ជីវភាពពិតរបស់លោក «ជន ភើក» អ្នកមានភក្តីភាពចំពោះបក្សប្រជាជនកម្ពុជា នៅស្រុកប្រាសាទបល្ល័ង្ក ដែលកំពុងផ្ទុះការជជែកខ្លាំងលើបណ្តាញសង្គម
07-06-2026 21:27
(កំពង់ធំ)៖ ក្នុងសប្តាហ៍កន្លងទៅនេះ វីដេអូឃ្លីបរបស់លោក ជន ភើក ក្នុងឯកសណ្ឋានគណបក្សប្រជាជនកម្ពុជា បង្ហាញនូវភក្តីភាពរបស់លោកចំពោះគណបក្សប្រជាជនកម្ពុជា នាំឱ្យមានការជជែកវែកញែកជាច្រើនលើបណ្តាញសង្គម។
លោក ជន ភើក មានលំនៅឋានក្នុងភូមិបារាយ ឃុំក្រយា ស្រុកប្រាសាទបល្ល័ង្ក ខេត្តកំពង់ធំ។ ក្នុងពិធីបញ្ចូលសមាជិកបក្សប្រជាជនកម្ពុជាក្រោមអធិបតីភាពលោកអ្នកឧកញ៉ា ទ្រី ភាព ប្រធានក្រុមការងារគណបក្សប្រជាជនកម្ពុជាចុះជួយស្រុកប្រាសាទបល្ល័ង្កកាលពីថ្ងៃទី២៩ ខែឧសភា ឆ្នាំ២០២៦កន្លងទៅនេះ លោក ជន ភើក បានលើកបង្ហាញហេតុផលមួយចំនួន ដែលនាំឱ្យរូបលោកសម្រេចចូលរួមជីវភាពនយោបាយជាមួយគណបក្សប្រជាជនកម្ពុជា និងបោះឆ្នោតជូនគណបក្សប្រជាជនកម្ពុជាជាច្រើនអាណត្តិមកហើយ។
មូលហេតុដែលនាំឱ្យលោក ជន ភើក បោះឆ្នោតជូនគណបក្សប្រជាជនកម្ពុជា ក៏ព្រោះតែលោកមើលឃើញថា គណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាល បានយកចិត្តទុកដាក់កសាងប្រទេសជាតិ លើកកម្ពស់ជីវភាពប្រជាពលរដ្ឋឱ្យកាន់តែល្អប្រសើរ។ ក្នុងនោះជីវភាពរបស់លោកក៏បានល្អប្រសើរ ដែលពីមុនរកបាយហូបមិនបាន តែបច្ចុប្បន្នមានជីវភាពរស់នៅសមរម្យលើដីជនបទ។
សម្តីបង្ហាញហេតុផលនៃការគាំទ្របក្សប្រជាជនកម្ពុជារបស់លោក ជន ភើក ត្រូវបានជនមិនស្គាល់អត្តសញ្ញាណ ហើយមិនសប្បាយចិត្តនឹងអ្វីដែលលោកលើកឡើងនោះ យកទៅកាត់ច្នៃបំភ្លៃខុសពីខ្លឹមសារដើមផង ហើយក៏មានអ្នកមានមតិយោបល់ក្នុងន័យមិនល្អផង ហើយក៏មានអ្នកខ្លះបានប្រមាថរូបលោកមិនសមជាអ្នកមានជីវភាពល្អប្រសើរផង។
នៅថ្ងៃអាទិត្យ ទី៧ ខែមិថុនា ឆ្នាំ២០២៦នេះ អ្នកសារព័ត៌មាន Fresh News បានចុះទៅដល់ផ្ទះរបស់លោក ជន ភើក ក្នុងភូមិបារាយ ឃុំក្រយា ស្រុកប្រាសាទបល្ល័ង្ក ខេត្តកំពង់ធំ។ លោក ជន ភើក មានជីវភាពសមរម្យ។ លោក ភើក មានរបរលក់ប្រេងឥន្ធនៈ និងទំនិញប្រើប្រាស់ផ្សេងៗនៅខាងមុខផ្ទះធ្វើពីឈើប្រក់ក្បឿងទំហំពីរខ្នង។
ក្រៅពីរបរលក់ដូរនៅផ្ទះហើយនោះ លោក ជន ភើក ក៏មានដីដាំដំណាំស្វាយចន្ទីទំហំ ៤ហិកតា និងដីដាំដំឡូងមីទំហំ ៣ហិកតា។ ក្រៅពីមានដីចម្ការហើយនោះ លោកក៏មានត្រាក់ទ័រសម្រាប់ស៊ីឈ្នួលភ្ជួររាស់ដីឱ្យគេដែរ។ លោក ភើក មានកូនប្រុសពីរនាក់ ម្នាក់កំពុងរៀននៅមហាវិទ្យាល័យផ្នែកអក្សរសាស្ត្រ និងម្នាក់ទៀត កំពុងរៀននៅថ្នាក់ទី១០។
លោក ភើក បានរៀបរាប់ភូមិឋានរបស់លោកពីដើមជាតំបន់សមរភូមិសង្គ្រាមផ្ទៃក្នុង ដែលទើបបញ្ចប់ទៅនៅទសវត្សរ៍៩០ ហើយជាតំបន់ព្រៃមិនសូវមានផ្ទះប្រជាពលរដ្ឋនោះឡើយ។ ជីវភាពរបស់លោក ក៏ដូចប្រជាពលរដ្ឋដទៃទៀត គឺមានការលំបាកខ្លាំងណាស់។
សន្តិភាពក្រោមនយោបាយឈ្នះ-ឈ្នះ របស់សម្តេចតេជោ ហ៊ុន សែន នៅឆ្នាំ១៩៩៨ បូករួមជាមួយគោលនយោបាយអភិវឌ្ឍ គោលនយោបាយផ្នែកសេដ្ឋកិច្ច ធ្វើឱ្យភូមិឋានរបស់លោកមានផ្លូវកៅស៊ូ ជំរុញដល់ការបង្កបង្កើនផលដាំដុះនូវដំណាំផ្សេងៗ ដើម្បីលើកកម្ពស់ជីវភាព។
មនុញ្ញផលសុខសន្តិភាព និងគោលនយោបាយនានារបស់រាជរដ្ឋាភិបាលដឹកនាំដោយគណបក្សប្រជាជនកម្ពុជា បានជំរុញឱ្យជីវភាពរបស់លោក ជន ភើក និងប្រជាពលរដ្ឋដទៃទៀត មានភាពល្អប្រសើរឡើង។
ជាអ្នកស្រែចម្ការគ្មានផលណាមួយកើតឡើងដោយខ្វះការប្រឹងប្រែងអំណត់តស៊ូនោះឡើយ។ លោក ជន ភើក បានរៀបរាប់ថា ទោះបីរាជរដ្ឋាភិបាលនាំមកនូវសុខសន្តិភាព មានគោលនយោបាយអភិវឌ្ឍនានាយ៉ាងណាក្តី តែការណ៍ដែលនាំឱ្យជីវភាពរបស់លោក បានល្អប្រសើរមិនអាចកាត់ផ្តាច់ពីការប្រឹងប្រែង និងការនឿយហត់បាននោះឡើយ។
លោក ភើក បានបញ្ជាក់ថា កត្តានឿយហត់នឹងការងារនោះហើយ ទើបធ្វើឱ្យរូបសម្រស់របស់លោកមិនស្រស់ស្អាត រហូតមានមតិនានាលើបណ្តាញសង្គមថារូបលោកជាអ្នកអត់បាយហូប។
បើទោះបីរងការនិន្ទាដោយមតិមិនល្អពីអ្នកលេងបណ្តាញសង្គមយ៉ាងណាក្តី លោក ជន ភើក មិនបានប្រកាន់ខឹងនឹងមតិនោះឡើយ។ លោកនៅតែបន្តស្នាមញញឹម មិនប្រកាន់ទោសអ្វីនោះឡើយ។
បើទោះបីមានការនិន្ទាច្រើនលើអ្វីដែលលោក បានលើកឡើងតាមបណ្តាញសង្គមយ៉ាងណាក្តី ក៏លោក ជន ភើក មិនកែប្រែនូវទស្សនៈចំពោះការដឹកនាំរបស់រាជរដ្ឋាភិបាលកើតចេញពីគណបក្សប្រជាជនកម្ពុជា ដែលលោកតែងតែប្រកាន់យកនោះដែរ។
លោក ជន ភើក នៅតែយល់ថា គណបក្សប្រជាជនកម្ពុជា បានដឹកនាំត្រឹមត្រូវ ដឹកនាំដោយយកចិត្តទុកដាក់ខ្ពស់ចំពោះការកសាងជាតិ លើកកម្ពស់ជីវភាពប្រជាជន ធ្វើឱ្យប្រទេសជាតិមានការរីកចម្រើន ប្រជាពលរដ្ឋមានជីវភាពល្អប្រសើរ៕
