(សៀមរាប)៖ ការិយាល័យប្រជាពលរដ្ឋខេត្តសៀមរាប នៅថ្ងៃទី០៨ ខែមិថុនា ឆ្នាំ២០២៦នេះ បានបន្តផ្សព្វផ្សាយស្តីពីអនុក្រឹត្យលេខ ១៩ អនក្រ និងតួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋរាជធានី-ខេត្ត ព្រមទាំងរបៀបប្រើប្រាស់កម្មវិធីទូរស័ព្ទដៃ «មតិយើង» ជូនដល់សាស្ត្រាចារ្យ និសិ្សត សាកលវិទ្យាល័យចំនួន៦ នៅក្នុងក្រុងសៀមរាប។

ការផ្សព្វផ្សាយនេះ ធ្វើឡើងក្នុងគោលដៅកំណត់អំពីយន្តការ គោលការណ៍ បែបបទនីតិវិធីនៃការទទួល និងសម្រុះសម្រួល ដោះស្រាយបណ្តឹងនៅថ្នាក់ក្រោមជាតិ និងសម្រុះសម្រួលដោះស្រាយបណ្តឹង ដែលពាក់ពន្ធ័ និងការផ្តល់សេវា ការគ្រប់គ្រងរដ្ឋបាលថ្នាក់ក្រោមជាតិ។

លោក តោ គឹមស៊ាន សមាជិកក្រុមប្រឹក្សាខេត្តសៀមរាប បានលើកឡើងថា ការផ្សព្វផ្សាយនេះ ក៏មានគោលដៅកំណត់អំពីយន្តការ គោលការណ៍ បែបបទនីតិវិធីនៃការទទួល និងសម្រុះសម្រួល ដោះស្រាយបណ្ដឹងនៅថ្នាក់ក្រោមជាតិ និងសម្រុះសម្រួលដោះស្រាយបណ្ដឹង ដែលពាក់ព័ន្ធនឹងការផ្ដល់សេវា និងការគ្រប់គ្រងរដ្ឋបាលថ្នាក់ក្រោមជាតិ។

លោកបានបន្តថា ការផ្សព្វផ្សាយនេះ ធ្វើឡើងក្នុងគោលបំណង ដើម្បីលើកកម្ពស់អភិបាលកិច្ចក្នុងការផ្តល់សេវាសាធារណៈ និងការអភិវឌ្ឍសេដ្ឋកិច្ចនៅរដ្ឋបាលថ្នាក់ក្រោមជាតិ តាមរយៈការពង្រឹងតួនាទីយន្តការអព្យាក្រឹត ក្នុងការទទួល និងសម្រុះសម្រួលដោះស្រាយបណ្តឹងក្រៅប្រព័ន្ធតុលាការ។

លោក តោ គឹមស៊ាន បានថ្លែងថា កម្មវិធីនេះក៏បានកំណត់ច្បាស់លាស់អំពីគោលការណ៍ បែបបទ និងនីតិវិធីនៃការទទួលបណ្តឹង, ការវាយតម្លៃ និងបញ្ជូនពាក្យបណ្តឹងទៅស្ថាប័នមានសមត្ថកិច្ច និងការតាមដានចំណាត់ការដោះស្រាយ ព្រមទាំងការផ្តល់ព័ត៌មានត្រឡប់ទៅម្ចាស់បណ្តឹងវិញ។

លោក តោ គឹមស៊ាន ក៏បានវាយតម្លៃខ្ពស់ពីការយល់ដឹងរបស់សាស្ត្រាចារ្យ និស្សិត ពីខ្លឹមសារសំខាន់ៗនៃអនុក្រឹត្យលេខ១៩ អនក្រ និងរបៀបការប្រើប្រាស់កម្មវិធីទូរស័ព្ទដៃ «មតិយើង» បានបង្កើនការយល់ដឹងបន្ថែមទៀតចូលទៅសហគមន៍។

នាឱកាសនោះដែរ លោក តោ គឹមស៊ាន ក៏បានផ្ដាំផ្ញើដល់សាស្ត្រាចារ្យ និស្សិតទាំងអស់ ក្រោយពេលទទួលបានចំណេះដឹងពីការផ្សព្វផ្សាយនេះ ត្រូវបន្តធ្វើការផ្សព្វផ្សាយដល់មិត្តភក្ដ័ក្នុងសាកលវិទ្យាល័យ ក៏ដូចជានៅតាមមូលដ្ឋានរបស់ខ្លួន សំខាន់សមាជិកក្នុងក្រុមគ្រួសារ និងអ្នកជិតខាងខ្លួនផងដែរ។

ក្នុងឱកាសនោះដែរ មន្ត្រីជំនាញក៏បានធ្វើបទបង្ហាញពីខ្លឹមសារសំខាន់ៗ នៃអនុក្រឹត្យលេខ១៩ អនក្រ, តួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋ និងការបង្ហាត់បង្ហាញលម្អិតអំពីរបៀបប្រើប្រាស់កម្មវិធីទូរស័ព្ទដៃ «មតិយើង»ដល់សិក្ខាកាម។ ព្រោះកម្មវិធីនេះ មានគោលបំណងផ្ដល់ភាពងាយស្រួលដល់ប្រជាពលរដ្ឋ ដែលមានបញ្ហាក្នុងមូលដ្ឋាន ឬភាពមិនពេញចិត្តលើការងារបម្រើសេវាសាធារណៈ និងការគ្រប់គ្រងដោយមានលក្ខខណ្ឌរក្សាការសម្ងាត់ជូនផងដែរ៕