្រោមជ្រែងឧបត្ថម្ភគាំទ្រដល់គណៈកម្មាធិការគណបក្សឃុំ សង្កាត់នីមួយៗក្នុងការរៀបចំសេចក្តីព្រាងឯកសារសំខាន់២ ឱ្យបានមុនសន្និបាតគណបក្សឃុំ សង្កាត់ រួមមាន របាយការណ៍បូកសរុបវាយតម្លៃអំពីសមិទ្ធផល បញ្ហា ប្រឈម និងសតិអារម្មណ៍ប្រជាពលរដ្ឋ ក្នុងការអនុវត្តគោលនយោបាយរបស់គណបក្សសម្រាប់ អភិវឌ្ឍន៍ឃុំ សង្កាត់ ពីឆ្នាំ២០២២ ដល់ឆ្នាំ២០២៧ និងគោលនយោបាយរបស់គណបក្ស សម្រាប់អភិវឌ្ឍន៍ឃុំ សង្កាត់ ពីឆ្នាំ២០២៧ ដល់ឆ្នាំ២០៣២។

*៧៖ អំពីការរៀបចំបញ្ជីបេក្ខជនឈរឈ្មោះបោះឆ្នោត ជាការងារសំខាន់ ទោះបីប្រព័ន្ធបោះឆ្នោតតាមប្រព័ន្ធ សមាមាត្រក៏ពិតមែន ប៉ុន្តែអ្នកបោះឆ្នោតគាត់ពិនិត្យពិចារណា ថាតើបេក្ខជនណាខ្លះដែលគាត់ទុក ចិត្តជាងគេ និងជាអ្នកបម្រើប្រជាជននៅមូលដ្ឋាន។

*៨៖ ក្រុមការងារនិងគណបក្សគ្រប់ថ្នាក់ ត្រូវត្រៀមរៀបចំសន្និបាតគណបក្សឃុំ សង្កាត់ ឱ្យបានរួចរាល់ យ៉ាងយូរត្រឹមសប្តាហ៍ទី៣ ខែមករា ឆ្នាំ២០២៧ តាមការណែនាំក្នុងផែនការសកម្មភាពរបស់គណបក្សខេត្ត។

*៩៖ ថ្ងៃទី២៨ ខែមិថុនា ឆ្នាំ២០២៦ ជាខួបលើកទី៧៥ នៃថ្ងៃបង្កើតគណបក្សប្រជាជនកម្ពុជា, យោងតាមការណែនាំរបស់គណៈអចិន្ត្រៃយ៍នៃគណៈកម្មាធិការកណ្តាល, ឆ្នាំនេះគ្រប់ថ្នាក់មិនចាំបាច់រៀបចំ ពិធីមិទ្ទិញអបអរសាទរខួបលើកទី៧៥ នៃថ្ងៃបង្កើតគណបក្សឡើយ៕