(ភ្នំពេញ)៖ រដ្ឋបាលខណ្ឌឬស្សីកែវ ដឹកនាំដោយលោក ជិន ប៊ុនធឿន អភិបាលខណ្ឌ បាននិងកំពុងខិតខំស្តារប្រឡាយចំនួន២ខ្សែ ដើម្បីត្រៀមនាំទឹកចេញពីភូមិដ្ឋានប្រជាពលរដ្ឋ ក្នុងរដូវវស្សានេះ ហើយគម្រោងខាងលើគ្រោងនឹងបញ្ចប់នៅចុងខែមិថុនានេះ។

ការងារនេះ ធ្វើឡើងក្រោមការយកចិត្តទុកដាក់ និងណែនាំ ព្រមទាំងការជួយឧបត្ថម្ភគាំទ្រទាំងស្មារតី ថវិកា និងគ្រឿងច័ក្រ ពីលោក ឃួង ស្រេង អភិបាលរាជធានីភ្នំពេញ ក្នុងផែនការត្រៀមរំដោះជំនន់ទឹកភ្លៀងបញ្ចៀសការជន់លិចផ្ទះសម្បែង និងហេដ្ឋារចនាសម្ព័ន្ធនានាក្នុងរដូវវស្សា។

នេះបើតាមការឲ្យដឹងពីលោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលសាលារាជធានីភ្នំពេញ នារសៀលថ្ងៃទី៦ ខែមិថុនា ឆ្នាំ២០២៦នេះ។

លោក ជិន ប៊ុនធឿន អភិបាលខណ្ឌឫស្សីកែវ បានបញ្ជាក់ដែរថា ដោយមានការជួយឧបត្ថម្ភគាំទ្រទាំងស្មារតី ថវិកា និងគ្រឿងច័ក្រពីលោក ឃួង ស្រេង អភិបាលរាជធានីភ្នំពេញ ក្រុមការងារខណ្ឌបានបន្តស្តារប្រឡាយចំនួន២ខ្សែ ក្នុងមូលដ្ឋានខណ្ឌប្ញស្សីកែវ ក្នុងឆ្នាំ២០២៦ ដែលក្នុងនោះ ប្រឡាយព្រែកបាក់ទូក ស្តារបានប្រវែង៣,១២០ម៉ែត្រ/៣,១២០ម៉ែត្រ និងប្រឡាយព្រែកអូរវែង ស្តារបាន ប្រវែង៤,០០០ម៉ែត្រ/៤,៧៨០ម៉ែត្រ និងកំពុងបន្តស្តារប្រវែង៧៨០ម៉ែត្រទៀត ពីចំណុចស្ពានជីបម៉ុង ឆ្ពោះទៅស្ថានីយ៍បូមទឹកគីឡូម៉ែត្រលេច៩ ហើយគ្រោងនឹងបញ្ចប់នៅចុងខែមិថុនានេះ។

ក្នុងនាមអាជ្ញាធរមូលដ្ឋានលោកស្រី អ្នកនាំពាក្យរដ្ឋបាលរាជធានីភ្នំពេញ សូមអំពាវនាវប្រជាពលរដ្ឋ នៅជាប់ប្រឡាយ និងផ្លូវនានា ចូលរួមថែរក្សាប្រឡាយ ដែលបានស្តាររួច ដោយទុកដាក់សំរាមវេចខ្ចប់ឲ្យបានត្រឹមត្រូវ ដើម្បីអនាម័យបរិស្ថាន និងបញ្ចៀសកាលិចលង់ និងសោភណ្ឌភាពរាជធានីភ្នំពេញ៕