សមត្ថកិច្ចខេត្តស្វាយរៀង បង្ក្រាបក្រុមឧក្រិដ្ឋគឿងញៀន ឃាត់ខ្លួនជនជាតិចិន ៣នាក់ ដកហូតគ្រឿងញៀនជាង ១០គីឡូក្រាម និងវត្ថុតាងមួយចំនួនធំ
07-06-2026 16:35
(ស្វាយរៀង)៖ កម្លាំងសមត្ថកិច្ចខេត្តស្វាយរៀង បានបង្ក្រាបក្រុមឧក្រិដ្ឋជនជួញដូរគ្រឿងញៀន ដោយឃាត់ខ្លួនជនសង្ស័យជនជាតិចិន ចំនួន៣នាក់ និងគ្រឿងញៀនជាង ១០គីឡូក្រាម ព្រមដកហូតវត្ថុតាងមួយចំនួនធំ។
នគរបាលខេត្តស្វាយរៀង បានឱ្យដឹងថា ដោយអនុវត្តតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងលោក ប៉េង ពោធិ៍សា អភិបាលខេត្តស្វាយរៀង ដឹកនាំបញ្ជាផ្ទាល់ពីលោកឧត្ដមសេនីយ៍ទោ ពេជ្រ វីរៈ សស្នងការនគរបាលខេត្តស្វាយរៀង។
កាលថ្ងៃទី៤ ខែមិថុនា ឆ្នាំ២០២៦ លោកឧត្ដមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន និងលោកវរសេនីយ៍ឯក កាន កេន បានដឹកនាំកម្លាំងការិយាល័យប្រឆាំងគ្រឿងញៀនខេត្ត សហការជាមួយកម្លាំងនគរបាល នៃអធិការដ្ឋាននគរបាលក្រុងបាវិត ដឹកនាំដោយលោកវរសេនីយ៍ទោ អែម សុវណ្ណារិទ្ធិ អធិការនគរបាលក្រុងបាវិត ដោដោយមានការសម្របសម្រួលលោក ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង បានបើកប្រតិបត្តិការបង្ក្រាបករណីជួញដូរ និងរក្សាទុក ដោយខុសច្បាប់នូវសាធាតុញៀន និងកាន់កាប់អាវុធដោយគ្មានការអនុញ្ញាត ដោយឃាត់ខ្លួនជនសង្ស័យចំនួន ៣នាក់ ប្រុស ជាជនជាតិចិន ស្ថិតនៅភូមិបាវិតលេី សង្កាត់បាវិត ក្រុងបាវិត។
ជាមួយគ្នានេះ ក្នុងប្រតិបត្តិការនេះសមត្ថកិច្ចបានដកហូតវត្ថុតាងរួមមាន៖ សារធាតុញៀនទទម្ងន់ ១០គីឡូ ៩៧៣.២១ក្រាម, ជញ្ជីងថ្លឹង១គ្រឿង, អាវុធវែង ១ដេីម, បង់២ និងគ្រាប់ ៤៤០គ្រាប់, ទូរស័ព្ទដៃ ៣គ្រឿង និងសម្ភារៈមួយចំនួនទៀត។
បច្ចុប្បន្នជនសង្ស័យ រួមទាំងវត្ថុតាងត្រូវបានសមត្ថកិច្ចជំនាញ កសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីច្បាប់៕
