(តាកែវ)៖ លោកសាស្ត្រាចារ្យ រង លូ លីឃាង ទីប្រឹក្សាក្រសួងសុខាភិបាល និងជានាយកមន្ទីរពេទ្យព្រះអង្គឌួង បានបន្តដឹកនាំក្រុមការងារគ្រូពេទ្យផ្នែកចក្ខុរោគ របស់មនី្ទរពេទ្យព្រះអង្គឌួង នៃក្រសួងសុខាភិបាល ចុះពិនិត្យសុខភាពភ្នែក ផ្តល់វ៉ែនតា និងវះកាត់ ដោយឥតគិតថ្លៃ ជូនប្រជាពលរដ្ឋរស់នៅក្នុងស្រុកត្រាំកក់ ខេត្តតាកែវ ស្ថិតក្នុងមន្ទីរពេទ្យបង្អែកអង្គរកា នាដើមសប្តាហ៍នៃខែមិថុនា ឆ្នាំ២០២៦។

លោកសាស្ត្រាចារ្យ រង លូ លីឃាង ទីប្រឹក្សាក្រសួងសុខាភិបាល និងជានាយកមន្ទីរពេទ្យព្រះអង្គឌួង បានថ្លែងអំណរគុណយ៉ាងជ្រាលជ្រៅចំពោះមន្ទីរសុខាភិបាលនៃរដ្ឋបាលខេត្តតាកែវ ដែលបានសហការយ៉ាងជិតស្និទ្ធក្នុងការរៀបចំកម្មវិធីដ៏មានអត្ថន័យនេះ ក៏សូមថ្លែងអំណរគុណយ៉ាងស្មោះស្ម័គ្រចំពោះអង្គការ One Sight Essilor Luxottica Foundation, Bloomberg (ប៊្លូមប៊ឺក) និងមូលនិធិ Fred Hollows Foundation Cambodia ដែលបានផ្តល់ការគាំទ្រផ្នែកបច្ចេកទេស និងថវិកា ដើម្បីធ្វើឱ្យកម្មវិធីនេះអាចប្រព្រឹត្តទៅបានដោយជោគជ័យ។

លោកបន្តថា សម្រាប់មូលនិធិ Fred Hollows Foundation Cambodia នឹងបំពាក់សម្ភារៈបរិក្ខារពេទ្យមួយចំនួន សម្រាប់ព្យាបាលភ្នែកបឋមនៅមនី្ទរពេទ្យបង្អែកអង្គរកា។ ដូច្នេះប្រជាពលរដ្ឋ ដែលមានបញ្ហាភ្នែកល្មមៗ អាចមកទទួលការពិនិត្យ ព្យាបាលភ្នែក នៅមន្ទីរពេទ្យបង្អែកអង្គរកានេះបាន ព្រោះថាគ្រូពេទ្យបានទៅធ្វើកម្មសិក្សានៅក្នុងមនី្ទរពេទ្យព្រះអង្គឌួងរួចរាល់ហើយ។ ចំណែកការថែទាំសុខភាពភ្នែក គឺជាផ្នែកសំខាន់មួយនៃសុខភាពសាធារណៈ ព្រោះការមានភ្នែក ដែលមានសុខភាពល្អ អាចជួយឱ្យប្រជាពលរដ្ឋរស់នៅបានប្រកបដោយគុណភាព បង្កើនផលិតភាពក្នុងជីវភាពរស់នៅ និងការងារប្រចាំថ្ងៃ។

ជាមួយគ្នានោះឱសថការី ផាន់ វ៉ាន់ ប្រធានមនី្ទរសុខាភិបាល នៃរដ្ឋបាលខេត្តតាកែវ បានថ្លែងអំណរគុណដល់លោកសាស្រ្តាចារ្យ រង លូ លីឃាង នាយកមនី្ទរពេទ្យព្រះអង្គឌួង ដែលបានបណ្តុះបណ្តាលដល់មន្រី្តសុខាភិបាល ក្នុងខេត្តតាកែវ ឲ្យចេះព្យាបាលជំងឺភ្នែកបឋមនៅតាមមូលដ្ឋាន ជាពិសេសផ្នែកចក្ខុរោគ នៃមនី្ទរពេទ្យព្រះអង្គឌួង ក៏បានដាក់កម្មវិធីជាហូរហែរក្នុងការចុះពិនិត្យភ្នែក ផ្តល់វ៉ែនតា និងវះកាត់ ដោយឥតគិតថ្លៃ ជាប្រចាំ ដើម្បីថែទាំភ្នែកជូនបងប្អូនប្រជាពលរដ្ឋខេត្តតាកែវ ក៏ដូចជានៅទូទាំងប្រទេស។

ចំណែកបងប្អូនប្រជាពលរដ្ឋ លោកគ្រូ អ្នកគ្រូ ក្មេង ចាស់ ប្រុស ស្រី រស់នៅក្នុងស្រុកត្រាំកក់ ដែលបានអញ្ជើញមកទទួលសេវាថែទាំសុខភាពភ្នែក បានថ្លែងអំណរគុណយ៉ាងជ្រាលជ្រៅបំផុត និងមានជំនឿទុកចិត្តលើក្រុមគ្រូពេទ្យឯកទេសផ្នែកចក្ខុរោគ ព្រោះគុណភាពសេវាកម្រិតខ្ពស់ពីមន្ទីរពេទ្យព្រះអង្គឌួង បាននាំមកនូវពន្លឺសារជាថ្មី និងស្នាមញញឹមជូនដល់សហគមន៍ទាំងមូល។

ជាចុងក្រោយលោក គង់ នាត ប្រធានកម្មវិធី តំណាងលោក បាក់ តូក្យូ នាយកអង្គការ Fred Hollows Foundation Cambodia ពិតជាមានកី្តរំភើបរីករាយដែលបានឃើញបងប្អូនប្រជាពលរដ្ឋ មកទទួលសេវាថែទាំសុខភាពច្រើនសន្ធឹកសន្ធាប់នាព្រឹកនេះ។ ដែលលើកទី១ បានឃើញប្រជាពលរដ្ឋមកទទួលសេវាថែទាំសុខភាពភ្នែក គឺនៅខេត្តកំពង់ចាម។ ហើយនេះគឺជាលើកទី២ ដែលមានប្រជាពលរដ្ឋមកយ៉ាងច្រើនរហូតដល់រាប់ពាន់នាក់។

នេះបានធ្វើឲ្យលោកបានយល់ថា នេះជាហេតុផលចម្បងមួយ ដែលធ្វើឲ្យប្រជាពលរដ្ឋចាប់ផ្តើមយល់ដឹងថា បញ្ហាសុខភាពភ្នែក គឺជារឿងសំខាន់ដែលត្រូវបានដោះស្រាយដោយគ្រូពេទ្យជំនាញឯកទេស មិនមែនត្រូវបានដោះស្រាយដោយការផ្សព្វផ្សាយតាមបណ្តាញសង្គមនោះទេ ប្រហែលជាការយល់ដឹងនេះ មានការកើនឡើងល្អ ធ្វើឲ្យប្រជាពលរដ្ឋចាប់ផ្តើមមកទទួលការព្យាបាលដោយគ្រូពេទ្យជំនាញឯកទេសត្រឹមត្រូវ។ ដូច្នេះលោកបានអំពាវនាវដល់ប្រជាពលរដ្ឋ ដែលមានបញ្ហាភ្នែក (ឈឺភ្នែក) សូមបងប្អូនប្រជាពលរដ្ឋ កុំជឿការផ្សព្វផ្សាយតាមបណ្តាញសង្គម Facebook ឬក៏TikTok ដែលមិនមានប្រភពច្បាស់លាស់។ ដូចនេះសូមបងប្អូនទៅជួបជាមួយក្រុមគ្រូពេទ្យដែលមានជំនាញឯកទេស៕