(តាកែវ)៖ ព្រះញាណសោភណ្ឌ យន វាសនា ព្រះរាជាគណៈថ្នាក់កិត្តិយស ព្រះមង្គលទិព្វលោកមុនី និងជាព្រះបាឡាត់គណខេត្តតាកែវ មានសង្ឃដីកា ដោយណែនាំទៅដល់បេក្ខៈសមណៈសិស្សទាំងអស់ ដែលបានចូលរួមនៅក្នុងការប្រឡងវិញ្ញាបនបត្រធម្មវិន័យថ្នាក់ត្រី ទោ ឯក ត្រូវខិតខំប្រឹងប្រែងប្រឡងឱ្យអស់ពីសមត្ថភាព និងគោរពឱ្យខាងតែបានចំពោះបទបញ្ជាផ្ទៃក្នុងឱ្យបានល្អប្រសើរ ដោយមិនត្រូវបង្កភាពអនាធិបតេយ្យនៅក្នុងបន្ទប់ប្រឡងឡើយ។

មានសង្ឃដីកាក្នុងពិធីកាត់ស្រោមវិញ្ញាសារប្រឡងវិញ្ញាបនបត្រធម្មវិន័យធម្មវិន័យថ្នាក់ត្រី ទោ ឯក សម្រាប់ឆ្នាំសិក្សា២០២៥-២០២៦ ដែលរៀបចំធ្វើឡើងនៅសាលាពុទ្ធិកបឋមសិក្សា វត្តបារមីគោតម ស្ថិតក្នុងឃុំពោធិ៍រំចាក ស្រុកព្រៃកប្បាស ខេត្តតាកែវ នាព្រឹកថ្ងៃទី០៧ ខែមិថុនា ឆ្នាំ២០២៦ ព្រះញាណសោភណ្ឌ យន វាសនា បានមានសង្ឃដីកាបន្តថា ដើម្បីគោរពបាននូវភាពថ្លៃថ្នូរ និងការរក្សាសណ្តាប់ធ្នាប់ក្នុងពេលប្រឡង គប្បីបេក្ខៈសមណៈសិស្សទាំងអស់ មិនត្រូវបង្កភាពអាណាធិបតេយ្យ ដោយលួចចម្លងគ្នា ឬយកប្រយ៉ុងចូលក្នុងបន្ទប់ប្រឡងឡើយ ជាពិសេសមិនត្រូវដើរឆ្លងពីតុមួយទៅតុមួយទៀតនោះទេ ពោលគឺត្រូវតែគោរពជាដាច់ដាច់ និងអនុវត្តឱ្យបានល្អ នូវបញ្ជាផ្ទៃក្នុងរបស់មណ្ឌលប្រឡង ហើយប្រសិនបើមានបេក្ខសមណៈសិស្សរូបណាប្រព្រឹត្តផ្ទុយនឹងបទបញ្ជាផ្ទៃក្នុង នឹងត្រូវធ្លាក់ដោយស្វ័យប្រវត្តិ ។

ព្រះបាឡាត់គណខេត្តតាកែវ មានសង្ឃដីកាថា នៅក្នុងពេលប្រឡងនេះផងដែរ គណៈកម្មការ អនុរក្សប្រឡងក៏ត្រូវតែយកចិត្តទុកដាក់ឲ្យបានខ្ពស់ ចំពោះសកម្មភាពរបស់បេក្ខសមណៈសិស្ស ពិសេសត្រូវពិនិត្យរាល់ ការប្រឡង និងឆែករកមើលថាតើ បេក្ខៈសមណៈទាំងនោះ មានយកឯកសារ ឬប្រយ៉ុងមកប្រឡងទេ ព្រោះយើងក្នុងនាមជាគណៈកម្មការត្រូវតែតឹងរ៉ឹង និងយុត្តិធម៌ចំពោះបេក្ខៈសមណៈ ពោលគឺមិនត្រូវឲ្យបេក្ខៈសមណៈបង្កភាពអាណាធិបតេយ្យឡើយនៅក្នុងបន្ទប់ប្រឡង ។

សូមបញ្ជាក់ដែរថា សម្រាប់មណ្ឌលប្រឡងវត្តបារមីគោតមនេះ មាន២ស្រុកចូលរួម គឺស្រុកព្រៃកប្បាស និងស្រុកអង្គរបូរី ដោយមានបេក្ខៈសមណៈសិស្ស ប្រឡងចំនួន ៣៥៧អង្គ/នាក់ ចែកចេញជា ១៦បន្ទប់ក្នុងនោះ៖

*ថ្នាក់ត្រី ចំនួន២១០អង្គ/នាក់ ស្មើនឹង០៩បន្ទប់
*ថ្នាក់ទោ ចំនួន៩០អង្គ/នាក់ ស្មើនឹង០៤បន្ទប់
*ថ្នាក់ឯក ចំនួន៥៧អង្គ/នាក់ ស្មើនឹង០៣បន្ទប់

ដោយឡែកសម្រាប់មណ្ឌលប្រឡងនេះមានការគាំទ្រ និងទំនុកបម្រុង ទាំងផ្នែកចង្ហាន់ ភេសជ្ជៈ ជូនបេក្ខៈសមណៈសិស្សប្រឡងទាំងអស់ដោយ ព្រះគ្រូសីលាភិមុនី សែម សុខណេង ទីប្រឹក្សាផ្ទាល់សម្ដេចព្រះសង្ឃនាយក នៃព្រះរាជាណាចក្រកម្ពុជា ព្រះមន្រ្តីសង្ឃជំនួយការសាលាអនុគណស្រុកព្រៃកប្បាស និងជាព្រះចៅអធិការវត្តបារមីគោតម រួមនិងពុទ្ធបរិស័ទជិតឆ្ងាយជាច្រើនាក់ផងដែរ៕