(កណ្តាល)៖ បណ្ឌិត កៅ ថាច អនុប្រធានក្រុមការងារគណបក្សចុះមូលដ្ឋានស្រុកខ្សាច់កណ្តាល និងជាប្រធានក្រុមការងារចលនាយុវជនគណបក្សស្រុក បានអញ្ជើញជាអធិបតីក្នុងពិធីបោះឆ្នោតជ្រើសរើសថ្នាក់ដឹកនាំយុវជនគណបក្សប្រជាជនកម្ពុជា ឃុំស្វាយរមៀត និងឃុំតាឯក នៃស្រុកខ្សាច់កណ្តាល កាលពីថ្ងៃទី៧ ខែមិថុនា ឆ្នាំ២០២៦។

ពិធីនេះមានការចូលរួមពី លោក ឆាយ រតនៈ អនុប្រធានក្រុមការងារគណបក្សចុះមូលដ្ឋានស្រុក និងជាប្រធានក្រុមការងារចុះមូលដ្ឋានឃុំតាឯក រួមទាំងតំណាងក្រុមការងារចុះមូលដ្ឋានឃុំស្វាយរមៀត គណៈអចិន្ត្រៃយ៍គណៈកម្មាធិការគណបក្សស្រុក-ឃុំ គណៈកម្មការបោះឆ្នោតថ្នាក់ស្រុក ប្រធានសាខាគណបក្សភូមិ បេក្ខជនឈរឈ្មោះ និងយុវជនជាអង្គបោះឆ្នោតសរុបជិត ៥០០នាក់។

នៅក្នុងឱកាសនោះ បណ្ឌិត កៅ ថាច បានវាយតម្លៃខ្ពស់ចំពោះការរៀបចំពិធីនេះ ដោយបានគូសបញ្ជាក់ថា៖
«ការបោះឆ្នោតជ្រើសរើសថ្នាក់ដឹកនាំយុវជនគណបក្សថ្នាក់ឃុំនាពេលនេះ គឺជាការបង្ហាញឱ្យឃើញយ៉ាងច្បាស់ពីការអនុវត្តគោលការណ៍ប្រជាធិបតេយ្យ និងសេរីភាពផ្ទៃក្នុងរបស់គណបក្សប្រជាជនកម្ពុជា»។

លោកបណ្ឌិតបានបន្ថែមថា នេះជាលើកដំបូងបង្អស់សម្រាប់ឃុំស្វាយរមៀត និងឃុំតាឯក ក្នុងស្រុកខ្សាច់កណ្តាល ដែលបានផ្លាស់ប្តូរទម្រង់ជ្រើសរើសថ្នាក់ដឹកនាំយុវជន ពីការតែងតាំងដោយគណបក្សមកជាការបោះឆ្នោតតាមបែបប្រជាធិបតេយ្យវិញ។ ព្រឹត្តិការណ៍នេះបានផ្តល់ឱកាសឱ្យយុវជនក្នុងមូលដ្ឋានប្រើប្រាស់សិទ្ធិស្វ័យសម្រេច ដើម្បីជ្រើសរើសថ្នាក់ដឹកនាំដែលខ្លួនជឿទុកចិត្ត និងមានសមត្ថភាពពិតប្រាកដ។

ជាមួយគ្នានេះ លោកបណ្ឌិត បានអំពាវនាវ និងផ្តល់ការណែនាំសំខាន់ៗដល់យុវជនដូចខាងក្រោម៖

• ជ្រើសរើសដោយផ្អែកលើសមត្ថភាព៖ ត្រូវជ្រើសរើសថ្នាក់ដឹកនាំដែលមានសមត្ថភាព គុណធម៌ និងមានស្មារតីសាមគ្គីភាពខ្ពស់។

• ធ្វើជាគំរូល្អក្នុងសង្គម៖ ជម្រុញឱ្យយុវជនខិតខំរៀនសូត្រ ប្រព្រឹត្តតែអំពើល្អ និងចៀសវាងឱ្យឆ្ងាយពីអំពើអបាយមុខផ្សេងៗ ជាពិសេសបញ្ហាគ្រឿងញៀន។

• ការប្តេជ្ញាចិត្តអភិវឌ្ឍន៍មូលដ្ឋាន៖ ថ្នាក់ដឹកនាំយុវជនដែលទទួលបានការទុកចិត្ត និងជាប់ឆ្នោត ត្រូវធ្វើជាគំរូល្អ ពង្រឹងសាមគ្គីភាពផ្ទៃក្នុង និងចូលរួមអភិវឌ្ឍន៍ឃុំទាំងពីរឱ្យរីកចម្រើនប្រកបដោយចីរភាព។

សកម្មភាពនេះ គឺស្របតាមបេសកកម្មស្នូលរបស់គណបក្សប្រជាជនកម្ពុជា ក្នុងការបម្រើ និងលើកកម្ពស់ជីវភាពរស់នៅរបស់ប្រជាពលរដ្ឋនៅតាមមូលដ្ឋានឱ្យកាន់តែប្រសើរឡើងពីមួយថ្ងៃទៅមួយថ្ងៃ៕