(កំពង់ធំ)៖ អភិបាលខេត្តកំពង់ធំ លោក នួន ផារ័ត្ន នៅរសៀលថ្ងៃទី៦ ខែមិថុនា​ ឆ្នាំ២០២៦នេះ បានបន្ដចុះពិនិត្យ និងដោះស្រាយផ្ទាល់នៅនឹងកន្លែងភ្លាមៗ ករណីអ្នកស៊ីឈ្មួលភ្ជួរដីម្នាក់ ឈូសឆាយដីរដ្ឋនៅឃុំសាគ្រាម ស្រុកប្រាសាទបល្ល័ង្ក ហើយបង្ហោះតាមបណ្តាញសង្គមចោទអាជ្ញាធរ និងមន្រ្តីបរិស្ថានចាប់គាត់ជាមួយត្រាក់ទ័រទាំងបំពាន។

អ្នកស៊ីឈ្មួលភ្ជួរដីម្នាក់ខាងលើនេះ នៅឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ បានចោទមន្ត្រីបរិស្ថានខេត្តនេះថា បានចាប់យកត្រាក់ទ័ររបស់គាត់ដោយខុសច្បាប់ ប៉ុន្តែមន្ត្រីបរិស្ថានច្រានចោល ការចោទប្រកាន់នេះ។

ក្រោយទទួលបានព័ត៌មាននេះ និងមានការចោទប្រកាន់មិនមានមូលដ្ឋាននោះ លោក នួន ផារ័ត្ន បានដឹកនាំមន្រ្តីជំនាញបរិស្ថាន សមត្ថកិច្ចជំនាញ និងមានការចូលរួម ពីអាជ្ញាធរមូលដ្ឋាន ធ្វើដំណើរទៅពិនិត្យដីជាក់ស្តែងតែម្តង។ ចំពោះការបង្ហោះវីដេអូចោទរបស់គាត់នៅតាមបណ្តាញសង្គម ក៏មានការចែកចាយ និងចូលមើលជាច្រើននាក់ ដែលនាំឲ្យមានការយល់ច្រឡំ និងចោទលើមន្រ្តីទាំងខុស។

ពេលអភិបាលខេត្តកំពង់ធំ និងក្រុមមន្រ្តីទៅដល់ទីតាំងជាក់ស្តែង បានបង្ហាញថា ដីដែលត្រូវឈូសឆាយនេះជាដីរបស់រដ្ឋក្នុងទំហំមួយចំនួន ដែលមន្រ្តីបរិស្ថាន និងអាជ្ញាធរមូលដ្ឋានធ្វើការទប់ស្កាត់ជាបន្ទាន់។

តែទោះជាយ៉ាងណា ក្រោមការដោះស្រាយ និងយកចិត្តទុកដាក់ចំពោះពលរដ្ឋមូលដ្ឋាន អភិបាលខេត្តកំពង់ធំ បានណែនាំឲ្យបញ្ឈប់ការឈូសឆាយតទៅទៀត ដោយកំណត់ឲ្យអាស្រ័យផលលើដីជាក់ស្តែងកន្លែងណាធ្លាប់ អាស្រ័យផលគឺនៅដដែល ដោយរង់ចាំការសម្រេចពេលក្រោយរបស់ថ្នាក់ដឹកនាំរាជរដ្ឋាភិបាល។

សម្រាប់ត្រាក់ទ័រដែលមន្រ្តីបរិស្ថានឃាត់ទុកនោះ ត្រូវបានលោកអភិបាលខេត្ត អនុញ្ញាតឲ្យមន្រ្តីប្រគល់ជូនវិញផងដែរ។ ដោយឡែកម្ចាស់ត្រាក់ទ័រ ក៏បានថ្លែងអំណគុណលោកអភិបាលខេត្ដ ព្រមទាំងសុំទោសមន្រ្តីជំនាញ ដែលគាត់បានចោទប្រកាន់នាំឲ្យមានការយល់ច្រឡំពីមហាជន។

នៅចំពោះមុខនោះ លោក នួន ផារ័ត្ន ក៏បានព្រមានទុកជាមុនថា បើមានការលួចឈូសឆាយ ជាពិសេសមានកើតឡើងនៅពេលយប់​ មន្រ្តីជំនាញ និងអាជ្ញាធរ មិនលើកលែងឲ្យទៀតនោះទេ ត្រូវចាប់ឃាត់ និងកសាងសំណុំរឿងបញ្ជូនទៅតុលាការចាត់ការបន្ត៕